ديوان الشاعرة / د. آمال كحيل

سـلامتك يا غالية وروحي فداكي
ولو كـان بإيدي أشـاركك أسـاكي
وأطبطب عليكي واداوي الجـراح
واضــلل عليكي ، واضم الجنــاح
وأمسح دموعــك يــا أوفى البشر
وانور شـــموعك في ليـل الســهر
مكانــك في قلبي وجـوه العـيــون
وباتـرجى ربي العليــم بالشــؤون
يخـــفف آلامــك ، ويمـحي الأنيـن
ويشفيــكِي ربي ب (كن فيكــون)

بصيت لقيت
في مرايتي بصمـات الزمن
فاضت دموع العين
وغشَّاني الوهن
وسألت نفسي يا هل ترى
حان الأجـــل ؟
ولا يا دوب
أيـــام
وينســاني الزمــن ؟

إياك تطاطي ف يوم لريح

طيب يا صاحبي وللأسـف
مصدوم ، وخايف تعترف
إن الحياة كدب وخـداع
إن البشر بقلوب خزف
دا الصدق مات جوه النفوس
والحب بـات مهـــزوم تعيس
موال حزين وبيتعزف
لكـنه ما يمسش وتــر
ولا في الصدور بيسيب أتر
يــا للأســف
مليون أسف
أصبحت في الدنيا دي طيف
والكون غريب شكله اختلف
دمعك سكب حــزنك حـروف
والقلب في همومه انجــرف
إيــه اللي فاضــل غير أمــل
جــواك لكن ضيـُّـه اتخسـف
لساك بتحلم بالوصول
لساك بتؤمن بالصدف
طاوي الجـراح جـوه الفــؤاد
والدمــع عن ســـرك كشـــف
والخطـوة تاهت في الدروب
والوجهـة شـــتت عن هـدف
رايح لفين يكفاك هـروب
دمــك بيسأل ليه نــزف ؟
الظلم داس فوق الرقـاب
والعــدل ميزانه انحرف؟
ما الأقنعـــة فـوق الوشــوش
ووراها ضــاع معنى الشرف
والخــوف بيطـــرق كـل بـاب
واليأس في دروبـك زحـف
حتى الأمل أصبح ســـراب
حتى الحياة صبحـت ترف
لساك بتجري ورا الظنون
لساك يا صاحبي بتتكسف
وردك دبـــل فوق الشــجر
من قبــل حتى ما يتقطـف
فوق من سباتك اصحى قوم
إوعـــاك تســـلـِّم أو تقـف
إيـاك تطاطي ف يوم لريــح
إياك تكون مرمى وهدف

كذبة صدقتها

قـد كــــان حبــك كـذبـــة صـدقتهـــا
بخيوطهـــــا أوهمـــت قلبًـــا خاليـــا

فـإذا بـــه يســعـى إليــــك كظـــامـئ
يرجـــو ارتواء من كـؤوس خاويــة
همـس الشـــفاه تناثـــرت أصـــداؤه
وبــدا قـناعـــك لـي رخيصًـا باليـــا
كـف امتهـانًـــا لـي فلســت بطفلـــةٍ
إني مللت من الوعــــود الواهيــــة
لا تمتهن بالزيف صدق مشـاعـري
ما اخــترت حبك يا حبيب طواعيـة
ولتمـــض في درب العـنـــاد فإننـي
حقًـــا يئســت ، ولـم أعـد بمباليــة
هـذي جـراحـــاتي أســلـت دماءهــا
هـذي شـــكـوكـك لا تكــف تماديــــا
أرجوك دعني مع همومي وانسـني
وانـس أنك كـــنـت ســــــر شقائيــا

فيه لسه بالإمكان

فيه لسه بالإمكان
تزرع أمل أخضر
ترويه بدمع الشوق
والحــلم يتفســـر
وتعوض اللي فات
م العمر لو تقـدر
طول ما القلوب بتحب
لا بد تتعــانق
والبعد مهما يطــول
الشوق يكون سابق
تتآلف الأرواح
واللهفة تجمعها
والقلب دقاتـــه
ع البعد تسمعها
مهما الزمن قسيت
أيامـــه وســنينه
الخطوة هاتجيبه
إياك بقى تلومــه
طبطب على جراحه
كفكف دمــوع عينه
خبيــه في نن العـين
لو شفته يوم حيران
أو ضمـه بكفــوفك
لو كان في يوم بردان
وازرع في ارض الخوف
بذرة أمل وأمان
وان كان هـواه محفوف
بالدمـــع والحرمــان
فيه لســه بالإمكــان
تلقـاه في يـوم جالك
و ف إيده غصن حنان
كلمات
آمال كحيل

