ديوان الشاعر/ يحيى زكريا

فين هوه الأكل ؟

فين هو الاكل يا حلوه...

بالذمه دا اسمه كلام...

عاملالى حكايه وغنوه...

عايشالى فى الاوهام...

جبتى لى فى راسى بارومه...

وصداع محتاج برشام...

أصنافك فين يا حبيبتى...

هاتيها بسرعه قوام...

جايبه ترابيزه كبيره...

فارده لمترين قدام...

كلها ع الفاضى يا روحى...

دنا حطلع فوقها وانام...

أطباق فاضيه ومرصوصه...

وحاجات زى الافلام...

عينى ما شافت كفتايه...

أو أى لحوم أغنام...

أو صحن وفيه رزايه...

أو حتى ريش لحمام...

أو حتى طعميايه...

أمولتى دا والله حرام...

إن قلت جعان تقوليلى...

ياللا نعيش فى الاحلام...

غمض عينك واتخيل...

قدامك ألف برام...

كله محمر ومشمر...

إهجم ياللا يا ضرغام...

وقتها يا حبيبتى عرفت...

مخك ترللى تمام...

***********

طب ليه بس يا أموله...

عامله هيصه وهُلِّيله...

بالكدب تقولى كريمه...

وانتى يا حبيبتى بخيله...

والبخل أصيل جواكى...

أبدا مش عاده دخيله..

لو تدى فقير ملحايه...

تفضلى صاحيه فى دى الليله...

تبكى بالدمع الغالى...

وتقولى خيبتى تقيله...

ضاعت أموالى يا عالم..

فين عقلى يا دى النيله...

بعزقت فى ثروة أهلى...

وحعيش العمر ذليله...

إزاى ارجَّع ملحايتى...

أه يا غلبى إيه الحيله...

أموله كفايه يا روحى...

خلليتى قلبى بليله...

مخك يا حبيبتى أهو طار...

واللى ف راسك شخليله..

بتهيصي ليه ؟

بتهيصى ليه بلا خيبه...

دانتو أحوالكو عجيبه...

أخيب م الخيبه وبرضو...

عاملالنا هيصه فى طيبه...

عمركو ما فلحتوا فى حاجه...

إلا فى نميمه وغيبه...

تقدروا على رغى وزن...

تملوا ولا ألف زكيبه...

عمركوا ما مشيتوا فى حاجه...

إلا وعملتوا مصيبه...

وان قلنا اسكتوا واتهدوا...

حنلاقى دموعكو قريبه...

عاوزينا من غير صوت...

ما نزعق ونقول عيبه...

وان واحده غلطت تعمل...

عيانه وعاوزه طبيبه...

واجروا وهاتوا الادويه...

اعصابها سابت سيبه...

نازلين بعزقه فى فلوسنا...

مانتو فاكرينها نهيبه...

وان قلنا حنبعد عنكم...

تبكوا وتعملوا ندِّيبه...

وان جينا لوقت فراق...

تحلفوا انكو حبِّيبه...

وتبوسوا تراب رجلينا...

وان كنا فى قلب زريبه...

الرجل ليكو نصيب...

بس انتم لينا نصيبه...

ويا ريت فالحين

وياريت يا ايهاب يا اخويا...

فالحين فى غسيل وطبيخ...

لو يسلقوا بيضه فى كنكه...

يبقوا طلعوا المريخ...

لو عملوا ف مره فريك...

يملوا لنا الدنيا صريخ...

بعديها الله لا يوريك...

نقضيها جبنه وبطيخ...

ويقولوا الحر طويل...

مش عاوز كُتْر طبيخ...

كلها حركات تمثيل...

لجل يداروا التلبيخ...

اموله يا روحى كفايه...

بطلى شغل الطاخ طيخ...

حطوا لخيبتكو نهايه ...

خلليتوا حياتنا فسيخ...

خدنى يا ايهاب يا حبيبى...

للقمر البولنديه...

ما خلاص انا شفت نصيبى...

ويا النايبه العربيه...

فاكره نفسها يا ايهاب...

مافى غيرها لو فى اوربا...

خلِّت ايامى هباب...

دى مصيبه واكبر كُبَّه...

