ديوان الشاعر / أحمد ابراهيم

عاصفة....
**********
إفتتاحية قديمة جدا:
(وبيتعبك كتر الوجع
وانتي الوجع وانتي الآهات
الحبل بينا بينقطع
ولاعادشي راح ينفع سكات))
_______________
(1)
الليل يهل علي النواصي يهدها
والخوف مشانق ع السكك
مستنظرة يوم الرجوع
خطفتني نداهة زمان
خلتني تايه ف الوطن زي الغريب
من غير دليل أو ترجمان
بهراني أنوار النيون
نور الفنادق..والملاهي..والجنون
مليانة بالدمع العيون
وباشوف طشاش
(2)
النني ف عيونك غريب
فيكي الشوارع ضيقة
ضاقت بنا
ألمح ف أسفلت الشوارع
لون حداد
الأرض دي مش أرضنا
مترددة بين الخيانة والوفا
هبت عليها العاصفة
قلعت جدور اللي انتهي
واللي ابتدا
تطوينا أصوات الزحام
مستنين يوم الرجوع
مستنين الفجر لما يندهك
ويرجعك
جايز كلامي يوجعك
وانتي اللي تايهة ف العيون
أنا مين هاكون؟
(أنا أبنك البكري اللي رجع يحلمك حلم النهار
وانا ابنك البكري اللي اتفطم ع الخوف زمان
أنا توبك اللي يسترك
وانا شمعتك وسط الضلام)
(3)
وتركتي نفسك للغريب
وصلت رياح العاصفة حتي البدن
فات اللي فات
وماعادشي راح ينفع سكات
علشان تعدي العاصفة
لازم يموت الخوف في انحاء السكك
لازم
يموت
الخوف
ف أنحاء السكك
*****************************

أنا..والسما..والبحر
***
جوايا كم من الحكايا
دنيا بحار
شطين نهار
ضحكة علي حلم انتهي
من غير قرار
مستني ليه هبو الرياح فيا
لومت أيه تفتكر
دا موت بلادية
متسبله فيكي الجفون
ياعين بلاغية
ماسكة جفونك
صولجان هربان
بتحط صرخة من الوجع
كت مني
مش ليا
أنا
يابحر مالك سؤالك
لم لقيتله جواب
وكتاب حروفه المطموسين
ف عجين كلام
بيحطوا فوق الشط
ف جزيرة مهجورة
والصورة لسة ضلام
سما
عارف نجومك
وليا فيها صحاب
لانجمة كدابة
ولانجم كان كداب
ألضمهم السبحة
ولا محتاجين لكتاب
بحر
يمك سنين كانت
هانت علينا الرؤي
والرحلة لم دانت
انت البعيد عننا
آخرتها اهي بانت
لا انت اللي موجك عفي
ولاصرختك
كانت
*****************

بغداد..1
____
ياتوب مزخرف بالودع
يامادنة مالقتش الأدان
أنا مش جبان..
علشان أسيبك للزمن
علشان أسيبك للخيانة
والمهانة والهوان
أنا مش جبان
أنا صوت حزين
جايز ف لحظة يسمعك
ويسمعك
صوت اللي زيي مايقدروش
غير ع البكا
غير ع السكات
بغداد وانا
مليان آنا
مشحون بصورة صرختك
ساعة عنا
مشحون بصوت طفل انقتل
جايز أنا
بغداد....
أصعب من الموت الخيانة
أصعب من الذل انكسارنا
احنا اللي فرطنا ف نهارنا
فرطنا في حق الأمانة
بغداد....
النيل هناك جمب الفرات
ضفة بتصرخ م الألم
بيرد صرختها السكات
يرسم لي توب لون السواد
يرسم حداد
كتفا سلاح
الله وأكبر ياآدان
الصلاة زي الكفاح
الله وأكبر يأدان
الصلاة
زي الكفاح
************

هز المدي صوتي
لقتني جريت
خبيت دموع جوايا عصياني
شالت كتير الحمل عصياني
أنغام وتر بتعدي في الشارع
بتلم صوت الحلم ف جرابها
تفتح سبيل النطق للخرسان
وتنادي مادنة كان لها جامع
انا سامع الصوت الحزين
شيلاه ملايكة ف اتجاه بكرة
انا كنت دايما باحب
ماعرفت يوم اكره
خطيت خطاوي كتير
لكني ماخطيت
ولاعمري شيلت الذنوب

لكني لما بكيت
ماحد شال دمعي
صوت المدي تارك كمان سمعي
فمسحت اول حروفي
ف الكتاب
ومشيت!!

