ديوان الشاعر / أحمد ابراهيم

الي الشاعر المعتقل/أمين الديب
****
السما لون الحيطان
والحيطان لونهم حزانا
مين أخدنا؟
مين رمانا؟
كل دا علشان ياكلمة
مرة ثورنا
من قانوننا
واننا نرضي بمصيرنا
ولانفضل باستكانة
كل دا ياخلق هوه
هو ليه الحق دايما
ف السجون بيركعوه
أدي سجانهم مكشر
يقلقوا أهلي عليا
بس هوا مايتعبوه
وانت ياديبنا اللي ساكن
جوة بدلة ولونها داكن
يعني كان لازم كلامك
يبقي علني
داحنا عصر الانفشاخ
عصر بيع
عصر ضيع
عصر مايعلم بحاله
الا ربك
بس ياديبنا اكيد
صوتنا واصل
رغم كل الظلم واصل
بين حيطان مدهونة كحلي
والفواصل
ولاتسمع صوت ف راديو
لما يزعق
زي صوت القطر فايت
يفتقد شكل التواصل
عمنا ياأمين ياديب
مش غريب السجن يبقي للي ينطق
واللي يسكت
برضو ممكن
انت جوة السجن عادي
سجن قضبانه فواصل
واحنا جوة سجن اكبر
مجتمع مليان لصوص
الكبير اكبر حرامي
والذمم ملعون أبوها
يشتروها بالفلوس
عمنا يامين ياديب
مش غريب
لكن اصبر
كلها ايام وربك
جايب النصر القريب
كلها ايام وربك
جايب النصر القريب
*************************
مستني دوري ومش قلقان
(أحمد ابراهيم)

وليه طبعك تكون خاين؟؟



ماتعرفشي تكون صادق
مع روحك
تلم جروحك الفاتحين
وتوفي الندر وتعاهد
تكون شاهد علي نوحك
تكون وافي
تهز كتافي لو خنتك
وترفضني
فليه دايما تكون خاين؟؟؟
تقولي كلام مابفهمهوش
عن النية
عن انك تعشق الصحبة
واحساسي يقول لأة
أكدب كل احساسي
واساير كدبك المعهود
أقول يمكن يكون وافي
ويوفي عهود
فليه دايما تكون خاين؟؟؟
بترسم صورة مش منك
ولو انك
في جوة قلبك الساكن
شعور طيب
لكنك وقت ازماتي
بتبعد ليه مانيش عارف
تبان خاين
كأنك قاصد اللعبة
وتهزمني
لكين خاين
وليه دايما تبان خاين؟؟؟؟؟؟؟؟؟؟؟؟؟؟؟

زمن الملايكة





وتسرقني...
ياصوت ساكن ف جوايا
بتنده ليه علي اللي راح
جراح تسكن ماتهمدشي
بتطلب م الحياة تمشي
بعكس الواقع الموجود
حدود من صمتك المعهود
ورود من شوك
ماتدبلشي
وتسرقني...
في صوت تباريح
وصمت جريح
مايسلمشي
أعاود رحلتي تاني
أروح
أمشي
والاقي نفسي بين خيارين
أكون ولا
ولااكونشي
أعد الخطوة وامشيها
أجاريها
سكات مكتوم
ماينطقشي
أنا جيت لك أمل طارح
فليه بتروح
ماترجعشي
يجوز فهمي ماهوش قادر
يساير ضحكة شمتانة
أنا جيت لك زمن من ناس
ومتعشم تكون أحسن
زمن حساس
يحس الناس
مايهربشي
********************

