ديوان الشاعرة / د. آمال كحيل

أنا باشــكرك
من كـــل قلبي يا أغلى من
روحي وعينيه باشــكـرك
بانت حقيــقتك ليَّــه بـــان
غـــدرك ولكـن ، باعـذرك
قلبك ما عمروش حب يبقى ازاي
ألـــــومـــــك ، واجـــــــبرك
الحب موش كلـمة وحـروف
دا شعور وإحساس مشترك
صدقني موش هاسأل
قســـــاوتك ليه ؟
وإيـــه كــــان غــــــيرك ؟
أنا قلبي حاسس بالهـوان
من كونه عاجــز يهجـرك
دلـوقتي فاض بيه الألـــم
وباقولها ليك أنا باشكرك
أنا باشكرك
!

بقلم
آمال محمود كحيل

سلام نتــــــلاقى يـــوم تاني ؟!
ومــــين قـــالك ها نتقـــابــــل ؟
مــــا بعت الحـــب يــا أنــــاني
لكــن برضـــك أنـــا اســـــتاهل
سقيـتك من حـنـــــاني الشـــهد
وشــــلـتك جــــوه نني العــــين
وبعــد دا كـــله تنسـى الــــــود
وتنكـــر كــــل شــوق وحنـــين
وجــاي تقـول خلاص هامشـي
يـا ريتــك قـلـــت مــن بــــدري
ضــنين قلـــبك مــا يـرحمــشي
ومـا بخلتش علـــيك عــمـــري
وحـبيـــتك ، نســـــيت حــــبـي
قــوام بعت اللي كــان بيــــنا ؟
ودســــت بقســـــوتـك قــــلبـي
وإيـــه مــمــكن يــــرجعـــــنا ؟
ما اظنش أنسى يوم جـرحــك
وموش هاقدر أسامحـك يــوم
صحيح قلبي ماهوش كارهـك
لكـن هابعـــد كفـــاية همـــوم
هـــاداري الدمـــع في عـنـــيه
وموش هاتشــوفني صــدقني
فـمــا تفكـــرشي يـــــوم فـــيه
وتســــأل عـــني ، واعــــذرني
ماعادشي ف قلبي ليك ذكـرى
عشان أشتاق في يوم لهــواك
يــا ناسـي الـــــود والعشـــرة
خلاص بأه روح وربي معــاك

بقلم
آمال محمود كحيل

مستني إيـــه ... ؟

أشياء كتير ما عرفتهاش
لكن النهارده عرفتها
وحاجات كتير ما فهمتهاش
دلوقتي بس فهمتهـا
شفتك خلاص من غير قناع
بعد السنين دي كلها
م القسوة سكنت ليل عينيك
واقدر أقـول حلمي انتهى
قول واعترف إنك هــويت
فيه واحـدة تانية عشقتها
وخلاص لقيت غيري البديل
وجريت قوام على عشها
غـــرتني بـدمـــوع الغـــرام
بإديـَّــه دول جففــــتها
وخدعتني بحــبة كلام
ووعود كتير صدقتها
ورميت شــباكك والســلام
أهي مسرحية وعشــتها
إنهي اللي بينا بالوداع
في عينيك حقيقتك كلها
أرجوك كفاية بلاش خـداع
متقولشي مـوش بتحبهــا
حاسس تملي بالضياع
قلبك معــاها ، وملكـها
الحب بينا خلاص ما ضاع
وأكيد هاتنسى ف قربها
ماهي هيه ليك برالأمان
والخطـوة رسيت عندها
حضن الدفا ونبع الحنان
وشغل عيـــونك سحرها
انا أبقى إيه غير ماضي كان
ولا أبقى إيه غير ضلها
صدقني موش باعتب عليك
مشكلتي وحدي هاحلها
من غير كلام ، إبعد قوام
مستني إيه ؟ ما تروحلها