من إمتى ؟

فين هو الاكل يا روحى..

لجل ادخل فيه وأفوت..

اطباقك كلها فاضيه..

طب فين أكلك محطوط..

أل جايبه وزه وبطه...

دا ساعتها شارون حيموت..

لو فكرتى فى عزومه..

تسرقى من نور كتكوت..

وتقولى عليه ديك رومى...

وتجيبى حِلَلْ وطشوت...

لجل ما تمليهم ميَّه..

وتقولى دى شوربه وشوط...

دانتى شفتى بساريايا...

قولتى لى يا لهوى دى حوت...

ما عمرك شفتى البلطى...

أو شفتى فى يوم قرموط...

أبخل من بُخَلاَ الجاحظ...

بخلك فيكى مربوط..

مشهور بخلك فى العالم...

من كوريا لحد اسيوط...

من يوم ما عرفت جنابك...

جسمى أصبح مشفوط..

كان نفسى فى حبة دُقَّه...

قلتى لى طب بشروط...

اقطم من ودنك حته...

وتعدى بحور وشطوط..

يا حبيبتى طب من إمتى...

مخك كان يوم مضبوط...

دانتى كوكتيل مناخوليا...

مع أقوى جنان مخلوط...

أموله ياناس مجنونه...

وكمان مخها مخبوط...

لون على كل لون

لما كنا فى المظاهره...

ولا قولوا فى المسيره...

شفته ماشى جنب منى...

كان كإنه حته منى..

كان بيرفض نفس رفضى..

كان بيقول ثورى يا ارضى...

كان كإنه جوه نبضى..

مره تانيه شفته ضدى...

كان بيلعن جد جدى...

كان بقول حدك وحدى...

مره تالته شفته ضدك..

وانت كنت حاميه بحضنك...

بس وقت الجد قال لك..

انتهى عهدك وودك...

مره رابعه ومره تاسعه..

شفته مره عن يمينى..

مره تانيه عن شمالى...

كان بيهتف..

يا بلادى ...

كله عادى...

يا بلادى...

كله عادى...

لسه بحبك أنا

لسه بحبك أنا...

حافظ هواكى صَمْ..

واعشق جمال اللُقَا..

واشتاق لوقت الضَمْ..

ساكنانى جوه الروح...

فى عروقى ويا الدم...

وان كان فى عشقك نوح..

عمرى أنا ما اهتم..

لم يوم بشكوى ابوح..

لو حتى حشرب سِمْ..

لكنى عندى سؤال...

ياريت ألاقى رد...

عدلك ميزانه مال..

ماعاد بِحِدْ الحد..

طب امتى رح ينعدل..

والقى فى غرامك ود...

وف حضنك السيال..

نرجع هنا ونتلم..

أيوه نسيتك

أيوه نسيتك ما بهزرش ..

أصل عنادك زاد عن حده..

إوعى تقولى ان انا مش قده..

لا يا حبيبتى فوقى لروحك...

عارف بعدى مزود نوحك..

وبيفتح لك كل جروحك...

إوعى تقولى لاء محصلش...

أيوه نسيتك ما بهزرش...

أيوه انا خالى ورايق بالى...

عمر البعد ما غير حالى...

بس بعادى صعب عليكى..

شايف دمعك جوه عنيكى..

لهفة قلبك ..رعشة إيدك..

حبى بيجرى جوه وريدك..

إوعى تقولى ما بيحصلش ...

رحيل جديد ؟؟؟

دنا كنت فاكر انى خلاص ...

رسيت ...

ولقيت لى مرسى يضمنى ...

ويلمنى ...

من بعد طول الاغتراب ...

القاه لشطه يشدنى ...

فجأه التقيتنى فى دنيتى ...

ضايع وحيد ..

موش لاقى دفتر ذكريات ...

موش لاقى سكة أمنيات ..

طب مين أنا ...

أو إيه صفاتى ...

داير بدور عن أنا ...

أو معنى ذاتى ...

أو فين حياتى ..

ولقيتنى راجع من جديد ...

أرحل بعيد ...

لبعيد بعيد ..

بس من غير شنط ..

رايح لفين ...

حرجع منين ...

مافى جواب ...