وأيه يعني؟
كلاب السكة تستني لصوت يطلع
ونغزة في الجناب توجع
لكين ترجع
أكيد لأة
عرفنا فيك ضيا المعني
تجمعنا علي كلمة
تودعنا بلاهمة
تسيبنا لمين؟
وفين رايح؟
أنا عارف بان الرحلة مش منك
ولكنك....
تهز النخل في العالي
وبتعاني عشان يطرح
وعارف انه شيء يجرح
ياراحل في ضيا عينا
تسيبنا لمين؟
ومين يسأل في يوم عنا؟
انا هاستني يوم ترجع
وتاخدني في حضن كبيييييييييييييير
وبتسميني ليه بيرم؟
وواخدني لأنهي مصير
ياعم جمال..............
أكيد راجع
وانا والكل
نستناك
اكيد راجع
وانا والكل نستناك
أكيد راجع وانا والكل نستناك...................
*************************

وسامحيني


*****
مانيش قادر أكون غيري
أكون زايف
أكون شايف
وشوش والكلمة مش طالعة
مانيش خايف
علي غيري
مدام هانت
لااعاتبها
ولاالومها
مدام خانت
اكون ازاي وقلبي ضعيف
مايعرف كدب او تزييف
اكون غيري
بوش قزاز
يبين ضحكته الصفرا
ولومرة
اعيش كداب
الاقي روحي بتهاجر
قصاد عيني
تفارق جتتي الضايعة
اكون شمعة
تنور ف الضلام ليهم
ومين قادر يبصرني
يقدرني
ووقت وقوعي ف المحنة
يقول جايلك
وسامحنا
مانيش قادر اكون غيري
هاعيش حرفي بتكوينه
هاعيش ياكلمة وضميري
قصاد عيني
فسامحيني
******

كدابين...
***
ياعيون بتكدب كل يوم
ياهم في وسط الهموم
ياقلوب ماليها الزيف
أنا ليه محاوط قلبي
بالصمت المباح
أنا ليه مسكن عقلي
في وسط الجراح
ياكدابين
وملفقين كل التهم
جواكو جوع زي النهم
ياكدابين
جواكو زيف
يملا الكتاب
وانا عمري ماعرفت ان أكون
غير معني صادق بالحياة
أنطق
آقول الأه
آصرخ
ف وش الكل
ياكدابين
ياكدابين
يا
كدابين
**************

مهم..
***
أطلعي ياحروفي خضرا
وادخلي جوة المظاهرة
انطقي جوة ف عنينا
كوني وقت الجد قادرة
دوري ياكلماية دوري
مش مهم ان خدت دوري
اطلعي بركان وثوري
ثوري ثوري ياحروفنا
مين مكلبش في كفوفنا؟
مين مسبب كل خوفنا؟
مين ومين؟
احنا من زيت المصانع
ولامن غلب السنين
احنا من ايد اللي زارع
ولامن صوت الآنين
آني آني
هاتي كل الصبر لينا
سكتي الصمت اللي فينا
وان كدبنا
أحرقينا
أحرقي فينا اللي خاين
واكتبي فوق المداين
صبر كل سنينا طالع
م الجوامع
م المصانع
م المحلة
ضحكة جاية وجاية هالة
م الحديد
م الحديد الفجر طالع
يوم جديد
م النجوع الصابرة جاية
شايلة بشرة يوم سعيد
اطلعي ياحروفي ياللا
اللي ظالم ليه ماخلا
جوة منا حتي نظرة
فيها نهتف ف المظاهرة
جينا جينا ياحروفنا
جينا جينا ياجروحنا
ياما جينا
ياما رحنا
بس ليه احنا اندبحنا؟
قولي ليه احنا اندبحنا؟
اطلعي ياحروفي خضرا
وادخلي جوة المظاهرة
ادخلي جوة المظاهرة
***************

أمينة يادموع عيني.............

***********

وحتي لما خنتيني
أمينة حتي ف سكاتك
ف آناتك
ف لحظة جرح متآلم
أمينة وقلبي ماتكلم
أمينة يادموع عيني
هاقول لك قولي سامحيني
وطاوعيني ف وقت فراق
انا سبت الحياة تهرب
فخليكي هنا جمبي
يجوز الذنب مش ذنبي
وسبت عزيز علي عيني
فسامحيني
يعز عليا قولة آااااااااه
وانا اللي الصمت داواني
وخلاني ابيع الرحلة برخيصها
عشان الغالي كان جاني
عشان الغالي كان جاني
أمينة يادموع عيني
*****************

السهر طارح مداين
……..