بقلم
آمال محمود كحيل

لــو تهــون الــــروح علــيه

لــو تهــون الــــروح علــيه
مســتحيل حـــــبك يهــــــون
ليه مين في الدنيــا ديـــــه ؟
يحتــــوي قلــبي الحــــــزين
يمسح الهــــم اللي ســـــاكن
جــــوه مـــني مـــن ســــنين
همســة منـك تحـــيي نبضي
تـلـــتئم كــــــل الجــــــــراح
وبحنــانــك تـــــروي قلــبي
بالمـحبـــــة ، والسـمــــــاح
وبإيــديك بتقــيد شـمــوعي
لـــــو ضبــاب اليـــأس لاح
وان دمــوعي يــوم خانتني
تغــــزل الأحــلام في دربـي
يــا حبيــبي ، إنت عنــــدي
أغـلى من أهـلي وحـبايـبي
مـــــد إيــــدك ليـــه تـــانـي
خــد بإيدي وسيبني أحـــلم
بــــدد الحــيرة ف كيــانــي
خــللي قلـبي ليــك يســـــلم
ضمـــني بنظـــرة عيـــونك
صـحي أشــواقـي وحنــاني
عايــزة أنسى الماضي كلـه
وف عينـيك أعشق زمــاني
وان جرحتك يوم ســامحني
وعــد مني يــا أغـــلى مني
مش هاقولك خايفـــة تـاني
أو أقـــولك مـــرة ســـيبني
بقلم
آمال محمود كحيل

دا برضه كلام ... ؟

يـو سيد اوكي علشاني
ولا بيكـوز يو غلطــان ؟
تبقـاش لايـر ، وأنـاني
سيم سيم لايك أيها مـــان
هاتغني عليه يا صاحبي ؟
إنجلش وفرينش وجـابان
وفـر بأه أول يور ووردز
واتكـــلم إيجيبتيان
إنمـا دونت كـم قـــدامي
تو بلاي دور جنتلمــان
أو إنك ريلي في غرامي
فولنج سنس ألف زمان
تبعتلي ليترز ، وابعتلك
طب أونستلي دا برضه كلام ؟
واكتبـلك ديبلي باحــبك
أون بيبر من سـيلوفان
طب آخــرة ذس إيه ؟ تل مي
سو سوري دا فرانكلي جنان
إف يو وير جد عايزني
فيه داد آند مامي كمان

بقلم
آمال محمود كحيل

ليــه تغـــير ....؟

ليه تغـــير من حـــد تـــاني ؟
وانت أغلى الناس يا عمري
ليه نسـيت شوقي وحـناني ؟
وابتديت تحتـار في أمـري ؟
كـــل لحظة تزيــد في شكــك
ليه ؟ وليه ظلمـك يا قاسي ؟
واتناســـــيت ازاي يا قلــبك
إنــك انــت كــــل نــاســـي ؟
كـل شــيء في الدنيــا ديـــة
دمــعتي وفـــرحـــة عينيـــه
يبقى ليـه تحـــكــم علــــيه ؟
دا اتهــــامــك ظــــلم ليـــــَّه
لو اقــول كلمــة تحاســـبني
لـــو ابـــص بحســــن نيـــة
ألتـقيــــك جــــي تعــــاتبـني
وف عينيــك نظــرة أســـية
مستحــيل أعشـــق حـــبيبي
حــــد غـيــرك ، مسـتحـــيل
يبقـــى تطمـــن يـا غـــــالي
إن حـــبي مالـــوش مثيــــل
تفتكـــر أنســــاك دا ممكــن
ولا عــن دربـــــك أمــــيل ؟
لـــو تحـس بنبـــض قلـــبي
مـوش هاتقـــدر يـوم تقـول
إنـي عنــــك أقــــدر ابعـــــد
حبي مـوش محتـاج دلــــيل
بقلم
آمال محمود كحيل

مـا انت عـارفني ... ؟

أمَّا دمــوعي بتمــلا عينــيه
باجري قوام واشكيلك همي
وانسـى ف حضنك كل أسية
ويزول عني عذابي وحزني
ياللي بقــربك بالقـى الدنيـا
فــرحة بليـل الشوق بتغني
إيــدك دايمًـا واخــدة إيديـه
وعيــونك دايمًــا تحـرسني
قلبـــــك مليـــان بالحنــــيَّة
مين غيره ليَّه بيسأل عني؟
إنت حبيبي ، وضي عينيه
ليه بأه غيرتك ؟؟
مـا انت عـارفني
أنا على بعدك ما اقدر ثانية
صورتك جـوه العين والنني
يبقى اطمــن غيـــرتك ديــه
مالهاش داعي يا هاتجنني

بقلم
آمال محمود كحيل

أما باتعب ...