قلوب صماء

قلوب صماء

مـا أصعــب أن تغــزل حلمًــــا
بـخيــــوط اليــأس الســـــوداء
أن تمكث في الـــركن وتـــرثي
ســـنوات المــاضي الحمقـــاء
أن تـخصِب بالدمــــــع رمــالاً
تفـــترش أديــــم الصحــــراء
أن تســـقط أوراق حيــــاتـــك
مـــا بيـــن قــنـــوط ورجــــاء
أن تـرقب فجــــرًا لــن يولـــد
مـــا بيــن ذراعــيِّ مســـــــاء
تصـــدأ لحظـاتـــك في مــــلل ٍ
ويقهــقه ليـلك في اسـتهـــزاء
مـــا أصعــب أن تغفـــو حينـاً
لتفــــيق عـلى أنــات بكـــــاء
أن تلمــــح ظــــلك يتـــــلاشى
مــــا بين خطـــاك البلهــــــاء
أن تعصــب عينــيك وتمـضي
وتودع آلاف الأشـــــــــــــياء
ماضــــيك ودابـــــــر أيـــامك
حـاضرك وتبحث في الأنحاء
عـن أمــل غـــاب وعـن لحـن
غيَّبَه الصمـــت مـع الأصـداء
مـا أقـسى أن تئِـــدَ الفــرحـة
في قـبر مـع بضــعة أشــلاء
تسـتجــدي لحظـــات هنــــاء
مــن راحـــة زمـــن جـدبـــاء
يقتــلك الخـوف ، فلا تحـظى
إلا بقـــــــلوب صـمـــــــــــاء
ما أقـسى أن يغـــدو صـدرك
مثـــوىً لدمـــوع التـعــسـاء

بقلم
آمال محمود كحيل

لو حروفك

تكسب يا شاعر
لو حروفك
تبقى قادرة تكون رسول
تسري جوه القلب
وتخاطب بإحساسها العقول
تفتح بيبان المعرفة
وتعدي جسر المستحيل
تطلق طيور متكتفة
وجناحها كان مكسور ذليل

تكسب يا شاعر
لو نزيف قلمك يعافر
وسط صحرا الأمنيات
يرسم آمال تاهت ملامحها
في درب اليأس
واغتالها السكات
وتعيد براءة حلم كان
طاله الزمان وصبح رفات
وخيوط نهار
وسط الضلام اتسحَّبت
لحظة ذهول

تكسب يا شاعر
لو تكون الكلمة
همسة تهز في صدورنا المشاعر
لما تحيي جوه قبر الصمت فينا
ألف معنى وتبقى حاضر
لاجل تخلق نبض تاني
بين ضلوعنا
لاجل تغزل بسمة بيها
ننسى أحزاننا ودموعنا
أو تكون بلسم يداوي
كل أناتنا ووجعنا
ولخطانا ف كل درب
تكون دليل

إيه يا قلم ..

ارسم حــروفك ع الــورق
نبض لقلـوب فيهــا الأنين
واـنزف همــومك ع الوتـر
تعـزف بشوق موال حزين
في الليل بيصـرخ يا وطن
ينده بصوت يحيي الحنين
يوصل صــداه عبر الزمن
يدخل قلوب متشرنقة
يلمس نفوس متشوقة
ويسيب أثر
زخــة مطر
تروي الحيارى الظمآنين
يا هل ترى
سامع ندايا وشكوتي ؟
مرت سنين
وانا لسه غارق في الشجن
بين الدروب
وباداري حزني ولهفتي
وأنا الغريب
سكنت عينيه نظرة ألم
وخيوط أسى ودموع ندم
لحظة هروب
نسجت لقلبه ميت كفن
دفعـت تمن
حلمي اللي ضاق
ويا المحن
آه يا وطن آه يا وطن
آه يا وطن

كلمات
آمال كحيل

خطى الأيام

تباعدنا مسافاتٌ
وتنأى بالجسوم خطى الأيام
والأحزان والضجــر
ولكن الحنين يظل مشتعلاً
بقلبينا كما الجمر
يطول البعد والذكرى
على الأيـــام تصـحبنا
تشد صـدورنا للأمس
للمــاضي ، ولا تــذرُ
وأفئدة بليل السهد
حائرةُ معذبةُ
يعيث بها جنون الشوق
واللحظات ، والصور
وما زالت تنادمنـا
أمان ٍ لم تفارقــنا
وأحلام غزلنـــاها
وبارك غزلنا القدر
ولا زالت
خيوط الحب تجمعنا
على أمل ٍ
ولا زال الهوى
في القلب - واحرَّاه -
يستعر