التوقيع :
(( حر الكلام..
زي الحسام
يقطع مكان مايمر
أما المديح..
سهل ومريح
يخدع صحيح ويغر
والكلمة دين
من غير إيدين
بس الوفا..ع الحر))
الشاعر الكبير/
أحمد فؤاد نجم

إزاي أغنيلك والقيد مكلبشني

عايشك ولكن خلاص .. ما عدت بتعِشنى

دلوقت أصبح خلاص جواك عيوننا رصاص

تُذغر ..... ماترمشني...!!!!!

نسيت إسمك
نسيت رسمك
نسيت حتي تفاصيلك
ووقتن كنت فيه مني
ضيا في عيني وف النني
نسيتك جد صدقني
نسيت اني أكون شاري
ووقت الصعب بتبعني
نسيت ضعفي...
بلفظ( صديق) يرجعني
أموت مظلوم
ولاأقبل ان اكون ظاااااااااااالم
مرار الظلم يوجعنيي

نسيت إسمك.....
لكين انت ماظنش لا
أكيد هاتلاقي انفاسي
ف كراسك
أكيد هتلاقي احساسي
وصل راسك

كتبت كلامي ف الهامش
شطبت عليه..........
يادوب سطرين وقلت لأيه؟
لمين هاتقول؟؟
ماعدا خلاص
زمان الصحبة والإخلاص
خلاص عدا......
كما قطر السنين بيمر
يعدي فوق سنين الحلم
أنا باديك صكوك حلمك
فقولي خلاص بإنك حر................
نسيت إسمك
نسيت إسمك!!

ياصاحبي.........

أنا المحتاج لنور عينك
ينورلي طريق هربان
فليه تهرب بأحلامي
وترسم سكة قدامي
وف الدنيا ماليا مكان!!
كفاية بعتني سابق
فماتبعنيش وانا خلصان!!
ياصاحبي لا..تحاسبني
علي صدقي
علي قولي علي حقي
في إني أكون بنبض حياه
أعيش لك آه...
أنور لك طريق عشناه
فسبني اتحرق وحدي
بنار ظنك..
وماتكونشي في يوم تعبان!!
كفاية بعتني سابق
فماتبعنيش وانا خلصان!!
ياصاحبي آآآآآآآآآآه
قسمناها سوا نصين
بنص الكلمة يتذوق جدار قلبك
ونص الكلمه هاصرخ لك
أنا إنسان
كفاية
بعتني سابق
فماتبعنيش وانا خلصاااااااااااااان‍‍‍‍‍‍‍‍‍

أنا بارفضك...
****
قلت لك:
أسف لكني
غصب عني
برضو مش قادر أصدق
إنك انتي جزء مني
ليه ف لحظة
كنتي فيها
ماسكة كرباج التجني
وارتضيتي تكون ظالمة
كل دا علشان باقولك
اني بارفض
كل شيء يربطني بيكي
بارفضك
والعن سكوتي
لو حياة
هاطلب تفوتي
لو ايديكي جت تطبطب
هافتكر نعشي وتابوتي
بارفضك
مش غصب عني
بارفضك قاصد لكني
بد اوضح ليكي حاجة
اوعي مرة تقولي اني
خنت عهدك
ابتديت الخطوة لاكن
كنت بعدك
باعترف لك
اني واهم
واني ويا الظلم منك
فيه مساهم
اعترف لك
اقدر اني
انكوي بالنار واعافر
ااقدر اني ارتحل لبلاد بعيدة
ااقدر اني اكيد اسافر
بس اقول لك
ارفضك
والعن سكوتي
ارفضك
والعن سكوتي

__________________

((ولإني عاشق للخضار والبحر
وقلبي أبيض وأمي فلاحة
بنيت بإيدي القلعة ويا القصر
ووهبتهم قوتي بكل سماحة))
الشاعر الكبير/
سمير عبد الباقي