***********

ياحبيبتي بتسأليني



ليه بعدت

مش كتير ياحبيبتي أبعد

أفضل ابعد ابعد ابعد

وانسي إني ف يوم بعدت

ألقي كل ليالي طارحة

شايلة فرحة لغيري يمكن

والسهر جوايا يسكن

لسة برضو بتسأليني

ليه مدينتي ماهيش حقيقة

ليه حروفي ماهيش بريئة

لما ارد

خبي نن عنيكي مني

دا لإني

يمكن اكدب حتي ليا

لكن انتي

جاوبي عني

صعب اني

أعيش ف وادي

وانسي إني ف يوم بعدت

سبت رعشة ف الأيادي

سبت عمري

سبت زادي

سبت ضحكة مودعاني

كنت انا وحدي اللي جاني

صعب تاني

أنسي إني ف يوم ظلمت

سيبت كل الطرح يعدم

سيبت كل الحزن جالي

ياحبيبتي ماتسأليش

دا السهر اصبح مداين!!!!!!

***********

بغداد..1
____


ياتوب مزخرف بالودع
يامادنة مالقتش الأدان
أنا مش جبان..
علشان أسيبك للزمن
علشان أسيبك للخيانة
والمهانة والهوان
أنا مش جبان
أنا صوت حزين
جايز ف لحظة يسمعك
ويسمعك
صوت اللي زيي مايقدروش
غير ع البكا
غير ع السكات
بغداد وانا
مليان آنا
مشحون بصورة صرختك
ساعة عنا
مشحون بصوت طفل انقتل
جايز أنا
بغداد....
أصعب من الموت الخيانة
أصعب من الذل انكسارنا
احنا اللي فرطنا ف نهارنا
فرطنا في حق الأمانة
بغداد....
النيل هناك جمب الفرات
ضفة بتصرخ م الألم
بيرد صرختها السكات
يرسم لي توب لون السواد
يرسم حداد
كتفا سلاح
الله وأكبر ياآدان
الصلاة زي الكفاح
الله وأكبر يأدان
الصلاة
زي الكفاح
************

وآخرتها؟....
****
تعبت خلاص...
ومليت السكات والصمت
هربت كتير
من المشاوير
مابين ضفة أتوه فيها
وبين لحظة أكون فيها
وبين دمعة أداريها
بتخنق ف الكلام والصمت
وآخرتها
اسيب نفسي لموج عاتي
مابين صمتي ولوعاتي
واضيع بين البشر تاني
ف سكتها..
وآخرتها
أشوف نجمة تكون عالية
أكون ليها ونيس وجليس
وافرح ويا صحبتها
يامين بالحزن سكتها؟
وآخرتها
أسيب قلبي يروح مني
لاعاد فرحان ولايغني
داكان بيقول حاجات عني
ياقلبي خلاص وأخرتها
اسيب حلمي يفوتني وحيد
لاعين شايفة تمد الأيد
طشاش غطا علي الرؤية
وفتفتها
وآخرتها
خلاص مليت
ودي لازم تكون حكما
وآخرتها؟؟؟؟
****************

ياسما....
**********


ياسما
صفوك لمين؟
للسنين الرايحة منا
ولادا بعض الحنين
للمدن وقت اشتياقنا
ولاصرخة من آنين
ياسما
عشقك لمين؟
للبشر وقت البداية
ولالحكاية زمانها راح وعدا
للكلام اللي مايهدا
ولاغربة من السنين؟
ياسما
صمتك لمين؟
للعيون وقت النعاس
للهروب وقت الخلاص
للمكان اللي احنا فيه
وقت مايكون الرصاص
ياسما
حني علينا
دا احنا لسة محتاجين
***************

