ديوان الشاعر / أحمد ابراهيم

مشاعر .....زيف
____________
سؤال حاير:
وقلبك ليه يبان فاضي؟
ماهوش راضي يكون انسان
يكون مليان بخير وسلام
يكون عايش ف وسط الناس
يكون حساس يحس بهمس مشاعرهم
يكون نجمة ف ليل ليلهم
يكون نبراس
سؤال تاني:
ماهوش شرطك ولاشرطي
تكون بين البشر مرضي
لاهوا ميراث مابينا كان
تقول أرضك أأقول أرضي
سؤال تالت:
مشاعر كدب خبيتها مابين سنك
تكون صادقة مدام منك
بتعرف تلوي رقبتها
وخبيتها علينا كتير
سؤال حيران:
انا ليا سؤال واحد
اذا ماعشت وسطينا
أمل كداب
شعور زايف
اذاتقبل
تكون غشاش
فهل فعلا ومتأكد
بإن الكل راح يقبل؟؟؟؟!!!!!!
______________________________

إنصهار

(مهداة إلي صديقي جابر المصري)
______

برق الوميض ف عنيا لما قلتلي
علي قد حبي ماهو ليك
يبقي أكيد بتحبني
__________

سرحت عيون الفكر مني ف الطريق
طل الندي بشوق احتياج
محتاج لأرض مخضرة
محتاج لضحكة منورة
طل الندي
وكأنه ضمة أم أو ضل انفرش
شدا البكا عيني من السرحان
نزلت دموعي ماحوشتهاش
بصيت .لقيت الفجر طالع بالأدان
أحد أحد
فرد صمد
رجعت دموعي تعزني
رجعت دموعي تهزني
لما المدي قرب وطل
جوايا ألف سؤال هرب
حسيت بلحظة إنصهار
لما النهار مد الخطا
راجع بحلم من النهار
___________

أنا أغلب من غلب الدنيا
+++++++++++++++++

لاسياسة تزغزغ احلامي
ولاسلطة بتبصبص ليا
لاانا باعرف أيه(المتحدة)
ولاهيئة تحاسب بالنية
ولاباعرف أيه المنحاز
ولاباسمع عن حرب الجاز
والدوخة ف حل الألغاز
ولارايس م الست سنية
داانا أغلب من غلب الدنيا

وف يوم الراديو المتنيل
بحجارته الطرش الفبريكة
قال جابلي محطة أمريكا
ولاقالشي( نستمع الآن)
ولاشحطط فكري القلقان
(دلوقتي معاكو ف واشنطن)
دا المطلع والله يجازيه
قال جابلي واحد وبيرطن

وبسرعة ندهت لإسلام
اسم الله بيفهم في لغاتهم
قام قاللي يابابا هايحاربوا
وهايخدوا من بينا عراقنا

اسفخس عليها دي سياسة
السرقة وصلت للمنبع
انا باعرف انك ياحرامي
تتنيل تسرق محافظنا
اوحتي يتعدل حالك
ف غسيلنا تسرق وتبدع
او توصل لكبار القوم
ف أراضي جوة الفيوم
تهبشها ولاحد يلوم

الراديو اتنيل ولع
ولقيت الصوت المتسرسع
بيقولي ننضم الآن
هو احنا لسة هاننضموا
مش برضك أعضاء ف العصبة(1)
وكبار اعضاء الدولية
مع نهرو ومعاه عبناصر
هو احنا لسة هاننضموا؟
اتاريهم بيضموا الموجة
للخبر الصدمة المتنيل
صدموني وانا باسمع منهم
عن أسود ليلة ف بغداد

بغداد زحفولها الاوغاد
دخلوها قال ايه بتحرر
(مايكونشي من أكل الفتة)
انا باحلم وانا قاعد صاحي
هو احنا لسة هانتنيل
ونقول واللهي ياكفاحي
هو احنا بنمشي لقدام
ولاادا عصر الافلام
ايشي رامبو والبت حبيبته
ومصارعة ولاف الاوهام

اتاريها الدنيا بتتغير
وانا وحدي ومعايا الراديو
تمثال من عهد الماضي
لاانا فاضي افهم ف سياسة
داانا أغلب من غلب الدنيا
++++++++++++++++++++++