هارسم لك ع الحيطة كتابي

***

ف كتاب العشق

صفحة واحد

من بعد السبعين مليون

صهاريج الموت المليانة

عايزانا عبيد

تتمد الإيد المجروحة

من جوفي

من خوفي

أتشعلق جواها جدار

أنهار الحزن المتداري

بتداري فيا عيوبي

تتخلص مني ذنوبي

ويادوب

قادر اني اصرخ فيها

وبعلو الصوت

____

هارسم لك ع الحيطة كتابي

موال مش بس نهاره نهار

موال مليان

مشحون

بهموم الخلق اللي اتطحنت

وزمان مجنون

علمني أكون كداب

ولا

الفش غشي

ف جار لبواب

أرسم لك أيه؟

ماخلاص

لاأيديا بتعرف تمسك ريشة

ولاليا خلاص

حتي في حروف النطق الأولي

بتغشلق عيني

أتاريني

لسايا يدوبك

باتهجي حروفك

وانكر أفضالك لحظة خوفك

واما يتهز ف قلبي وريدك

أمسك طراطيف ف كفوفك

أتاريني يادوب

ف كتاب العشق الأول

بعد السبعين مليون

******

إعتراف....
***
صمتك وطن
بيضمني ويشدني ويحبني
وتمالي يملاني شجن
حضنك تاريخ
ومعبي فيه كل المحن
وواخدني فيه
وانا كنت فيه المنتظر
بتحبني؟
طب قد أيه؟
وسع السما
قد الفضا
قد احتمال ظلم السنين
قد التاريخ المنتهي
علي باب بداية حلمنا
ياصاحبي ليه بتحبني؟
فكر كدا
علشان انا منك وليك
وارسم مابين ضمة عنيك
صمت المدي
لكني وحدي باعترف
ان الخطاوي وحلمها
صبحت خلاص
متجمدة
فسامحني لو جيتلك ف يوم
وسكنت جوة الأوردة
لكني ميت من زمان
وسط الهموم
لكني ميت من زمان
وسط الهموم

جرس الرحيل...
**
يارحلتي
دق الجرس
آنت ساعات الرحلة تجري ع الرحيل
ولافيش بديل
كل السكك متشعبطة بسكة أمل
حتي النجوم
ماعادتشي قادرة ع السهر
لما انفرط عقد الحياة
ولاألف آاااااااااه
ممكن ترجع رحلتي للمبتدا
مين اللي هالل من بعيد؟
أو حتي مين اللي ابتدا؟
يارحلتي
دق الجرس
هرب الحرس
نزلت دموعي لوحدها
مالهاش ونس
بللت كمامي ف جريها
مين زيها؟
قادرة تشيل عني الآسي
طب ليه بقي فضل المسا؟
والفجر ضاع
من كام شعاع النور هرب
لما سمع صوت الجرس
يارحلتي
دق الجرس!!
***************

تل بركه
(شعر احمد ابراهيم)
مهداه الى روح سليمان خاطر

تل بركه هو الموقع الذى حدث به الحادث المعروف وقد قام به البطل المصرى سليمان خاطر

(مفتتح)

اجمل ما فيكى اللقا
يا أرضنا الطاهره

واجمل ما فيكى ايديكى وعنيكى

واجمل ما فيكى ان انتى جوانا

(1)

دا تل بركه ولا تل ابيب

دى رصاصه طالعه ولا جسم غريب

ودا رمل سينا ولا دى الجنه

ودا دم نازل ولا دى حنه

ولا كان ف بالنا . ولا كان خاطر

يبقى لنا غدر الصحاب هالل ومنا قريب

ودا تل بركه ولا تل ابيب

(2)

دا تل بركه ولا خان يونس

مين اللى خان يونس

ابعد نواحى اللقا كانت مدن تونس

واقرب نواحى اللقا كانت مدن بغداد

الشمس كانت طالعه من سينا

غداره يا تذكِره مين اللى نسانا؟

مين اللى خبا الضى م القناديل؟

مين اللى جاب الدمع للمناديل؟

مين اللى بكى الام يوم العيد؟

مين اللى بكانا؟

بكتنا وابكانا

مين اللى طفى اللهفه ف عيونها؟

تستنى م الشباك لحظة رجوع لحبيب

ودا تل بركه ولا تل ابيب

(3)