بقلم ـ آمال كحيل

يــــا رب

يــا حـــارس كـــل خطـــواتي
يـــاعـــــــالم كل ســــكنــاتـي
يـــا ســــاتــــر كـــل زلاتــــي
وكــل مســاوئي ، وعـيـــوبي
نــاجـــيتك ربــي بــدمـــوعي
يا داري بخــوفي وخشوعـي
تــهــــدِّي بالأمــــل روعــــي
وتغفـــر خطئي ، وذنــوبـــي
كريم كرمك مالوهش حــدود
بفقــري إليك تملــي باعــــود
ومـن فـضــلك عليَّه تجـــــود
وبتحـــقق لي مطـــلـــــــوبي
بـــاحـــبك حـــب وجـــــدانـي
بيجــــري ف دم شـــريـــاني
ويغســــــل كـــل أحـــــزانــي
ويبــدر فـرحــــة فــي دروبي
يـا رب امنحـني رضـــوانـــك
وداوي الـــروح بإحســــانــك
أنـــا محــتــاجـــة غفـــــرانك
يطهـــَّر م الدنـــس تــــوبـــي
يــا رب افتحلي باب رحمـــة
ونــــوَّر قلبي في الضــــلمــة
ونـجِّــــــيني مــن الغـــمـَّــــة
دانـا محتــــــاجـة إحســانــك
يـــا رب الدنــــيا غـــــرِّتــني
لــدرب الغـــيِّ ، شــــدتـــني
ونفســـي اتـنـكـــَّـرت مــــني
فجيــتلك طالــبــة غــفــرانك
ما فيش غيرك هايرحــمـني
ومـن حيــــرتي يخــرَّجـــنـي
بانــــادي ، وإنت سامعـــني
ودمـعي ف عــيني يترجـَّـاك
يا رب اغفـر لي يـــا تـــوَّاب
أنـا عبــدك ، بادق البــــــاب
ســـامـحني وهيـَّـأ الأسـبــاب
ونـوِّلـــني الأمـــل بـــرضــاك
يــا رب ارحــمني يا رحـمان
وطــهــَّر قلــبي م العصـــيان
ونــــــوّر روحـي بالإيمــــان
وبلــغــني نعـيـــــم رؤيــــاك

تساؤلات

أمي إذا
جاءت تقول ليَ ابنتي :
أين السبيل ؟
ماذا أجيب
وكيف أشبعُ
في حناياها الفضول ؟
كيف أفهمها
حقيقة هذه الدنيا اللعوب ؟
كيف أفهمها
نوازع هذه النفس الملول ؟
كيف أحميها وقلبي
ملؤه الشك اللعين ؟
أمي إذا
أخبرتها
أن المرايا خادعة
أن الحقيقة قد تكون مقنعة
أترى ستجفل أم تراها
لن تصدق ؟
أترى ستسخر بي
وترفض كل منطق ؟
أم أنها
ستشيح عني في نفور وجهها ؟
أم تتهمني بالسذاجة والغباء ؟
وتسير في درب الحياة وخلفها
أشلاء قلب ٍ حطمته يد الشقاء
أمي إذا
عادت إليَّ ودمعها
فوق الخدود
ورنت إليَّ بنظرة
تشكو عذابات الوجود
أألومها ؟
أألوم ضعفي من جديد ؟
أأعاتب الأيامَ هل يجدي العتاب ؟
أماه كيف أزيل حيرة قلبها ؟
أماه كيف إذن
أخفف ما بها
وأنا التي يا طالما
جدفت في بحر العذاب ؟
وأنا التي
زلت وأغراها السراب
وأنا التي
ما زلت أغرق في الضباب
أمي إذا
لاذت إلى حضني ابنتي
إن عانقتني ذات يوم
كيف أخنق دمعتي ؟
كيف أمنحها السعادة والأمان ؟
كيف أمنحها الشعور بالانتماء
كيف أخبرها بأني ذات يوم
كدت أسقط في دياجير العناء ؟
أن صوتك قد دعاني
فالتفتُّ إلى الوراء
قد كنت أنت فأين أنت الآن يا
معنى الوفاء ؟
قد كنت أنت فأين أنت الآن ؟
في أعلى سماء
قد كنت أنت وويح قلبي
لن أكف عن النداء

بقلم
آمال محمود كحيل

قالب الثلج

يا موصــد الأبـواب في وجه الهوى
أتبــلد الإحســاس أم مات الشعور ؟
قـــد بـتَّ ليـــلك هادئًــا ، متجـــاهـلاً
آهـــات صــبٍّ خلف بابـك يســـتجير
يــــا قـــالب الثــلج الذي لا ينصــهر
يا بائع الأوهـام ، قل لي ما المصير
في درب حــــبك قد تركــت ضحـــية
تبكي فهــل ، لبكائهــا اهتز الضـمير
أم أنت تزهــــو بانتصــارك باســــمًا
وتمــــوج في عينيك آيــات السـرور
فاهنــــأ إذن بعذابهــــا إن تســــتطع
أسدل على الماضي ستارًا من حرير
وافخــر بكــونك قـــد كتبت نهايـــــة
لحكايـــة القلب المعـــذب في سطور

بقلم
آمال محمود كحيل

وما بين رماد الأمنيات
بقلم
آمال محمود كحيل

وهنـــاك
في أبعد ركن قعدت وحدها
تلعق جراحها
وتشكي قلة بختها
والدمع كان بيفيض سيول
على خدها
والآهة كات من غلبها
بتشق صمت الليل
وتحرق قلبها
خنقت همومها ف صدرها
واتشرنقت جوه السكات
جيت جنبها
اتسمرت نظراتها حسيت
إن شيء جواها مات
هوا الأمل ولا الأمان ؟
ولا الحنين والذكريات ؟
شهقة ندم
وما بين رماد الأمنيات
رحل الألم
مات الحنين ، سكت الأنين
والحلم للأسف اتوأد
ويا الشجون
والدمعة جفت للأبد
جوه العيون
ما بقاش هناك غير قبرها
يشهد بواقع إنها
كانت بتحلم وانتهى
بين يوم وليلة حلمها
لحظـــة جنون
صمت وسكون
ودموع روت شجرة عذاب
من غير غصون
بجدورها شقت في التراب
نفق الحنين
صوت ناي حزين
بينادى ، والصمت اللعين
صادر صـــداه
جوه ف قلوب العطشانين
مــيت ألـف آه
لمـــا الحـــياة
تصبح مجـرد
حلم تطويه السنين