غير الصدا ..

عبر المدا ..

محمول أنا ...

فى شنطة سفر ...

يا سائله عن عمر البراح ...

فى الغربه تاهت فرحتى ...

وسط التمنى والجراح ...

لكنى مانسيت اللى راح ...

أصل الغريب ...

دايما بعيش ...

والغربه فيه مابتنتهيش ...

مهما يقابل من وشوش ...

ينسى الملامح والرتوش ...

إلا وشوش ما بتتنسيش ...

يرسم بدمعه الف بسمه للزمن ...

يلقى الالم ...

والغربه تبقى سكته ...

هى التمن ...

واما يزيد بيه الحنين ..

للى سابه فى غربته ..

يفتح دفاتره ويفتكر ..

يتمنى يوم ...

تترد ليه حريته ...

من تانى يرحل من جديد ...

مكتوب عليه...

يقضى حياته مغترب...

مكتوب عليه ...

تبقى حياته ودنيته ...

محموله فى ...

شنطة سفر ...

واما الغريب ...

يلقى حبيب ...

من فرحته ...

يهديه حياته ودنيته ...

واما الحبيب ...

يبعد بعيد ...

الغربه تبقى ألف غربه ...

واللحظه تبقى ألف كربه ...

نلقى الغريب ...

دمعه بيسبق ضحكته ...

صمته بيمنع كلمته ...

والكون بيبقى شرنقه ...

متشرنقه ...

والليل طويل ..

من غير قمر ...

من غير دليل ...

والنجمه ما بتهدى السبيل ...

والغريب ...

يفضل غريب ...

هو وأماله محمولين ..

عمر السنين ...

فى ..

شنطة سفر ...

ولما الغريب...

يلاقى الحبيب ...

وينهى فى عمره ...

دروب الرحيل ...

ويحيا الامان ...

وحلمه اللى كان ...

بيوم مستحيل ...

وتحلى الحياه ...

وترجع أماله ...

وعمره اللى تاه ...

ولما الغريب ...

يلاقى الحبيب ...

بلحظه هجر ...

ويلقى القدر ...

يقول له دا حلمك ...

هنا منتهاه ...

وبكره قصاده ...

بقى سكتين ...

عذابه فى سكه ..

وسكة سفر...

ويبقى الخيار ...

مفيش له مفر ...

يلفلف كيانه ...

بشنطة سفر ...

طريقنا ليل

وليه الحزن فى الغربه

مالوش آخر...

وليه الفرحه فى قلوبنا بتتَّاخِر ..

وليه الغربه مكتوبنا ...

مشيناها خطاوى كتير ...

وما تُبْنا ...

وليه الصمت ما بينطق ...

ولا تُصدُق أمانينا ...

غناوينا ...

رموز حرمان ومنقوشه ...

على توبنا ...

تروح بينا بلاد وبلاد ...

وما بنرجع ...

وليه الفجر ما بيطلع ...

بأيامنا ...

طريقنا ليل ..

وبس منين حييجى النور ..

أدام بندور ...

فى شنطة سفر ...

طب فين الأكل ؟

القصر دا من بره يجنن ...

البانى ابدع وتفنن ...

طب فين الاكل يا هلهوله ...

ولا ستقولى لنا يحنن ...

ماذا أعددتى لنا يا هاله ...

جاوبينا من غير رزاله ...

لحم ودجاج مع دندى ...

أم عدس على قد الحاله ...

لا أبغى هاذى الطعميه ...

اصلى بسببها فى أذيه ...

إعطيها لطيبه ولريما ..

أبغي وزه مستقويه ..

هاتى لى محمر ومشمر...

خللينى بسرعه أتشمر ...

أو دندى لما أنظره ...

يجعلنى أطبل وأزمر..

من غيرنا

الراء ما حيبقى فار..

أو إنتى حتبقى قطه ...

حنولعهالكو نار...

فى البق نحط شطه ...

نقطع ليكو اللسان ...

ونقطعكم يا بطه ...

حتشوفونا حيتان ...

ولسانَّا حيبقى بلطه ...

رح نفرمكم كمان ...

ونلملمكم فى شنطه ...

حنخليها جنان ...