اشكيلك انت ولا تشكيلى

لو كنت رمحى ولا سكينى

ادعيلى ارجع لناسى ومبدئى ودينى

وابعد ساعات الوجع عن دمعتى وعينى

تبقالى انت الدوا

وانت اعز طبيب

ودا تل بركه ولا تل ابيب

(4)

جوانا شىء اختفى معرفتلوش معنى

وبقينا ننسى الحياه ولا ننسى اوجعنا

عايزين ضيا م السما يمكن يرجعنا

سيبنا احتمال النضال وضربنا خدر الغيب

دا تل بركه ولا تل ابيب

(5)

يا دمعة العين ارفضى

يبقى سؤالك صمت

ازاى هننسى الالم

والذكرى لم بتغيب

دا تل بركه ولا تل ابيب

*****

قصيدة ضل...

نفسي الحقك ياضحكة امبارح
أرمي السلام السعيد
واسرح كما السارح
ملكوتك الصافي ملك روحي
طبطب عليا الطبيب
مالقاش دعوة جروحي
دون حروف الكلام
قالي يادوب بلسم
أما الدوا المطلوب
(يفضل أمل طارح)
****************
عديت خطاوي كتير
ف الزحمة خطيتها
لما نقول نصها
بذنوبها خطيتها
أبقي ياعمري اللي راح
كل اللي راح مشاوير
******************
لما باخش الغية لحمامي
ارمي سلامي وابص للزغاليل
اقطف جميل الكلام
وانشدها عين وياليل
أليقي الطريق أبيض
والضلة قدامي

ولو هانت...

وآه ياضحكتي لما تغالطيني
تنسيني أكون ازاي؟
أهون ازاي؟
وأمشي ف الطريق ازاي؟
وانا إيدي علي عيني
وآآآآآآآآآآآآآآآآآآه
ياضحكتي لما تغالطيني
قسمت العيش وجبت الملح
نسيت حتي أساس الجرح
وقلت أكيد
سنين طالت
ومستني يهل الفرح
قتلتيني
لاعيش جاب الأمل ليا
ولاملحك يكفيني
وآآآآآآآآآآآآآآه
ياضحكتي لما نغالطيني
علي قولك رميت أحزان
وقلت أكيد مابين خلان
هالاقيكي تطاوعيني
أنا باكره تكوني ياضحكتي صفرا
ومش طالعة ولاشفتك كتاب طالع
واعيد فيه العلام مرة
وبالمرة
خدي عيشك
مع رغيفك
مع زيفك
وتزييفك
أناقادر أعيش بالملح
مدام صابر
وقادر ربنا وحده
يزيح الجرح
وقادر ربنا وحده يزيل الجرح
وقادر
ربنا
وحده
يزيل
الج
ر
ح

أنا باكرهك...
****
لاعدت هاكتب فيكي شعر لا
ولاعدت فيكي أأقول كلام
بعد اللي بان
بعد اللي كان
لو تسمحيلي أكرهك
يمكن ساعتها احس اني
ف الحقيقة
مش جبان
من عنفوان كلمة شجاع
هاستأذنك
ان اكرهك
ياواخدة مني بريق ضيا
سموكي أرض الأوليا
أما الحقيقة فهي
انك بنا متكدرة
ومقدرة
ان الصغار ليهم مكان
اما الكبار
واقفين
يطلوا ف مندرة
غاويين يعيشوا المنظرة
انا قد أيه كنت الحبيب؟
ولانتي عني هاتكدبي
أوتهربي
أنا باكرهك
انا ياما شعري قلتو فيكي
وف عنيكي
كنت جوة الحضن اسكن
بين ايديكي
طب بعتي ليه كل اللي كان
بعتي الحياة
بعتي المكان
بعتيني ليه وسط الطريق
وصبحتي بيا كافرة
مش كنتي قلتي زمان ضنا
قصدك ضنا
يعني التعب
ولا الضنا يبقي الوليد
فهمك غلط
كلك غلط
حبك غلط
وعشان كدا انا
باكرهك
باكرهك
باكرهك
*************