سـقط القــناع

مشوار مشيته معاك وعقلي
كان محدد سير خطاه
وقوام لقيته
بين دروب التيه جرفني
وقلبي تاه
وبقيت أسير سجن الظنون
والشك ضيعني ف مداه
وسألت نفسي يا هل ترى
أنا مين ، وليه ؟
ضاعت معالم
سكتي ف درب الحياة ؟
ووقفت الملم
من ماضيَّه الذكريات
والضم سنين عمري اللي فات
بخيوط سنين عمري اللي جي
لكني وسط الضلمة تهت وكات عيونك
ليَّه ضي
وصحيت لقيت قلبي اللي يوم
كان نبضه حي معاك بيشعر بالموات
محتاج أوي
إنه يعيد تفاصيل زمانه
اللي انقضى
عمال يـدوَّر فوق خدود الورد عن
حبة ندى
عن بسمة عن نظرة أمل
عن مبتدا
أنا قلبي ليه أصبح ملان
حزن وجراح ؟
وف عيني ليه رغم الأمل
ضاق البراح ؟
باصرخ وصوتي
يهز صمتي المستباح
يا دموعي ليه تتداري
وتقيدي اللهيب ؟
ويا قلبي ليه
خايف تصدق كل شيء ؟
وحلمت ياما لكن حلمك كان
في حكم المستحيل
لا الفجر لاح
ولا خيط شعاع الشمس شق الليل
وسرسب في المدى
ولا صوت دبيب
ممكن يصحي النبض في قلوب
من حديد
ولقيتني بانده من جديد
صدى صوتي جلجل في الفضا
لم يسمعه النبض العنيد
يا رحلة التيه والعذاب
طال الأنين
والوحدة شوك
والغربة قيد خنق الوريد
خوفي الوليد
كان يوم من الأيام جنين
لحظة مخاضه اتشوه النبض البريء
هربانة م الأوهام وتايهة
في الطريق
في عينيه دمعة حيرة
لونها ف حمرته لون الشفق
صفرة غصوني ال
بدلت فرحي لألم
عصفت بقلبي اللي ف هواك
ياما احترق
أستنى إيه ؟
ما خلاص قريت في عينيك
حقيقتك ، وانتهيت
وف ثانية كان
كله اتكشف ، بان الورق
حمرة مدادك جرحت
سن القلم
لحظة جنون الشوق خرس
وجفاك نطق
سقط القناع
وسقط معاه عمر اتسرق
وَضَحِت نهاية
أول الخطوات على دروب الآمال
حتى اللي كان ممكن لقيته
بات محال
أنا ليه طاوعت هواك
وليه أعشق سراب ؟
أنا ليه مشـيت وياك
في ســكة لاغتراب ؟
وما زلت باسأل نفسي
واحتار السـؤال
وما زلت باسأل
وف عينيك ضاع الجواب

شـــعر
آمال محمود كحيل

أنت السراب

سأنفض التراب عن كتابي
وأنزع الأشواك عن ثيابي
وأصالح الأيام ، والزمان
وأودع الهموم خلف بابي
ولن أغامر ما حييت بأن تكون
كالبقعة السوداء في
تاريخ أيامي النصوع
لن يقدر الخداع أن
يلوث الفؤاد مني والجبين
أن يجذب الخطوات في
درب الخضوع ، ولن ألين
سأريك أني لست عاجزةً وأني
لن أضيع
ما زال عندي ما أراه يشدني
نحو الرجوع
لا زلت كالأزهار في الأنحاء
عطرٌ لي يضوع
فاغرب بعيدًا عن حياتيَ
في هدوء
دعني وهذا الليل وحدي
بين ثنيات الدروب
الأمل يحدوني ، لأنزع للهروب
ولأفتح الأبواب للماضي العذيب
أيام كنت ، ولم تكن
في خاطري إلا منىً
قد أغرقتني
فانجذبت إليك أبحث عن سكن
ما كان صدرك موطني المنشود
لا لا لم يكن
أنت الجمادُ ،
وفي حناياك البرودة والصقيع
أنت السراب تبعتهُ
ودفعت من دمعي الثمن
وهدرت عمريَ خلفهُ
ومضيت أبحث عن وطن
ما همني إن كنت بعدك
سوف أحيا من جديد ؟
ما همني
إن نؤتَ أو آثرت يومًا
أن تعود ؟
فأنا غدوت كصخرة ٍ
صماء يكسوها الجليد
وأنا رضيت بواقعي
ما بين أروقة الجمود