وانتو وقعتم فى ورطه ...

يرجع لكم زمان ..

الراء ابو الف شخطه ..

رحترجعوا جرزان...

فى الثانيه تموت بخبطه ...

او تدخلوا مورستان ...

يا عقول مليانه سلطه ... ..

مانتو صحيح نسوان ...

واخدين على الاونطه ...

أما الراءات جدعان...

من أسوانها لطنطا ..

لو عاشوا من غير نون ..

ما حد فيهم وطّى ..

أما انتوا يا نونات ...

من غيرنا يجى لكو جلطه ..

حتعيشى عمرك تستنى

حتعيشى عمرك تستنى ..

كلمه بلسانى اقولها لك..

تبنى فى احلام وحتتمنى...

الكلمه اللى تغير حالك ..

حتلفى ورايا وحتغنى ..

فى الأخر تتهد أمالك..

ترجعى وبخيبتك تتحنى ...

مش عارفه يمينك وشمالك ...

بالليل تتفردى وتِتَّنِّى ...

بالدمع حتحكى اهوالك ...

عن يحيى يوم ما حتستغنى ..

بس انا يا حبيبتى سايبهالك ...

حمشى وحسيبك بترنى ...

ما يفيدك حسنك وجمالك ..

مين قالك ؟

مين قال لك انى بحبك ...

أوهام وكتير عيشتيها ..

أوهامك ساكنه فى قلبك ...

قبل النوم ابقى اغليها..

حطى لها شويه بنجر..

ع الريق بِسْمِ الله خديها..

يمكن م الوهم تفوقى....

ولا لنارك تطفيها..

لن أنس أبدًا سيدتي

لم أنسى ابدا سيدتى...

جدران المرسم والالوان....

لم أنسى آنية الزهر...

أعواد النرجس والريحان...

حتى المطفئة المكسوره...

وبقايا التبغ مع الدخان...

لم أرحل عنهم عن عمدٍ...

لم أبدأ رحلة حرمان...

لكن القدر يداهمنا...

كى يصهر فينا الاحزان...

مازلت على أمل احيا...

أن يرجع يوما ماكان...

مازلت اراكى سيدتى...

فردوس جميع الازمان...

قابعة بحنايا النفس...

ما ضاع هواكى وما هان...

أنتِ

أنتى ..

من تسكن ذاتى قسرا..

من تمسك دفة أيامى قهرا..

أنتى ..

من تُجرى دمعى نهرا ...

أنتى ..

من تستعمرنى عمرا..

تسكننى رغما عن ذاتى ..

من تكتب تاريخ حياتى ..

ترسمنى فوق الجفنين ..

صبحٌ منطوق النظرات ..

ترسمنى فوق الشفتين ...

ثغرٌ مفتون البسمات ..

ترسمنى طفلا لا يهدأ..

يلهو فى كل الطرقات..

أسكنها كطفل متمرد ..

لا يهدأ كل الاوقات ..

تعشقنى عشقاً أبديا ...

تغفر لى دوماً زلاتى ..

تأخذنى بين ذراعيها ...

تُسمعنى أشهى الكلمات ...

مشطورٌ مثلك يا قدرى ..

أحياكِ وأحيا أناتى ..

نصفى أملكه مع نصفك ..

نبضك يتقاسم نبضاتى ..

دمِّى مع دمُّك ممزوجٌ...

روحك مسكوبه فى ذاتى ...

هيا كى نجمع نصفينا ..

فى حضنك تزهو زهراتى ..

لن أحفل

يا هاذى ماعدت حبيبا...

من باعت يوما لا تامل...

ان ارجع يوما لهواها...

او عنها ابحث او اسال...

قد كان القلب لكى المهد...

فاخترتى روايتك الاسهل...

قد كانت غايتك المال...

فعلام دموعك كالجدول..

تشكين العيش بلا حب...

هل كان الحب هو المأمل؟؟؟.

قد رمتى قصرا ورياشا...

وحياة فى الرغد الاكمل...

اسقطى الحب من العقل...

والان ترومين المنهل...

يا امرأة باعت فرحتها...

ببريق الماس ولم تخجل...

يا هاذى الساكنة بقصر...