نفســي الاقـي طـــوق نجـــاتي
من مـاضـيـــَّه ، وذكـــريــاتــي
من مشـــاعــر حــــزن طــاغي
شــاغــلة فكــري وأمســيـــاتي
نفســي أبعــــد عـن همـــومــي
نفســي أهــــرب مـن جنــونــي
أكســــر القضبـــان ، واحــــرر
قـلبي مـن شــــكي وظنــونـــي
نفسي اشوف بعيون حبـــايبي
نظــــرة يســعـد بيهــــا قــلبي
لـــو يجـــور حـــــكم الليـــالي
ألتقــيهــــم بــرضـــه جـــــنبي
عـايشــة لكــن ، رغـــم يأسـي
فيه حاجــات بتدور في نفسي
وامــا باتعــب بالقى مهــــرب
إنـي اقــوللـي يـا بت إنســــي

بقلم
آمال محمود كحيل

آه يا صرخة حق

آه يا صوت شق السكون
العزم جوايا انتفض
آه يا صــرخة حــق دوت
واليقـين منها اتولـد
مهما طــال الإحتـلال
مهما طال بينا الأمد
مش هانيأس مش هانضعف
طول ما فيه صبر وجلد

آه يا لون الفرحة في الزمن الحزين
في دموع فلسطين اللي سالت م العيون
يا ملامح ماضي غاب ويا السنين
في انتظارك كنت مستنية
تمسح دمعتي
وتشيل غبار اليأس ده
عن مهـجــتي
وتحول اللـيل لنهــار
وتقيد بايدك شمعتي
وتدلـني وسط الضباب
على سكتي

آه يا فارس
من زمن عهد البطولة
كنت باحلم بيه وانا
ف عمر الطفولة
قلبه مليان
بالعزيمة والرجولة
شايفة جواك
عزتي ومجدي وفخـاري
مهما ها يطول انتظاري
بيك هاحقـق إنتصـــاري
شايفة في عيونك تحدي
وعـــزم ضـــاري
شايفة حلمي بيك
ها يتحــول حقيقة
طول ما فيه صرخة جريئة
صوت صداها
مالي آذان البشر
طول ما في بايدك حجر
طول مافيك قوة صخـر
طول ما فيك شريان بينبض
طول ما فيه فرسان بترفض
الهزيمة والهوان
موش هاقــول أبدًا في يوم
فات الأوان

بكــرة ألمي دا يبـقى ذكــرى
بكرة دمي دا يروي شجـــرة
بكـرة بنتي دي تبقي زهــرة
بكـرة أرضي دي تبقى حـرة
بكرة يا فارس تحقـق
حلمي وتعيد اللي كان
لما فوق كل الكنايس
والمساجد والبيوت
في الشوارع اللي ضاقت
م المذلة والسكوت
ترتفع راية انتصارك من جديد
والأقصى لصحابه يعود
والفرح يملأ من جديد
كل الوجود

بقلم
آمال محمود كحيل

آسفة جدًا ...