بقلم
آمال محمود كحيل

رجل في ذاكرتي

(1)
رجــلٌ فـي ذاكــرتي
حفــرَ النفــَقَ
ومـلأ فـــراغ القلـب ِ
وأشــعـل جــمـــرة حـــبٍّ
فـي أعمـاقــيَ ، ومـضـى
ترك الصـمتَ يلفُّ العمرَ
وليل الوحشـةِ يستنزفني
ودمــي النهـــرُ
بوخـز جـراحي
يصلي الروحَ بلسعة قهر
(2)
رجــلٌ مـدَّ يديـه ، وهَلـْمَمَ بي
لن يجدي هـربك من نظراتي
أو مـن دربي
فأنا قـدرك ،
وأنــا حلمـك
وأنا إرهاصاتُ جنونك
فتعاليْ ، ومكانكِ قلبي
وسـأنتظرك
كنتُ هنـالك
بين ذراعَيْ تلكَ اللحظةِ
أغزلُ حلمي
وهو يُصوِّب نحوي بصرَهْ
كـنا نســـمو
بجنــاحيِّ الحــلم ونغفـــو
فـوق مجرَّة
(3)
هذا الثائرُ بين ضلوعى
كيف أهَـدِّئـُـهُ بصقــيعي
كيف ألجِّمـُهُ بعنــادي ؟
كيف وأنتَ على أيـامي
تنثر كل بذور اللهفة ؟
وبأحداقي
ترسمُ حلم الزمن الآتي
قل لي كيف ؟
(4)
رجلٌ يومًـا ، رغمًـا عني
ذبـــح حيـائي
عَقرَ الخوفَ وعرَّى القلبَ
ولم يكتفِ ، بل أظهـر كلَّ
خبايا الشــوق
فأبــاح البــوح كثيــرًا من
أسرار العشق
وغـاب صوابي شُلَّ العقل
وتراقصت الروح لمقــدم ِ
قطــرة طـــلٍّ ، فنمـت في
صحــرائيَ وردة
فار العشب بكل جهـــاتي
آهٍ وجهـــكَ لا يبـــرحنـي
أنت السـاكن في أوردتي
وأنا أنثى الصمتُ تخلـَّى
عنهــا فجــأة
نطقت في عينيَّ دواخل صدري
عـلـَّك يا من أعشـق تدري
ماذا تعني عندي الصحوة
(5)
رجل في دنياي اختزل العمرَ
وكثف كل معاني الدهشة
في حرفين
بين سطوري أطلق ساقاً
ومضى ينهل شهد البوح
من الشفتين
وعلى ظهر الغيم اتخذ مكاناً
كي يرقبني كل بريهة
ولكي يمطر فوق شفاه الجرح
لآلئ روح ٍتعبى
كم أرهقها طول البحث
(6)
رجل في عينيهِ
يسكن حلمي
يرقد ظمئي في استنفار
تركض كل خيول الجوع ِ
وتطأ عنادي ليل نهار
يصرخ ألمي ينهض وجعي
في استنكار
كم يجذبني بهما
ومض اللهفة والإصغاء
كم تأسرني
بهما الضحـــكة جـــذلى
ترعى بين حقول الثلج
وليل الصــــمتِ
خرافي الوجلى
(7)
رجــــل بين يديـــهِ
قد أسبلت جفوني يومًا
كيما أخفي عبرة حــزن
قد خانتني سقطت تلثم
كمَّ قميصه
ثم للحظــة
بين أصابعه الدافئةِ
غــدوت كقطــة
تسـكن وادعـــة بهـــدوء
وبعينيها ارتعش الضوء
(8)
رجـــــل في شــــفتيهِ
علق مشنقة ودعــاني
كيما أقفز في الهاويةِ
وما أغبـــاني
وأنا في استسلام ٍأمضي
كي أمنحـــهُ
صــكَّ خضـوعي
كي أمنحــني
صـــكَّ جنـــونـي
بين دموعي
(9)
رجل في أذني بلا ميعاد
رتل سيمفونية عشق
فبكى قلبي كالأطفـال
همس كفى أرجوك كفاك
وبأحرفه صهر جليد الخوف
فبات الصمت جنوناً
ليس يطاق
هتفت كل خلايا روحي
آه إني ألف أحبك
علك تشعر كم أعشقك
وكم أهواك
(10)
رجل بعواصفه اجتث هدوئي
دك حصوني بعثر صمتي
ومضى يرسم لي خارطة الموت
لأولد ثانية ولأغفوَ
في عينيه
وليسقط من ذاكرتي الماضي
كل سني حياتي
دون بكاء ، دون أنين
دون ندم
!
بقلم
آمال محمود كحيل

عمنــا جـــابر

عمنا جابر
راجل قلبـه بحبنا عامر
حامد ربه ودايمًا شاكر
مادد دايمًــا لينا ايديــه
وتشوف كل الطيبة في عينيه
واحنا قلوبنا كمـــان حــواليه
أصله أمير بيحب الخير
شهم ومجدع ويا الغـير
عنده مروءة وعنده ضمير
تفرح لما تشــوفه مزقطط
دمه خفيف شربات بينقط
عمره ما زعل إنسان أبدًا
يحزن جـايز يزعل ممكن
لكن برضه ، تلاقيه دايمًا
ينسى همومه ف وسط الناس
قلبه ملان رقة وإحساس
هل فيه زيه ؟
آه فيه طبعا
بس حقيقي دا نادر جدًا