__________________

..........
************
البحر كان يمي........
أيه اللي ماخلوش؟
عكس اتجاه الريح
ياخطوتي ضمي
لمي بداية اغنيات
حطيها في دمي
يمي.........
يابحر كنت قريب
وانا كنت ليك درويش
أزعل أروح يمتك
أستني نور ضحكتك
أشعر بإني باعيش
وساعات بتبقي حبيب
يابحر كنت قريب
يمي.......
الفجر كان قبلتي
والصبح كان فجري
النور منور سكتي
فخرجت من بدري!!!

يمي........
يابحر جيت يمتي
وهربت ليه مزغوف
انت اللي جيت نحيتي
والا اللي جالي الخوف!!!!!!

___

أفتح بيبان الذكري والماضي

ألقي قصادي الغيم حبس عيني

أرمي عنيا جوة شباكك

بيصدني شيش الرؤي واغيب

تراكيب نقوش الفكرة سرقاني

ألقاني جوة التيه ووحدي غريب

أمسك سطور الذكري ف الكراس

حرفين صغار كنا كاتبينهم

هلت سنين الغربة ف جبينهم

إسمك قمر بيضوي ف الضلمة

لكنه مابيضحكش

راسم ضيا الرؤيا قصاد عيني

بينور الدرب اللي تاه مني

ويلم توبه الصبح ويهاجر

أسند إيديا لجذع شجرة قديم

أشعر برجفة كنا حاسينها

والمح ندا عينك : بلاش ترحل

لسة نقوش الذكري مالكاني

رغم ان لسة مكاني ماسبتوش

لكن وشوش الخلق مش باقية

لكن صورتك وحدها ف عيني

لكن صورتك

وحدها ف عيني

لكن صورتك وحدها ف عيني!!

_______

صباح الخير ياطيبة
يالمانا
وجمعانا علي حبك
دوا قلبك
احاسيسنا بتتجمع
حواليكي
نمد ايدينا ف ايديكي
ونتلاقي
شعور واحد
هدف واحد
بنتواحد
علي حبك
صباح الخير علي عيونك
علي ولادك
علي كلمة تكون صادقة
تكون زادك
علي اشعار تكون نورك
علي ابداع
بألف دراع
يوصل كل مانحسه
علي الشاعر
علي حسه
علي القصاص ولوحاته
علي الوطني وآناته
علي تصميم يكون هايل
يكون شايل امل طارح
علي همسات غلبها الشوق
ونطلع فووووووووووووووق
خيال سارح
بيسمعنا
ويجمعنا
حواليكي
اناديكي
صباح الخير
***************
أحمد ابراهيم

خدوا عمري....
****
خدوا عمري وصبري وحيلة أمري
وادوني مكانهم كلمة صبر
ادوني مكانه قلوب بتحب
فياإما وصلت لطلبي وغايتي
وياإما هربت....
خدوا عمري الضايع مني
وانا مستني
نجمة ف ليلة سهري
تعدي وتدي
سلامها آمان
ولااخافشي تكون سهتانة جبانة
بغدر ان كان
خدوا عمري ادوني مكانه صديق
يشعر بوجودي ف قلبه وحبه
ويكون انسان
وياإما اعيش الباقي ف صمت قبور
لاطلع للنور
واستني العمر الباقي
***************

المولد..

بركاتك حلت

هلت..

زادت فينا الحزن ماخلت

80%ومية المية عقولنا اتشلت

ماتاخدها وراثة

وهات النونو علينا رئيس

هاتلاقي الدنيا ف فرحة وهيصة

وهو عريس

ياتروح تتنيل سافر برة

وشد رموشك واعمل وش

وأدينا يابركة بناكل بعض

ونسرق بعض

وكفاية علينا الدود والمش

80%ياظالم ليه اومال؟

جبت الأموات ينتخبوا البيه

لساك توعدنا بأحسن حال

من بعد السرقة وبعد النهب

وبعد الغش

لسالك وش

أهو مولد وانت عليه قبضاي

كرباجك لسوع ضهر الناس

وانت مابتحس

من صخر ملامحك

وشك غشك

كدبك لونك

اسمك حسك

إنفض المولد

ولاطولنا حلاوة المولد

ولاحمص باقي بعد الغش !!!