آســفة جــدًا
غصـب عني موش بخاطري
شيء دفعـني ف لحظــة إني
أجــري واهـرب من جــديد
شيء أكيد كان أقـوى مني
أقوى من قلبي ومشاعري
صـــوت عـنيد
صحى دمعي وذكرياتي
خد معاه فرحة حياتي
والتقيتني ف لحظة بانسى
إن حضنك ليه مرســى
وان قلبك هــوَّه عشــي
وف عينيك أحلامي لسه
رغم خــوفي ، ما انتهيـتشي
سيبني أرجوك سيبني أمشي
آسفة جدًا
آســـفة جدًا لـــو جرحتك
وبقساوتي ف يوم آلمتك
عــارفة اني قتـلت حلمـك
وانتهــت ويــاك حكــايتي
كــان منايـــا ، وكـل همي
أبقى جنبـــك ، زي ظـــلك
وازرع الضحكة ف عيونك
وازرع الأفـراح بدربـك
لاجل احس انك حبيبي
رغــم أحــزانك سعــيد
لـو تصـــدق
كنت باغرق
شيء بعدني ف لحظة عنك
خــدني مني وخـــدني منــك
والأمان غاب عن عيـوني
لاح شبح خوفي وظنــوني
إن قدرت ف يوم سامحني
دا المقدر ، والنصيب
ألف ســور بينك وبيـــني
والعناد اللي ف عيـــوني
كل يـوم عن يـــوم يزيــد
هاطوي حبك
بين ضلوعي
وافتكر وانا بين دموعي
إنك انت حـــــلم عمــري
اللي موش ممكن يعـــود
أيـــوه من حقــك تلومني
بس أرجوك ما تساومني
إنت أغلى يا حبيبي
عندي من كل الوجـــود
أرجو تقبل مني عذري
كل دا كان غصب عني
آسفة جدًا

بقلم

آمال محمود كحيل

فلسطيني

فلسطيني ، ودمي يهــون
عشان بلدي
واضحي بروحي وبنفسي
واضحي بأهلي وبولـــدي
وما اقبلشي أكون منهان
واطاطي ف يوم
لكلب جبان
يدنـس بيتي ، أو أرضي
ولاجل م عرضي دا ينصان
هاكون دايمًا في كل مكــان
واوصــل صـوتي زي أدان
لكـــل الناس
فلسطيني ومش هانداس
في يـــوم واركع
ولو كان التمــن غــالي
أبيع عمري ومش هاخضع
ولا هاقبل اكون محكوم
وهاتصــدى لأي هجـوم
وأتحــدى نعيـــق البـوم
واسجل في التاريخ اسمي
فلسطيني فلسطيني
فلسطيني

بقلم
آمال محمود كحيل

موش حكاية ...

غصب عنك ؟؟؟؟ ولا كانت
لحظة من لحظات صدودك
لـيه مشــاعرك عني مـالت
لــيه بقيت رهــن لقيـــودك
إنت فاكـــر إن بعــــدك
عني هايطيب جروحـك
ولا فاكـــر إن صـمـتك
يوم ينوب عن شهد بوحك
كل ما اســأل ليه دموعــك
ليه تــداري ســـر نوحـــك
ليه بتصـــدمني بقســاوتك
لـــيه بتئلمـني بعـــــزوفـك
أما اقرب ليه بتبعد ؟؟؟
ليه بتحجب عني طيفك
واما اقولك بوحلي فضفض
ليه بتتـدارى بسكــوتك
لو عايــزني أكـون ضحـية
قلب مـــوتــه بشكـــوكـك
يبقى إرحل موش حكاية
واطوي حبي بين ضلوعك
وان نويت تكتب نهـــاية
للي بيـنا مـوش هابيــعك
قلبي مخلص رغم ظلمـك
أيوه مش طالب رجوعك
إنسـى إنك قلتهــالي
وافتكر إنك يا غالي
شلت اسمي من حــروفـك
شلت قلبي من ضلــوعــك
كان منايا ف يوم أشوفـك
أقوى من ضعفك وصمتك
أقوى من شكك في صدقي
أقوى من عجزك وخوفـك
غصـب عنك ؟ ياه يا قلبك
برضه جي تقول ظروفك؟

بقلم
آمال محمود كحيل

قصدك تهجر ولا تفارق ؟

قصدك تهجر ، ولا تفارق ؟
هنت عليك وبقيت مش طايق
حتى كلامي ، حتى سلامي ؟
وبقيت تتنكر لغــرامي ؟
كل وعــودك ليّه نسيتها
ويا ريت حتى جروحي داويتها
دانت يا غالي
كنت حياتي ، وكل آمالي
كده في ثواني
بتبيع قلبي وذكرى ليالي
؟
ألف خسارة يا ألف خسارة
كده بتقولهــا بكل جســـارة
إنك بايع ، إنك ناسي
قلبك قاسي ، خان إحساسي
حتى عينيك خاينة وغـدارة
إيه اتغير ؟ إيه اتبدل ؟
إيه خلاك مش زي الأول
أنا محتارة أنا محتارة
بس ارجع واقول معلشي
ربي يسامحك
ربي يسامحك
!