بقلم
آمال محمود كحيل

ما بين اللهفة والمسافات
بقلم
آمال محمود كحيل

يا دمعة ف عيني مكبوتــة
يا حـلم بعيــد
خنق في لســـاني زغروتـة
في ليلة عــيد
يا قلب وحيد وعاش عمـره
بيستنى الأماني تعود
ما بينا حدود
أمـل غرقــان
وشوق هيمان ورا المواعيد
وجرح جديد
بينزف ، والوجـع ممــدود
ما بين اللهفة والمسـافات
وبين الحرقة والتنهيد
وبين خطوة وطريق مرصود
وانا المســجون
ومتشـبت بحـلم عنيــد
وانا المــــوؤود
بخوفـي وغربتي وصمتي
وانا المســكون
بضعفي ودمعتي وحيرتي
وانا المشدود
لذكرى المــاضي ولأحباب
فاتوني لوحدي والتســهيد
بقيت موعود
بكاس الحــزن والأيــام
عليه شـــهود
وآه يا والدي خايفــة ابكي
وتحـــرق دمـــعـتي خــــدك
ونار بعـــدك في قلبي تقيـد
وآه يا والدي خايفة اشـكي
تحس بضعــفي ، وبيأسـي
مــا تقدرشي ، تمــدِّلي إيــد
وباتهـجى حــروف صبري
وباغــزل بالأمـــل أحــــلام
وبانسج للقــــا المـواعيـــد
ولـو إن الفـــراق محتـــوم
ولـــو إن الدليــــل مفقـــود
ولو إن الطــريق مســـدود
هاشـوفك يـــوم
يا والدي أكــيد

اشوفه بعيني لو مرة
بقلم
آمال محمود كحيل

فديت عمــرك ، فديت قلبك
يا روح الــروح
يا ريتني أطول أكون جنبـك
واضمـك ليَّه واشفي جروح
وابوس إيــدك وابوس خدك
وينشي الــروح عبيــر ودك
وشهد البـــوح
واحشني حضنك الدافي
يا نور عيني ، ينسيني
عذاب بعدك ، أسى سنيني
اللي قضيتها بعيد عنك
ونفسي ف إيدك الطاهــرة
تلمــلم دمـــع حـــرمــانـي
تتطبطب يوم على كتـافي
جايز تاني
أودع معهــــا أحـــزانـي
وليل الغربـــة ينســـاني
وصدقني يا بابا خلاص
على فراقك ، مانيش قادرة
عجـزت اني بطـول صبـري
أداري الآهة جــوايــا
وأرسم ضل بسمــاية
تداعب بالأمل عمري
فسـامحني ومن قلبك
ما كانشي بإيدي أوصلك
ما كانشي الـود تندهــلي
وأتخلـَّى
وآه يا والــدي في بعــادك
باحايــل دمعـتي ف عـيني
لكـن بتـخــونني والقـــاني
بادوب في همومي واتقلـَّى
وعارفة ان الفراق مكتوب
وأمــلي ف رؤيتــك ولـَّى
ما بيننـــا حدووووود
سكك ، ودروب
وعارفة الرحلة مش سـهلة
ومين هايلم شــــمل قلـــوب
بقت عايشة شـهور وسنين
على الذكـرى
وآه يا والــدي محتـاجــة
عينيك تمنحني لو نظــرة
وتحيي النبض في عروقي
وتمسح خــوفي من بكرة
وآه مـن لهفــتي وشــوقـي
وآه من غـــربتي المــرة
بانام واصحى على دموعي
وجوه القلب ميت حسرة
واقول من قلبي يــا ربي
عشان خـــاطـري
أشـــوفه بعيني لو مــرة
أشـــوفه بعيني لو مــرة
!

وحبيتك
بقلم
آمال محمود كحيل

وحبيتك يا أغلى حبيب
قدر ونصيب
برغــم البعـــد جمَّعنـــا
ودقـــة قـلب
بدون ما نحس
مع المســافات تقربنا
وحبيتك أمــل ، معنى
يساع القلب والخاطر
ملاك طـــاهر
على جناحـــه يكـــون قـادر
يطوف بيه المدى والكــون
يكون لدموعي كتف حنون
وبســـمة تداوي كل همــوم
ورغم الحزن بيكابر
وبيقـــاوم ، وبيعـافر
عشان يهديلي عود حنة
ويزرع فرحة جوايا
تفجر في الصحاري عيون
تخضَّـرغصن أيــامي
ومن تــاني
تصيغ بالحب أحلامي
أمل وحنين ، وحب سنين
يعيش جوانا في قلوبنا
ونتــهنى بنعيـــم جنـــة
كما العاشقين

*****
وحبيتك حـروف غنـــوة
نغـــــم بيهـــز وجـــداني
يصحِّي ف قلبي أشواقي
ويجري ف دم شـــرياني
شعور بالنشــوة يمــلاني
يصادر خوفي من بكـــرة
ياخدني ف حضنه
من جـــوه
وادوب من شوق
أنا وهــوه
ويحمــيني ، يدفيني
في عز البرد والنوة