عودى بدموعك لن احفل...

عيشى بخواء الايام...

فغيومى عليكى لن تهطل...

عودي أدراجك سيدتي

اليوم تريدين الحب...

من بعد فراق ما امهل...

اعلنتى انكى نادمة...

عيناكى بسهد تتكحل...

ما عاد الماس يطمئنكى...

ما عاد هو الحل الامثل...

جاحدة الامس وقد عادت...

تنشد امالا ما اجمل...

قد نسيت حزنى بالامس...

والقلب بدمع يتوسل...

لم اطلب منكى سوى صبرا...

فلعل الامل غدا يقبل...

اخبرتك انكى قاتلتى...

بالهجر فقلتى لا احفل...

يا امرأة رحلت من قلبى...

كى تسكن فى البرج الازهل...

الان تعاودكى الذكرى...

للماضى بلا ماس اسهل..

عودى ادراجك سيدتى...

عودى للقصر وللمحفل...

عودى للبزخ وابهة...

وافترشى السندس والمخمل...

قد عدتى اليوم بماساتك...

فلعل الواقع يتجمل...

يا امرأة قلبى لا يشرى...

بكنوز الدنيا لا اقبل...

عودى لدنياكى سيدتى...

دنياى بلا ماسك افضل...

عودي أدراجك (2)

من كان البادئ بالغدر...
من اعلن انه لن يصبر..
من كان يروم التضحية...
من كان القلب المتحجر...
رحتى للماس بقدميكى...
لكفاح قلتى لن اقدر...
كنتى تريدين السياره..
والفيللا والعيش الافخر...
والخدم ومال فى البنك..
يتنامى دوما لايفتر...
القيتى بحبك فى البئر...
وعشقتى الملبس والمظهر...
اخبرتك انكى مخطئة...
فالحب ان بعتى لايعذر...
قلتى ساشريه بماساتى...
للماس بريق لا يقهر...
ها انتى الان بلاحب..
والماس لعيشك قد اقفر...
تبغين العودة للقلب...
يا امرأة وجهك لا اذكر...
قد غامت صورتكى بعينى...
ماعدتى لى الوجه الاقمر...
عودى ادراجك يا امرأة...
فلغدرك يوما لن اغفر...

قد تجدب أشواق القلب

قد تجدب اشواق القلب....

او ينأى المورد والمنهل...

او تفتح ابواب الحزن...

او تهرب اطياف المأمل...

لكن النور باوراقى...

لن يطفأ يوما او يافل..

تلك الانثى....

تاخذنى....

حيث الحاء وحيث الباء...

كى نغدو....

فى دنيا العشق....

كالشمس...

كالنسمه....

كالماء....

كالزهر الباعث بالعطر....

فى كل صباح ...

فى كل مساء....

إن ضاق الكون...

أو أظلم...

تلك الانثى....

تاخذنى...

كى نغدو..

كالثغر الباسم...

كالحرف الحالم...

كالفجر النابض....

بالاضواء...

الوقت الضايع

راجع أنا جوايا حنين...

ماتقولى ليه حبك راجع...

يا ما شقينا سنين وسنين...

من بُعدِنا شوق ومواجع...

ياللى اللقا بينا موصوف..

إنسى بقى الحرمان والخوف...

خللينا نفرح ويا الفَرْحْ...

اللى معانا كمان راجع...

لا تقولى خلصنا المباراه..

أو جينا فى الوقت الضايع..

وَدْوَدَهْ..

دَوْدَوَهْ..

القلب م الفرقه اكتوى...

تعبان قوى...

كله شجون..

ولا يكون..

واخد ياناس ..

لطشة هوا...

قول يا طبيب..

إمتى يطيب...

ومنين اجيب..

حُقْ الدوا...

وَدْوَدَهْ..

دَوْدَوَهْ..

قول يا فيلسوف..

من غير خجل ...

من غير خوف...

صاحبى اللى كان...

صاحبى زمان..

فجأه لقيته...

سابنى وراح...

رغم الجراح...

رحت اشوفه..

وقت الصباح...

معرفش ليه...

شافنى اتلوى...

وَدْوَدَهْ ..

دَوْدَوَهْ..