بقلم
آمال محمود كحيل

كان إيه ذنبي ؟

جـرحي بيهتف جــوه ضلــوعي
دمـي بينـــزف نهــر دمـــوعــي
ما بقيتش اعــرف رايحــة لفين
أو جاية منين
وما بين حيرتي وصمتي وشكي
قلبي بيصرخ ، وسـاعات بابكي
وباتـوه واغـرق في بحور يأسي
وارجــع تاني ، أعــاتب نفســي
طـيب قـــــوللي يـا مهجــة قلبي
إزاي هانسى عــــذابي وبؤسي ؟
حـيرتي وخــوفي وضلمة دربي
يانا يا غلبي
قلبي مـــرار الهجـــر ســـقيـته
صــرح هـــوانا قــــوام هــديته
بعــد مـا كنت انت اللي بنيـــته
كان إيه ذنبي ، إيه اللي جنيته
؟

خــلاص ماشي ... !

عايز تنهي اللي كان بينا
ونرجع تــاني زي زمـان
ونقفل باب على الماضي
وتغصبني على النسـيان
وبتقـوللي نجــرب ليـــــه
وبتساوم ع شيء حاصل
ما بعت هوايا واستغنيت
وإيه م الحــب دا فاضـــل
حروف كانت بدون معنى
وموش م القلب يا خسارة
وكنت افتكــره فعلاً حــب
أتاري عينيك دي غـدارة
ولحظات ياما كنت معـاك
باعيشها بكــــل إحساسي
وكنت الخـــــل والصاحب
لكن قلبـــك صبـــح ناسي
وجــاي تقوللي يــا قاسي
ما فيش أحــــلام بتجمعنا
وسكتنا خـــــلاص ضـــاقت
ما عادشي براحها بيساعنا
خلاص قررت يـــــاغــــالى
تشوف حالك واشوف حالى
يـا وهـــم بنيته في خيــالي
كشفـت حقيقــــته طــــوالي
وإيـه فـــاكر راح اتـــرجاك
واقول ما اقدرشي
أنسى هــــــــــواك
واني عشـقـــت مـن قلـــبي
وكــــــان ذنــــبـي
بطيـــــبة قلبي صـــــدقــــتك
يا ريتني ما كنت يوم شفتك
ولا عرفــــــتك
ولا عشـقــــتك
هاتمشي خلاص ومش راجع
ولازم أرضـى بالـــواقـــــع ؟
هاقــولك إيــــه
ما فيش مــانع
وموش هاسأل إيه الــدافــع
عشان عارفاك ما حبيتنيش
لكن وحـــــياتي تكســـفنيش
طلب واحد وغيــره ما فيش
مـا بين الوقـــــت والتـــاني
في قلبـــك خـللي عنــــواني
جايـــز تشتـاق لأحضـــاني
جايز ترجعـــلي مـن تــاني
بلاش كلمة وداع أرجـــوك
وسيبني ف وسط أحــزاني
راح انسى ومش هافكر فيك
وهاطـــوي بقلـبي أحلامي
خــلاص ماشي
خــلاص ماشي
بقلم
آمال محمود كحيل

وإيه تاني ... ؟؟؟

وليه تاني ؟
أقولها مانتي عارفــاني
لا عمري ف يوم قصدت اجرح
مشاعرك رغم أحزاني
ولا ف يــوم جيت ، شكيت منك
برغم ان انتي بايعاني
قسيتي عليه واتحملت
وطال صدك وحرماني
نصــيب مكتــوب عـلى جبيني
أحـــبك ، وانتي تنســيني
وجــاية كمـــان تعاتبيني
خلاص قلبي بقى الجاني
وإيه تـــاني ، وإيه تـاني
؟؟؟
بقلم
آمال محمود كحيل

إوعى تقـــول إنك حبيــتني ... !