ماتسافرش
****
الإهداء بكل تواضع:لمحمد حمودة
******
ولاتسافر
ولاترسم مدي الأحلام قصاد عينك
مسيرها رخرة هاتسافر
وترحل للمدي الواهم
تساهم في ضياع حرفك
ومن حرفك
يشع النور علي بابنا
وف كتابنا يكون مطلع
نشيد من عشق اوطاننا
واحضاننا
ملان كلام
هموم أيام
مابين عشق الوطن تسكن
معاك نسكن ف وقت سلام
تسافر ليه؟
وعش حمام يغردلك
يناديلك
تنور ليه بقنديلك
ضلام سابح
فسامح في اللي باقيلنا
ف أيامك
وحط عنينا قدامك
نشوف بيها
تلاقيها تنادي عليك
ولاتسافر
ولاتسافر

بغداد
++++

دم الفرات مسافات
غطت شراييني
والنيل بكا مااشتكي
يادمعتي ف عيني
يامين يعيد الحمام للبر من تاني؟
ويامين لأرض الرشيد يقدر يوديني؟؟

يانخل أرض الشام
أنسام روايحكم
أنا اللي دمي سبح
ف نشيد مدايحكم
يامين يعيد لي الغنا ويلم اشتاتنا
داانا شرعي أهل الوطن وف أرضكم ديني

يادود حدود خطوتك
وصلت لمحرابنا
مكتوب علينا الندا
ولاعمرناش توبنا
طب ليه ياصوت الشجن ساكن ف أصواتنا؟
يامين بعشق الوطن بالسهم يرميني؟

يانيل وميل خطوتك
مش عارفة سكتها
أراغيلنا مين هدها
مين اللي سكتتها؟
شريان وريدك ندم
وبدمه كارهنا
وبنبكي لما الألم ف الحضن يكويني

ناديت لعدن اليمن
لحق الندا بيروت
ياصوت حزين مظلعك
مين طلعك ياصوت؟
يادمشق شق الندا
بوابة القلعة
النية مش طالعة
الا ان تكون جبروت

دم الجزاير جزايرتنده علي عمان
وسودان أدان البشر
ينده علي الإنسان
عديت كتير خطوتي
مالقتلهاش مرسي
فيامين لأرض الرشيد يقدر يوديني
داأنا شرعي أهل الوطن
وف أرضكم ديني
||||||||||||||||||||||||||||||||||||||||||

حضن..............
+++++++

تعالي ف حضني ماتخافشي
يدوب فاضل مابينا كلام
سلام يمكن مابين ايدنا
وفرحة جت مع الأيام
تعالي ف حضني
طببني
وطيبني
وطبطب حتي فوق كتفي
ماتزعلشي اذا سيبتك
وسبت الرحلة بتعدي
هايجيي ناس اكيد بعدي
يلموا حروفي لو واقعين
يشيلوا الذكري مش ناسيين
تعالي ف حضني ماتخافشي
تعالي وقول انا منك
وصوت جرحي اكيد عنك
تعالي وودع الباقي
وفتش جوة اوراقي
تلاقي اسمك الغالي
بنقش جميل بأشواقي
وصورة حلم يوم عشناه
تعالي ف حضني ماتخافشي
ماتنساشي اللي كان بينا
ولاتبعشي اللي كان غالي
حروف وكلام وكام موال
وكنت انت في موالي
تعالي ف حضني ماتخافشي
تعالي ف حضني ماتخافشي

وارد جدا............

إن سكاتنا يبقي اللقمة ف بق ولادنا
وارد جدا
وان همومنا تبقي هدومنا
جايز جدا
واننا نكتم صوتنا العالي
اصبح عادي
وان الحيط تلمس اجسامنا
قصدي اجسامنا ف ضل الحيط
امر بسيط
وان العاقل فينا اتجنن
واللي بيفهم يبقي عبيط
هودابقي اصل الحكاية ادي

حادي يابادي
ماشفت بلادي
لابسة الطرحة لكنها سودة
أما الأوية بقت معقودة
جرن القمح بتاكله الدودة
اما القطن فطار واتخبي
جه حرامينا
شال أسامينا
نزع اليافطة
وحط الحطة
كوش كوش
اوعي تحوش
واللي مايعرف
دوغري هايمرض
اوبقليله تجيله زغطة
وارد جدا
وارد صادر
ايه هايمك
وانا هاهتم معاك علي ايه
ضاعت
خربت
عليت وطيت
سيبها علي الله
سيبها علي الله

مانيش مارد ولاعصفور

يموت الحلم جوايا ميتين مرة
مابين طلعة قمر غايب
بقاله زمان
وبين لمحة نهار مشنوق
ياخدني الشوق
علي باب الرجا .أحلم
وحلم جديد
بياخدني وهمي من نفسي
أبان عصفور
بيعشق زقزقة عشه
وضحكة مزوقة وشه
وحر يعيش
بيعلا لفوق
لفوق يعلا
لكنه حزين
ومتعشم بيوم يفرح
مايعرفشي يكون ظالم
ولايعرف ف يوم يجرح
فمات مهموم

مانيش مارد ولاعصفور
ماليش جناحين
لكين طاير بحلم جميل
أكون موال ف وسط كلام
أنا راضي
أكون انسان
أنا راضي
مانيش مارد
ولاعصفور

رغم انكسارك!!