….. لصاحبي اللي سافر









لما تعدي المدن فوتني وحيد جمبك








الذنب مش ذنبك






لكنه مش ذنبي


أوقات كتير بالقاك بعيد عني


جواك بتصرخ


وانت بتخبي


فارد شراع المركبة وراحل


سايب لمين الضحك والاناشيد


أنا صوت خلاص انتهي


وماعادشي فيه مواعيد


فيإما تركب معايا ونبدأ الرحلة


ويإما ابعد بعيييييييييييد


وارمي السلام بالإيد


تشاورلي بالمنديل


تنزل دموع عيني


وتاخدني كل المدن


رحلة ورا رحلة


رحلة ورا رحلة


______

دنيا...



وخداني لحد
ولا الحد الفاصل بين الفهم وبين الرد
محتاج للضد
دايما مشغولة بغيري وسيري مالهش دليل
انا موش قلت ف فضلك مواويل
وفضلت أغني لحد الحد
ااقصد
لحد الموت
***

دنيا....
مهموم وحزين
طب ايه غير كلمة انسان
الي وحش كبير؟؟؟
أوأيه غير كلمة ياضمير
إلي صمت كبير
جاوبيني وبعد الرد
أنداري لحد
أولفي عليه كل التعابين
وهاتيه الأرض
****
دنيا....
ان كانلي زمان
أوحتي كمان قبلك يازمان
قصة أحلام
وكلام
علي جدر ف شجرة قديم محفور
الصبح جميل
والليل اوهام
بعدين
لالقيت الجدر هناك
ولاحتي الشجرة فضلت بتميل
اتاريها الدنيا
شمال ويمين
بتاخدنا لفوووووووووووق
وف اقرب ثانية
ترميك ع الأرض
*****************************

تمشي بيا الخطوة فين؟
والوجع مابيستكين
السنين عمالة تجري
جوة مني شعور دفين
لو بايدنا نكون ملايكة
ليه نبكي المحرومين؟؟
*******


(متصل)

باعيد عليك...


****************************



من جروحي
ويابوحي
ياللي جوة القلب ساكن
مش مساكن تحتوي صمتك وحزنك
دي خيام
وبسهام الغدر ألطف
مش ملاحق م اللي جاي
من سنين طالت عليك
من عنيك
اللي زادها الصمت صمتك
اصل انا جاي النهاردة
لجل بس أرمي السلام
زي ماغيرنا بيكدب
بالمعاني والكلام
جاي اكدب
ايوة باكدب
لما انا اعيد عليك
ياللي تحت الحظر ناطق
بالحقيقة والملام
لوم علينا
احنا سيبنا الحق ضاع
سيبنا فيك كل اليتامي
والجياع
هل صحيح انك مسامح
هل صحيح جواك ملامح
تشبه الضحكة البريئة
دي حقيقة
قلي آآآآآآآآآآآآآآآآآآآآه
مش وجيعة
قولي صابر
لما بكرة العيد يقرب
ع المعابر
بس يومها
اوعي حتي تقولي مرة
(وانت طيب)
**********************

وتسرقني...
ياصوت ساكن ف جوايا
بتنده ليه علي اللي راح
جراح تسكن ماتهمدشي
بتطلب م الحياة تمشي
بعكس الواقع الموجود
حدود من صمتك المعهود
ورود من شوك
ماتدبلشي
وتسرقني...
في صوت تباريح
وصمت جريح
مايسلمشي
أعاود رحلتي تاني
أروح
أمشي
والاقي نفسي بين خيارين
أكون ولا
ولااكونشي
أعد الخطوة وامشيها
أجاريها
سكات مكتوم
ماينطقشي
أنا جيت لك أمل طارح
فليه بتروح
ماترجعشي
يجوز فهمي ماهوش قادر
يساير ضحكة شمتانة
أنا جيت لك زمن من ناس
ومتعشم تكون أحسن
زمن حساس
يحس الناس
مايهربشي
********************

الإهداء .......الي عم سيد بياع الجرانين(رحمة الله عليه)

**********

ياعم سيد.....