إوعى تقـــول إنك حبيــتني
إزاي اصدق وانت نسيتني
حب دا إيه اللي يخلـيك
تظــلم قلب اتعــلق بيك
ليه خليتني ف همي وحيرتي
بعتني غـــــدر وكنت شـاريك
بس يـا روحـــي تصــدق إني
مليت من طول صبري عليـك
دانت حقيقي طلعت أناني
كـداب خـاين إيــاك تــاني
تســـتعطفني وتترجــــاني
علشـان أفضل رهن إيديك
تبت خلاص حرمت أحـبك
ولا هاتمناش فرحة قربك
نار البعد تهـــون ولا إني
أفضل شاعرة بحسرتي جنبك
وان كان قصدك بقى تقنــعني
إني ارجعلك ، يبقى دا بعــدك
أرجوك سيبني ، وابعد أفضل
قلبي قــــــدرعــــنك يتحــــول
وانا ما بقيتشي حقيقي باحبك
ولا باشــــتاقـــلك ، زي الأول
ولا يوم هابكي عليك صدقني
مهمـا سنين الفرقــــة تطــول

وليه أندم ؟؟؟

تعبت كتير وفاض بيّه
وليل ونهار
باحس بغربـــة جـوايـا
ولسعة نـار
وليه أندم على حكايــة
وليه أحتار ؟
وقلبي كتبلها نهاية ؟
وخــدت قـرار
خلاص هانسى وراح أقسى
وموش هانــدم ، ولا اتحسر
ياما الأحـــلام بتتكسر
ياما الإحساس بيتغير
خلاص مليت وصبري عليك
لا هايقدم حبيبي معاك
ولا يأخــــر
تعبت كتيرمن الحيرة وم التفكير
ومن لحظات عتاب أو لــوم
وخوف وهموم
وانا المحروم جافاني النوم
وإيــــه ذنبي ؟ أبــات ليــلي
أعـــــد نجــوم
وأســـتناك تجيــلي ف يــوم
تشـــيل الحـــزن مـن دربـي
وتنـــزع شـــوكـه من قـلبي
وتشــفي الجـــرح جـــوايــا
وآخـــرتـها أقـــولك إيــــه ؟
واعاتبك ليـه وهايفيد إيه ؟
عشان خاطــري ما تزعلشي
وما تلومنيش وسيبني امشي
ما هاقدرشي ما ينفعشي
أكمــِّـــل رحــلتي ويــــاك
وصدَّق مستحيل أنســاك
وموش ممكـن لكن فعـلاً
تعبت كتــير، تعـبت كتير
أشـوف وشـك بكل الخير

وما يهمش ... !