بعد أيه؟؟
][وطنك حزين زيك
والشوف خلاص ...إنزاح
طعم الجراح (ولو انه شيء عادي)
يترك سؤالك للمدي المكشوف
وتشوف كفوف ترمي السلام(دايما)
ليه الوداع حتما يكون
واقع
تبدر حروفك وخوفك وتنادي اصحابك
تمسك كتابك
وتعدي ع المحنة
محنة ورا محنة
لسة اللي باقي كتير
علشان يجرحنا؟
طب بعد أيه؟
جالك ندا الصحيان؟
تعبان اكيد
هدك سكاتك
وصمتك
صبرك
وتكوينك
طب بعد أيه؟
بعد اللي راح منك
(هما يادوب حبة سنين هربوا)
ودخلت صمتك تعاني
لكن السؤال فاضل
بعد أيه؟
بعد أيه؟
بعد أيه؟
**************

مستحيل
كل الكلام رغم الملام والصمت داير والسكات
وعيون مليها الموت
كتر الدعا صحا اللي مات
اصل اللي مات فينا الضمير
مابين صغير او كبير
سكت الكلام
الصمت بركان الشعور
والنور مفارق حينا
لاعرفنا مين فينا اللي مات
ولا الباقي ف حينا
اخر كلام

اخر كلام وطريق طويل
كما بعد ليل الحلم عنا
ازاي نكون؟
هو احنا جينا ف وقت راح
ولا الجنون
من امتي كان الفجر راح
الفجر لاح
جايز لغيرنا يروح قوام
واحنا يادوب خدنا البكا
اخر كلام
اخر كلام

لما يزيد يوم الوجع

لما يزيد يوم الوجع
أنده لمين؟
مش كل شيء راح.انتهي
أنده لمين؟
أسند علي كتف اللي باع
ولاعلي كتف الحزين
أنا من سنين
ماعرفتش اني اشتري
أنده لمين؟
الصوت ملاك
لكن جواه الهلاك
والضحكة عالية مجلجلة
وقت الأنين
أنده لمين
للي باعوني ف رحلتي
ولا السنين
أنده لمين؟
لما يزيد بيا الوجع
أصرخ لمين؟
ماعرفتش اني اكون ملاك
أأقبل علي نفسي الألم
واقفل علي قلبي الحزين
ماتزودوش ليا الحمول
ضهري ضعيف
صوتي ضعيف
وسيبوني وحدي ف محنتي
توبي نضيف
لما يزيد بيا الوجع
********************

عنقود غضب
**********

ماتزيفوش المعني لا
ولاتحرموش حق الحياة
لو قولت آآآآآآآآآآآآآآآآآآآآه
فياإما تاخدوا المعني بالوجع المباح
ولاتهدروا دمي الضعيف
ولايستباح
ياطالبين الصبر من قلبي /الوجع
عديت سنين العمر بالراحة
ولاكنت قاري الكف
ولاضارب ودع
أعرف بإنك ياسنين مابترحميش
إزاي هاعيش وعنيا ملياها الدموع
إزاي اجوع
وف قلبي لسة الحرف
مليان بالحياة
لو قلت آآآآآآآآه
فياإما تاخدوا المعني بالوجع المباح
ولاتهدروا دمي الضعيف
ولا
يستباح!!!

وآاااااه ياصبر....

مابين معشوق وبين عاشق
انا راشق كلام الصمت
صبرت كتييييير ولامليت
ياريت ياصبر ماتبيعني
وتفضل في الفؤاد راشق
***********************

موال عشان الصبر:
الأولة صابر
والتالنية: متحمل
والتالتة: قدري
الأولة صابر وكان اسمي وراضي بيه
والتانية متحمل ولو كان الأمل في التيه
والتالتة قدري ولايمكن راح ابكي عليه
الأولة صابر وكان اسمي وراضي بيه وعشت معاه
والتانية متحمل ولو كان الأمل في التيه راح امشي وراه
والتالتة قدري ولايمكن راح ابكي عليه ولايمكن أأقول الآه
************************