*****
وحبيتــك قمـــرعـــالي
في ليل الضلمة بيلالي
ويحلالي الســهر ويـاه
واشوف في عنيه
شــعاع من نـــــور
بيغزل ليَّه آمــالي
وحلم كبير كتيرغالي
وجنــة حـــور
مداين بالفــرح طــارحة
قنايا ف مهجتي بتروي
شجر وزهـور
ونشوة طير على كتافي
يرقــَّص قلبي تغريدُه
يشـقِّ القلب تنهيـــدُه
واقول فينــك
أشوف طيفك
ييــجي ف بـــالي
ترج الفرحة أوصالي
وأشــتاقلك ، وأندهلك
تجيني بلهفـــة طوالي
وصمتي يعانق سكوتك

*****
وحبيتـــك وإيه تـــاني ؟
هاعوز م الدنيا غير إنك
تحس بنبض وجـداني ؟
تكون شمسي
واكــون ظـلك
وقلبي يكون رسول قلبك
دا هوه حبيبي راسمـالي
وحبيتــك

أكلناك أكلناك
بقلم
آمال محمود كحيل

يـا خبــر طبعًـــا أكلنـــاك
تقدر تنكــر ، ولا نســيت
كنت بتصرخ والله جعـان
والطيوبة كانت هاتشـيط
ندهت واد انت يا فرحات
يللا قوام تعــالالي البيـت
عنـدنـــا ضــــيف
دا سليل باشوات
عايـزيـن رطلــين مشـويــات
إشي بفتيك على شاتوبريـان
إشي أسماك جمبري روبيان
ووفاء هلـت بالجـاتـوهــات
وسـماح قالـت يللا يـا ريت
تسـتعجلي بــاقي الطلبـــات
وانت بطرف عينيك بصيت
شفت السفرة وكنت هنـــاك
أوبا بســرعة قــوامـك جيت
ولا فكرتش في اللي معـــاك
ولا سيبتلنا غيـــر الفتافـيت
نور يا ضنايا كانت شايفـاك
واقفة ف زاوية جنب الحيط
شايلة الفوطـــة بتستناك
وكولونيا لزوم الإتيكـيت
وانت مطنش ، وانا فاقساك
وسايق فيها كمان حواديـت
سمسمة قالت هاجي ويــاك
نعمل ســـوا فنجان مظبـوط
دانت يا يحيى
صحة وعافية
كلت يوميها ، وما استثنيت
حتى المحشي ، والملوخية
ولا وفـــرتش ، ولا خــليت
ولا عـداش أكتــر من ثانية
فضـيت كـل اطبــاق البيــت
ياه يا جبايرك سمسمة جايــة
ومافيش أهــلاً ، ولا زغاريط
واللي حصل في المرة الأولى
موش هايكونلك مهما شكيت
وعـزايم ما فيناش وخلصنــا
أصــلك كلت ، وقلت نســـيت
شوف يا برنس دا ذنبـك إنت
وعلى الحــرب انت أصــريت
وما فيش لحمة
ولا فيش دقـــة
ولا مناقـيش زعتـــر بالزيت
تاكـل تنسى ، تشــرب تنسي
بعـــدها ويــاك ؟ أنـــا مــليت
وانا هاندهلك طيبــة حبيـبتي
وهالمّ عليـــك أهـــــل البـيت
علشـان يحكموا بيني وبينـك
وانا بالحكم الجمعي رضـيت

أكلناك أكلناك (2)

يا خبر أبيض يا سي يحيى
شـــكلك كــده لســه جعــان
ونســيت يا برنس الفتـَّــة
وهضمــت الكفتــة كمــان
دي السـفرة كانت قدامـك
وحاجات أصناف والوان
ومافيش ساعتين كات نضفت
بحضور شــُــهَّاد أعيان
دانت ماقصرتش خالص
وقضيت على كل ما كان
ماعتقتش أيها أكلة
حتى الزعتر والدقة
سفيتهم سفِّ يا يحيى
وعامللي آل كـرهــان
وهاقولك إيه موش فاكـــر ؟
قـربي دا ، واقــولك حاضــر
كات مترين طولهـا يا يحيى
رسـيت على بـح في الآخــر
طـب ارحــم نفسك حبــة
فكر في الأمر يا شـاطـر
واستنى يـا يحيى شـوية
خد نفسك ، قلـت اتَّاخــِر
لمــا عيـــونك بصـِّت لي
والغضب ف وشك ظاهر
أنا خايفـة عليك صدقني
قلتلي يا أمال مش قـادر
عــايــزاني أبطـــَّل آكـــُـل
دا بعينــك ، ياني يا ســاتر
هاتـقـــرَّي عليــَّه يــا بنتي
امشي هناك أنا مش صابر
أنا عمري ما دقت اللحمـة
وعامل شــبعان ، وباكابـر
ما تجيبي السـلطات جنبي
على بال ما تجيبي سـجاير
واختمها بجردل قهوة
من إيد السـت تماضر
بقى يعني دا كله نسيته
وتقـول أنا أصلي بخيلة
بالذمـة في شيء خليته
دانــا والله قليــلة حـيلة
وغـلبت أقــولك صــبرك
وتقوللي اسكتي بلا نيلة
علشانك موش علشاني
وبلاش تشـرب أرجيلة
دقات قلبـــك ســامعاها
والصحة هاتبقى عليلة
وبنفس النظــرة رمتني
وعملت لي ميت هليلة
يا حبيبتي سيبيني اتهنا
إيــاكي تقـــولي اســتنى
وشيليهـا ليحيى جميــلة
سيبتك تاكل ، والحاصل
راســك باظت يا حليــلة