وما يهمِّش
في شرعك تنصف المظلوم
ولا تلوم ع اللي كان جاني
ولا عرفتش
تبرأ _ للأسف _ محكـوم
وفته ف سجنه بيعاني
ما فكرتش بإن هنــاك
بريء موصوم
وكان أمله للحظة تكون
نـزيـــه ويــاه وحقــَّاني
طعنته بمنتهى القســوة
وبعــت الحق بالباطـــل
وبتراوغ في حق الغـير
وبتــلاوع ، وبتماطــــل
ولساك برضه يا غرورك
بتستأسد على الحملان
؟؟؟
زمن غدار مالوهشي أمان
وكون موبوء بمليـون داء
خلاص كل العقول طاشت
ورا الأهواء
خداع ورياء
وخبث وزيف وياما نشوف
عيون غايمة ووشوش
فيها الجشـع مكشــوف
نفوس ظالمة نفوس خاوية
ما تعـرف حتى كلمة خـوف
بتتهافت على الدنيا
وهيه لمين كانت دامت ؟
صحيح فانية ، صحيح فانية
وآه يا ضمير ندهت كتير
وصوتك ضاع بين الأصوات
بتصرخ ليه ، بتنده مين ؟
بشـر جوه القبور أموات ؟
قلــوب الناس بقت غـارقة
في شبه سبات
وضرب خيـال وشبه محـال
في عصـر المــادة يتصــلح
يا قلبي الحـــال
يا ريتني ف يوم ألاقي دليل
ونص صريح
يقول إن الخداع والظلم
شيء مسموح
يبيـــح الكـــدب ويحـــرَّم
معاني الطيبة والإخلاص
يديـن الــود والإحســاس
ما بين الناس
هاتولي دليل
عشان أقدر أحوش دمعة
سالت فوق خــدي
تشـكي الويـــل
عشان أقدر أقيد شمعة
تنور ليَّه عتمة ليل
واشوف من تاني كون تاني
فيه الرحمة بقت وصمة
فيـه الطيبــة بقت نقمــة
يا نار قايدة
في وسط التلج ليه قايدة ؟
ما دام القسوة في الدنيا
بقـت ســـايدة
ما فيش فايدة
ما دام أصـبح
لوش الظلم ألف قناع
وألف لسان
ما دام نبض الملل فينا
قتل أجمل معانينا
وتهنا وخلف أطماعـنا
هـدرنا البر والإحسان
وآه يا زمان غريب خوَّان
فيه الإنسان
صبح قلبه حجر صُوَّان
ما فيش فايدة
ما فيش فايدة

بقلم
آمال محمود كحيل

ما فيش فايدة ... !

تعبت وفاض بهمي الكيل
عانـدت كتير ودقت الويـل
وشال الكتف يا ما حمـول
وخانني القول
بقيت محتارة بين إني
أكون وسط الديابة دي غـول
يا أهرب خلف شيء مجهول
لكن معقول
أعيش بينهم وحاسة بقهــر
أغمض عيني واستقبل
سهـــام الغـــدر
ومن غـير حتى
ما اشكي ف يوم أواتكـــلم
هاتــولي الصــبر يا عـــالم
خلاص موش قادرة أتحمل
باقـــولهــا وقـلبي متــألــم
ودمعة ف عيني مخنـوقة
بحبل الهــم
يا ريت أقدر أخون نفسي
وأتنكــر لصـــوت الحــــق
عشان أقدر ، أكون منهم
واصـــدق إن دا المنطـــق
أعيش بينهم ، ووسطيهم
وأرضى بكل شيء ممكن
هايرضيهم
ولو أخسر ضميري ف يوم
دا شيء عادي
ما دام غيري سعيد راضي
يا ريت جوايا يتغير
وأتحــول لكتلة شــر
عشان أقــدر في يوم أفهم
بإن خلاص ما فيش فايدة
ما فيش فايدة

بقلم
آمال محمود كحيل

طـول ما قلوبنا الحب ماليـها

طـول ما قلوبنا الحب ماليـها
يبـقى نمــــد إيديــنا لبعــــض
ونصون عهد الحب ونخلـص
مهما تطول مسـافـات البعــــد
وبإمكــانــا نــداوي جراحـــنا
ونعــانق بالشــوق أفــراحــنا
رغم آلامـنا ، ورغم دمـوعـنا
يفــضــل حبـــنا شجـــرة ورد
وان تاهت خطـوتنا ف ســكة
هايجمَّــعـنا الهـــوى والــــود
بقلم
آمال محمود كحيل