حببتني ليه ف الجرايد
وانت عارف كدبها
ورسمت لي
إن الثقافة منها
وان الصميم
جاي بالخبر
وان اليقين جاي منها
ياعم سيد
عمال بتستني الصباح
والليل كئيب
واما عنيك تلمح زبون
ترمي السماح
من طرف عينك والمدي
مشوار طوووووووووووووووووووووووويل
وانت الوحيد
تحكي عن قصر الملك
وازاي زمانكم من زمان
افراح وعيد
أيه غيره؟؟؟؟؟؟؟؟؟
تحكي عن ليلة فرح
ولا ألف ليلة كلها
لحظة ماقال الراديو ليك
الليلة مع ست الطرب
ثومة وعاديك
سبت البياعة والصحف
وجريت قوام
لجلن ماتلحق حسها
الله عليك
كلك بريء
ياعم سيد
لما اسألك
ماتنامشي ليه؟
ألقي الفلاسفة كلهم
جم ف الكلام
(هو يولدي النوم يزود ف السنين)
(ولا كمان بيهدها)
أنا نمت ياما زمان كتير
ايام ماكنت رحلتي
ف المبتدا
دلوقتي انام
وسط الزحام
أخاف اموت فوق فرشتي
نفسي اموت بين الصحف
ياعم سيد
بالأمانة
وحشتني
وحشتني
وحشتني
*******************

لما حلمك ينقتل قدام عينيك
والمعانى كلها تصبح سراب
لما كل الصحبة تخرج للمدى
تنده بعلو الصوت لمين
تلقى المدى ملهوش صدى
تصبح بطل....
قدام مئات الأسئلة
ومعانى تاهت فى التهم
خلك أساس المشكلة
صبح المحامى متهم
جوا القفص تصبح وحيد
لكن بطل ...
تضحك وخايف م البكا
ما يهم مين اللى اتهم ولا اشتكى
فى جوا قلبك معجزة
جواك طفولة مزقططة
وزغنططة...
قلبك وفى ...
وبكل حزنك تكتفى
تلعن فى صمت الأزمنة
كل اللى شافك واختفى
لكن بطل...
فى عيونك الدمعة سؤال
فى اخوتك زى الجبل
اقبل زمان وابتدى
أخر نفس فى الحلق يبقى المبتدى
انطق بقى....
واستني بكرة بالمنى
واحلم معايا باللقا
أوعاك تخاف
أوعاك تقول
من خوفى منك هانتهى...
أوعاك تكون فى المنتهى
لساك فى أول سكتك
ولا ألف ميت كرباج
هيقدر يخرسك
أصلك بطل ...
لساك هاتعرف من معاني التجربة
مليون هدف...
لكن أمام المستحيل
خليك بطل
لجلن تعيش جوا الحياة
خليك بطل
خليك بطل

مديت كفوفي بخوفي
انحنيت وبكيت
دي طفلة في المدرسة
غرق هدومها الدم
لاخال يحوش أو عم
وضمير ملينا بغم
ماتبصوا للمريلة ياللي الضمير فاتكم
دولا ولادكم
بلادكم
كرهت اساميكم
ازاي أسميكم
اصل الفواحش اطهر من أساميكم
كداب ياصوت الضمير
ملعون ياصوت الحق
خلتني اكون كداب
ولاقد كلمة لأ

ودي أم من حزنها
زادها البكا جبروت
ملعون ياصوت الخضوع
وانت علينا تفوت
اشرف لنا ننتهي
اشرف لنا ونموت

ياصوت ضمير الولاد
سامحوني وانسوني
كل الكلام انتهي
قربت لجنوني
هو اللي شفته حصل
بالحزن غطوني
بالحزن غطوني
*****************