بقلم
آمال محمود كحيل

أكلناك أكلناك (3)

عن نفسي بقولها دا هوه
شــربني المــرِّ كاســــات
وفرد عضـلاته يـا طيبــة
واستقــوى على النونـات
والحــرب بدأهــا وفـــاكـر
ها يحقــق الانتصــــارات
خليكي معايا حبيبتي
واستدعيلنا القـــوات
وانا هارزع يحيى قصيدة
واهجيـــه بكـل اللهجـــات
يا يبطل ينكش فينا
هــوه وكل الراءات
يا نجيبله عاليها واطيهـا
ونفــرقـــع بقـى بومبـــات
وكفـايـــة يقــــروا علينـــا
ويجيبــــوا سـيرة الستات

بقلم
آمال محمود كحيل

أكلناك أكلناك (4)

آدي الرجـالة يـا حـوسـتي
خـدوا منهــم بـس زعــيق
يتحشـــر الواحـــد فـيهـــم
ما يقول دستور يا طـريق

ولا شيء يعجـبهم خالـص
آل يعــني بيفهـمـــوا أكــتر
ولا يعرفـوا يسلقوا بيضـة
ولا حــتى ازاي تتقــشـَّـــر

السـفرة يومـــاتي ليـــلاتي
تستنى ســــــعادة الباشـــا
إشي محشي واشي متحمر
يشـكروا لا طبعًا ، حاشـــا

وازاي ممكــن يعترفـــوا ؟
ويقـــولــوا الأكـــل تمــــام
شـاطرين في الذم وحتمًــا
نســـمع تلاقيح ، وكــــلام

ياكــلوا وينكروا ما يقولـوا
تسلم إيـــدك ، يــا مـــراتي
والأكــل يكـــون ع أصـوله
بس تقولوا إيه يا اخـواتي

آدم مـا كفــايــــة مناهــــدة
وارضى بحظـك ، ونصيبك
نقطــني يا روحي بســكاتك
خليني مـــدارية عيـــــوبك

ماتكونشي انت اللي بتغسل
ماتكونشي انت اللي بتطبخ
داخل خارج موش عاجبــك
وتمـللي ف وشـــي بتنفـــخ

ونظيرة دي مين ما تقوللي
مش برضـك ست يا عالـــم
طـب ليه تعـــزم أصحـــابك
على أكـل ســـعادة الهــــانم

بتاخدنا ف هوجــة وموجـة
والصــوت دايمًا على آخـره
وان حـتى همســـنا بكلمـــة
بتقول اسـكتوا ، واتاخــروا

آل يعــني ما مناش فايــــدة
ولا نعــرف شـــغل بيوتنـــا
والأكل ديليفـــري وجـــاهـز
بتشــكك ليــه ف قــدراتنا ؟

يا سماح ويا سمسمة فينكم
ســـيبتــوني ورحــــتم فــين
دكتورنا إيهــاب أهو شـرَّف
وبقــــم دلـــوقــــتي اتنـــين

زكريـا وهـــوه ، يا عــــالِم
مين ممكـــن ييــجي وراهم
طـيوبــة وفوفــــا ، تعـــالوا
دا المســـرح أصــبح عـايم

خــللي الشــــيماء تدعمـــنا
بشــــوية أدويـــــــة ليـــهم
ونخــــدَّرهـــم بالراحــــــــة
واهـــو كــده نسـتفرد بيهم

بقلم
آمال محمود كحيل

أكلناك أكلناك (5)

بقى فيه عاقل يا سي يحيى
بينـــام فـــوق الترابيـــزة ؟
لا والله دي روحــك حلـــوة
ونكــــاتك رايقـــــة لذيــــذة

خلصــت الأكـــل يا راجــــل
وتقول فين هوه يا موللي ؟
لا دانـت دماغـــك ضـــربت
وبجـــــد بقــــت تـــرالاللـي

طب ناسي ، يبقى انا مالي
ماتشــوفـلك حـــل يا بــابــا
وانا اضَيـــَّع ليــــه أمـوالي
علشـــان أطـلـــع كــــدابـــة
هاتصـــدق بيهـــم أحســــن
فيه ناس حواليـه غلابــــة

وانت أكيـــد مــوش بيهمك
ولا يــوم فكــرت ف غيرك
أصـــلك داير عــلى بطنــك
والأكـــل شـــاغل تفكــيرك

مــين قــــالَّـك إني بخيـــلة
دانا كرمي مالوهش حدود
بس انت يا صاحبي بتهبر
وتخـلَّص ع المـــــوجـــود

أعمـلك إيه ، موش عارفة
موش هافضل اقول وأعيد
مش هاعمل بارتي خلصنا
كانسـيل كــل المــواعــــيد

بقلم
آمال محمود كحيل