حتى الأمل مابقاش كمان من حقنا ؟

حتى الكلام
أصبح ما بينا مستحيل
وبرغم إن القلب فيه
مليون دليل
أيوه الظروف حكمت وكان
إيه البديل ؟
غير إننا ف لحظة ذهول
نهرب ورا الحلم الجميل
وخزة ندم وأدت حنين
كان في العيون ساعة الرحيل
تاهت الحروف
حسيت بخوف
دقات طبول ، حزن ومرار
حال انتهى بينا الحوار
والدمع فار
زي السيول
مليون سبب مليون جدار
هايحول ما بين
نبض القلوب
حُكم القدر كان منتظر
ولا بد نقبل بالنصيب
واحنا البشر
إيه اللي نملك نعمله ؟
مشــوار لا بــد نكمـــله
رغم الألم ، رغم الدمـوع
جوايا حزن وخوف سكن
مني الضلوع
ندمانة أيوه لكني
خايفة من الرجوع
ما تلومشي ضعفي وطفي ويايا الشموع
دا ما كانش ودي ف يوم أخون
أو يوم أبيع
آه يا زمن ضاع مننا
سرق الفرح من عمرنا
ليه الفراق ؟
يكون نهاية حبنا
ليه النهاية تكون رحيلنا وبعدنا
ليه الرحيل
يهزم أملنا وحلمنا ؟
إيه ذنبنا ، إيه ذنبنا ؟
حتى الأمل
ما بقاش كمان من حقنا
؟؟؟
بقلم
آمال محمود كحيل

عيني ف عينك

عيني ف عينك
تقدر تنهي ما بيني وبينك ؟
لا يا حبيبي دا متهــيألك
أنا قدرك فوق سطر جبينك
ولا تكون بتشاور عقلك ؟
موش هاسمحلك
دانا جواك أقرب من نفسك
قمـرك شمسك بردك ضــلك
بسمة فرحك رمش جفونك
لـو فكرت ف يوم تهجرني
ولا تخـــوني ولا تبيــعــني
يبقى يـــا ويــلك
مش ها تشــوف
نجماية ف ليـلك
وأكـيد راح تشـــتاق لزمــاني
والسهــد يحاصــرك وتعــاني
وهاتغرق في بحـــور ظنونك
وهاتتمنى لــو ارجـــع تــاني
وأسامحك وف لحظة اجيـلك
موش مغرورة لكن صــدقني
عمــرك ما هاتقــدر تفـارقني
أو تنهي اللي ما بيني وبينك
طب يــا حبيبي أهو ووريني
عيني ف عينك
عيني ف عينك

بقلم
آمال محمود كحيل

شوف يا حبيبي

شوف يا حبيبي
بجــــد حـقيــقي
عمري ما كنت كتاب مقفـول
واللي ف قلبي وجوه ضميري
بيبان في عنيَّه عـلى طــــول
من غير ما انطق كلمة احبك
ولا اصـــرَّح بيهــــا واقـــول
دانت نصيبي وقسمتي قدري
وانت حياتي وفرحة عمـري
وانت أمــل عايش في كياني
وحــلم جميــل
كل كلام الحب ما يقـدر
حتى يعــبر ولا يصـور
صدق مشاعري وعـندي دليل
إهـــدا حبيبي واقــرا حـروفها
واتهجـــاهـا بلســان قلـبك
حِس بلهفـة قلبي لقــــربك
حِس بلوعة شوقي ف بعدك
شـاغل عقلي تمللي ودايمًا
شايلاك جوه ف حبــة عيني
يبــقى اطمــن إني بحــبك
دا هواك أملي وحلم سنيني

بقلم
آمال محمود كحيل

ما تقولشي اشمعنى

من إمتى كان البعد
بيفـرق الأحبــاب ؟
تفضل معاني الــود
بتقــــرَّب الغيَّــــاب
والذكـــرى تحييـهم
تحـيي الأمــل فيـهم
تنزع هموم الروح
وتفــــتَّح الأبــــواب
تلـقى الوجــود جنة
مليــان شجر حنـــة
ما تقولشي اشمعنى
دا لكل شيء أسباب

على قــد ما بتـــزرع
من خير وتدي حنين
الحـــلم ها يرعــــرع
جـوه القلوب بساتين
والخطــوة لو ترجــع
بالعمــر قــبل ســنين
ها تـلاقــي ســـــكتها
مليــانة بالعـاشـــقين
وتحس نبض الشوق
جـــوه القلوب غلاب
ما تقولشي اشمعنى
دا لكل شيء أسباب

بقلم
آمال محمود كحيل