م الخوف
باشوف وش النهار هربان
أنا موش جبان
زي الحروف اللي ماليها صوت
أيوة صحيح باهرب من الماضي
تقدر تقول لي ازاي
أهرب ف لحظة موت؟؟

م الخوف
بالم عيالي م الضلمة
وارسم لهم فوق الحيطان موال
يمكن يكون صرخة بصوت حداد
ولادواية حبر
دلدقها جاهين ف نصوص
ولاندا نداهة مجنونة
واخداك يابيرم جري ع الماضي

م الخوف
تتكعبل الخطوة قصاد عيني
مابلمهاش
أنساها واهرب م الندا المكتوب
رغم انكسارك جوة تكويني
رغم احتمالات الهروب
بتبص ليه دايما بتغريبة
ودي موش غريبة تكون ف تكوينك
لما ف مرة تقول
رغم الذنوب
قادر باني أتوب
*****************

سمعاوطاعة
**********

مولانا الإمام ...إن قام
اتهز العجم والشام
واتهزت قلوع السيرك
رايح يصيف ف الشمال
مارينا باين ولاسابرينا
لموا العساكر ياأفندينا
صفوا الصفوف
أوحتي وزع ويا كل رغيف
حرمان وخوف

مولانا الإمام ان نام
مطلوب هدوء كامل
وضوء خافت
كل الغفر بيقولوله تمام

مولانا الإمام غلبان
لاحشيش بيشرب
ولايقبل كمان دخان
مولانا الإمام موزون
عايش ف واقع جمييييل
سايب لنا براح أوهام

سمعا وطاعة للظروف
سمعا وطاعة لكل خوف
سمعا وطاعة للمكن اللي اندفن
سمعا وطاعة للمصانع والحقوق
سمعا وطاعة وقت بيع
املاكنا وياهم تضيع
سمعا وطاعة للسكات
سمعا وطاعة لمعتقل
ويا السجون
سمعا وطاعة للمجون
سمعا وطاعة للغلا
لاعلم قادر يبقي شيء
ولاحتي وصلنا العلا
سمعا وطاعة لهباشين
والنتاشين
سيبك بقي م الأوسمة والنايشين
سمعا وطاعة لدجالين
سمعا وطاعة للسؤال
انت ابن مين؟
سمعا وطاعة للحقوق
والساكنين جوة الشقوق
مسطول انا مش قادر افوق
وبابص تحت لكل شيء
بطلت ابص كمان لفوق
سمعها وطاعة ياحروف
سامحيني ان كنت انتهيت
أوجيت بكيت
أصل البكا صوت المجاعة
سمعا وطاعة

[/center]

أشكي منك ولا ليك
****************

أشتكيك........
أشكي منك ولا ليك
بص لي وبلاش بقلبك
خلي صورتي في عينك
لوهايحكم بينا مين؟
صحبة العمر اللي راحت
ولا أيام السنين
أشتكي منك وليك

حضني دافي
خدني فيه
أحمي نفسي من ظنوني
م الليالي
م اللي كان دايما ف بالي
أحتمي من صهد عمري
وانت عمري
نفسي لمسة من ايديك
أشتكي منك وليك

خبي دمعي بين عيونك
حوش شعاع الشمس عني
واعمل الضلة بجفونك
خدني يااااااااااااااااااااه جوة الليالي
جوة ف الأحلام نتوه
هو لو أبنك هاتقدر
عنه تبعد أو تتوه؟
بكرة بروازنا هايرجع
يبقي صورة في عينيك
أشتكي منك وليك
******************

لفين رايح؟

بقالي زمان وانا تايه
مابين صدمة وبين لطمة
وبين ضحكة ماهيش صادقة
وبين كلمة تكون غمة
وتبقي ف أصلها صدمة
يتوه الفكر عن عيني
تضيع أيامي وسنيني
أشوف العمر بيعدي
وانا تايه
أقول يمكن ف يوم ارجع
ألاقي صرختي توجع
واعود تاني
ف وجداني أنين نازف
وجوايا حنين جارف
أعيد خطواتي وامشيها
أمنيها بيوم راجع
لكني ف وسط أحلامي
ألاقيني اعود واسأل
لفين رايح؟
لفين رايح؟