تبعني بكام؟؟
*****
بتعشق رحلتك صوتي
وترسمني علي خدك
كلامك راح....
مع موجة معدية
ماهيش قدك....
شبعت كلام قصاد موتي
ترانيم الوفا ولت
ولاخلت ف جوايا مكان واحد
ماعدتش اصدقك مرة
وبالمرة
ماتاخد قلبك الساكن
مابين ضلعي وتكويني
ووزع ضحكتك للناس
قمر كداب
تكون ليهم
ومش عاوزك
مدامت رحلتك ماشية ف قلب سراب
أنا عاوزك تكون مني
تكون نني
تحوش صهد الشموس عني
ماتكدبشي
ماتهربشي
وفسر حرفي بالساهل
انا استاهل
مدمت وفيت
ومااستنيت
أكون بايع
وألف خسارة يارحلة
ماكملتشي
تقول الملح ويا العيش
أقول لأة
ماينفعشي
دا زاد من زاد
وليه طقسه وتكوينه
وليه عهده
ماتنكرشي
تبعني بكام؟
بوهم كبير
مايصدقشي
بعهد زمان
وانا قلبي مايحلمشي
كلامك راح
ولاعادشي
هايهزمني
كلامك
راح
ولاعادشي
هايهزمني
**********

مساء الخير علي عيونك
********************ِِ


أمانة وانتي عارفاني مانيش كداب
تنادي الصبح بالطلة
برمش العين
تهدي الشمس لوهالة
علي المساكين
تنادي الصبح برموشك
ولايحوشك
من الأسباب
تعدي بحار
وليل ونهار
تكوني صحبتي وحدي
ياكلمة وانتي عارفاني
مانيش كداب
***************

موال عشان اللي غايب
(المنسي)
********
الأولة مننا والغالي يرخص لك
والتانية عننا قلنا ونبعت لك
والتالتة غايب وفاكرنا في قلبك

الأولة مننا والغالي يرخص لك ورحت لفين؟
والتانية عننا قلنا ونبعت لك بقالنا سنين
والتالتة غايب وفاكرنا ف قلبك بنبض حزين.............
*********************

موال عشان الحبايب
*************
الأولة عاشق وانتي عشقاني
والتانية بلدي ماليش غيرك مكان تاني
والتالتة بعدتي ليه وسايباني


الأولة عاشق وانتي عشقاني وعشقك موت
والتانية بلدي ماليش غيرك مكان تاني بعلو الصوت
والتالتة بعدتي ليه وسايباني وعمري يفوت
**********************

قصيدة الليل............
*************
الليل...................

الليل مضي..................
لملم عبايته ف توب سواد
هل الميعاد
شاور بإيده لكل حي
أنا برضو جي
مهما تكون التجربة
النبض حي وألف حي
جايز هاقابل ف الطريق
حلم انسرق
أو توب ملايكة والبشر
فاردينه ضي
جايز هاقابل ناي حزين
أعزف عليه وتر السكات
اللحن يفلت م الثبات
يرفض يخوض التجربة
جايز يكون الليل مضي
لكنه جي
لو مرة تاه مني الطريق
أو صدري بالأحزان يضيق
لامرة هاشكي من بعاد
ولاهاشتكي ظلم الصديق
الليل مضي
ساحب معاه ضي القمر
ياهلتري هو سحب مني الحياة؟
ولاادا كان المفترض
لحظة سفر!!!!!!!!!!!!!!
*******************

الأولة كنتم جوة القلب ساعدينه
والتانية هنتم وضقتم باللي ساعد ينه
والتالتة رحتم وسبتوا مرار وساعدينه
الأولة كنتم ولسة في القلوب عايشين
والتانية هنتم ورحتم بس اجيبكوا منين
والتالتة غبتم وراح الضي جوة العين

الأولة قلبي
والتانية قلبي
والتالتة دربي مالهوش بيان مع التايهين
الأولة كنتم
والتانية هنتم
والتالتة رحيتم
**********************