لحظة لقا...........
********

أمرك غريب
ولاكنت محتاج الدوا
ولاصمتك المرهون سكات
كان الطبيب
وفضلت ساكت لما أيه؟
فاتت الكتير
عدت سنينك زي طيف
لاعرفت أيه معني الربيع
ولمحت أشكال الورق
وقت الخريف
لحظة لقا
مش بالإيدين
ندهت عليك الأمنيات
لكن انت مين؟
ضل اللي باقي من الحياة
ولا انت عنوان الشقا
************

شتا.............
**********

دقيت بيبانا يامطر
وبسرعة جاي
وقت الشتا سهران ياضي
نازلة النقط
ماسحة اليفط
وماعادشي باقي م الطريق
غير أسم حي
شتا
لملم سحابات قوام
واكشف ضيا جاي م السما
الشمس طالعة منورة
ليها عيون وصغننة
بتبص . تظهر كالرخام
الضي لييه لون من دهب
يطلع ولا يهمه الزحام
شتا
جاي من بعيد
واحنا معاه متكتفين
متلفلفين
رايح لفين؟
دا سؤال مايعرفهوش
شتا

واحشني.................

(الإهداء لراجل طيب الله يرحمه أسمه عم إبراهيم)
(كان صديق ووالد للشربيني ويحيي ومحمد سعيد وغيرهم)
****************

ف عز الضيق نده صوتك
ماتندمشي
ولاتمشي ف طريق معوج
برغم البعد والمسافات
أنا لسة مانيش قادر
أصدق يوم خبر موتك
سامحني.........
ومين غيرك هايقدر يوم يسامحني؟
أنا اتعودت علي طيبتك
علي صوتك
علي ندهة صباح طالع
ماتحلمشي بغير نفسك
بغير ذاتك
عرفتك فيلسوف عصرك
برغم سماعي آناتك
عرفتك وانت ياصابر
ماتهربشي ف وقت العون
بتوحشني
برغم الصورة والبرواز
وحشني طبطبة أيدك
بحنية
وحشني ندهتك ليا
وحشني نظرتك بالخوف
تبان ملهوف وانا جمبك
سامحني لأني ماقدرتش
أصون حبك
ياغايب ليه تفوتني وحيد
مابين كل البشر والناس
ماحستشي بيوم فرحة
ولا طلة أمل أوعيد
واحشني يااااااااااااااااااااه
واحشني
واحشني

******************

غزة.........

*********

المدفعية والبارود
طيارة بتعدي الحدود
كان الولد ماسك قلم
كراسة من حزن وألم
كاتب ف وسط السطر كلمة من ضيا
الأرض دي أرض الرسل
هي مزار الأنبيا
طلع الصاروخ
مزع مابين السطر والكف الصغير
مزع حروف العشق للبيت والوطن
مزع سكات الطفل وقت الاندهاش
(الدم دا عمره ماكان تمنه بلاش)
سكت الكلام..............
الصوت بقي صوت الزلازل
الصوت بقي صوت انهزام
طلع الأدان
انا كنت فاكر ان دا صوت الأدان
لكن سراب
ماعادش فينا مين يؤذن للصلاة
الكل ساعي للشهادة ف أرضنا
لكن ياناس
ياخلق ياكل المشاعر
انا كنت شاعر بس حسيت بالوجع
لما بينهش عرضنا
وقف الكلام
ف الحلق مات
زي الصبي لما الصاروخ مزع حشاه
ولا ألف آه ممكن تداولنا الوجع
والدم دا عمره ماكان تمنه بلاش
الدم دا عمره ماكان تمنه بلاش
الدم دا
عمره ماكان
تمنه بلاش
****************

واحد أتنين .............حرجي مرجي
************************

واحد
أتنين حرجي مرجي
أنت شريف ولا حلنجي
بعت ضميرك
تسرق غيرك
بس بجد طلعت ادارجي
واحد اتنين
حرجي مرجي
داير نهب
ولهف وسلب
لما اتصابنا بداء الغلب
والأمراض محتاجة تمرجي
واحد اتنين
حرجي مرجي
ياللي حاكمنا بنار وسجون
أغلي شبابنا هناك مسجون
حتي العاقل بقي مجنون
ساب تعليمه وعاشها فرارجي
واحد اتنين
حرجي مرجي
______________