ديوان الشاعر / أحمد ابراهيم

ليه…….؟

***********

مليون سؤال انطرح قلبي انجرح بيهم

غلبانة ياسكتي مفروشة بالدمعات
تستني ليه الزمن وتمدي للمسافات
هو الزمان ملكنا
ولا يادوب.. حكايات
جبت المراكب مواكب وشراعي ليه مكسور
أنا ليه باقيد الضلام واستني طلة نور
ف الفجر فجر الكلام يطلع شعاع يضوي
من بدري رامي الشبك
ومعايا قلب حزين
فجأة لقيت الشبك جوة البحار بيدور
مليانة بيه السنين
ولايكشف المستور

إنصهار

(مهداة إلي جابر المصري)
______

برق الوميض ف عنيا لما قلتلي
علي قد حبي ماهو ليك
يبقي أكيد بتحبني
__________

سرحت عيون الفكر مني ف الطريق
طل الندي بشوق احتياج
محتاج لأرض مخضرة
محتاج لضحكة منورة
طل الندي
وكأنه ضمة أم أو ضل انفرش
شدا البكا عيني من السرحان
نزلت دموعي ماحوشتهاش
بصيت .لقيت الفجر طالع بالأدان
أحد أحد
فرد صمد
رجعت دموعي تعزني
رجعت دموعي تهزني
لما المدي قرب وطل
جوايا ألف سؤال هرب
حسيت بلحظة إنصهار
لما النهار مد الخطا
راجع بحلم من النهار

ديوان(الليل والقمر)

بمناسبة انتصارات أكتوبر

يابلدنا النصر .. جالك

شعر/

أحمد إبراهيم أحمد

______________

يابلدنا النصرجالك

وبعزيمة بإيد ولادك

بعدليل كان ضلمة حالك

واحنا زوادك وذادك

يابلدنا النصر جالك

غيروا التاريخ وقولوا

مصر دايما نصر غالي

رددوا النشيد وقولوا

راح تعيشي في العلالي

رمل سينا بلون شهيدك

حتي لونه بلون ترابك

وانتي كنتي مادة إيدك

جوة يسكن في رحابك

يابلدنا النصر جالك

انهاردا سينا عادت

والكرامة رديناها

دي بلدنا مهما شافت

نجم ليلها في سماها

فوق جنودك بصي قولي

ياولادي انتو ذادي

نفسي اعلق عقد لولي

ف الرقاب ويا الأيادي

يابلدنا النصر جالك

آدي ليلك مهما طال

النهار لابد طالع

واحنا مانعرف محال

واسألوا صخر المصانع

الشهيد في كف إيده

إسمك انتي جوة قلبه

وادي نصرك راح يعيده

حي عايش عند ربه

يابلدنا النصر جالك

الملاحم ينظموها

والبطولة طبع فيهم

والحقيقة رجعوها

أرضك انتي بين إيدهم

يابلدنا النصر جالك

وبعزيمة بإيد ولادك

القاهرة 1985

ضل..
أحمد إبراهيم

نفسي الحقك ياضحكة امبارح
أرمي السلام السعيد
واسرح كما السارح
ملكوتك الصافي ملك روحي
طبطب عليا الطبيب
مالقاش دعوة جروحي
دون حروف الكلام
قالي يادوب بلسم
أما الدوا المطلوب
(يفضل أمل طارح)
****************
عديت خطاوي كتير
ف الزحمة خطيتها
لما نقول نصها
بذنوبها خطيتها
أبقي ياعمري اللي راح
كل اللي راح مشاوير
******************
لما باخش الغية لحمامي
ارمي سلامي وابص للزغاليل
اقطف جميل الكلام
وانشدها عين وياليل
أليقي الطريق أبيض
والضلة قدامي
****************

ولا بخاطري............

ولابخاطري أكون زي الشجر واقف
وقلبي عليل
أنا ماعرفش اكون غنوة يدوسها الليل
أنا ماعرفشي اكون كداب
ولو جاني الزمن يزعق
أرد الباب
ولابخاطري
أكون قلقان من اللي جاي
فحن عليا ياصاحبي وقولي ازاي؟
قصاد عينك مدي واسع
ومش شايف طراطيفي
أكونشي ف ضحكتي واهم
أكونشي ف ضحكتي كداب
أكونشي ف قولي باتمرجح
مابين زيف الحروف باحبي
وبيني وبينها شكل سراب
أكون كداب
يجوز انفع
ولابخاطري أكون كداب
***********

المدي................

لون مداين شمس بكرة
شايلة ذكري
شايلة قلب ماشفتهوش
والوشوش اللي ف طريقها
لسة زحمة
شايلة بكرة
أما بكرة. ماعشتهوش
المدي عمال بيوسع
والخطاوي لماترجع
مين يحوشها؟
المدي مد ف طرقنا
رجع الحلم وصديقنا
رجع العمر اللي باقي
واشتياقي يبقي فكرة
المدي.....................
ياصوت بيضعف
لما هاضعف
مين ينادي
من هايبدر لحن قلبي
العيون ولاالأيادي
يامدي خليك فاكرني
يمكن ارجع
قصدي اقدر اني ارجع!!!!!!!!!!!
__________________________

أنا اللي ضحكتي ماتت بقالها زمان

(قصيدة ليست مهداة لأحد)

****************

رسمتك ف المدي ياشوق
طلعت لفوق
وشبكت المني ف عينك
سألني صاحب الرؤية:
وعايز أيه؟
هزمت أجابة محفوظة وقلت بلاش
أنا عايز أكون ضاحك
ف وش الناس
ولو جوايا ميت خنجر
أكون حساس
ولو جلدي هاريه الجلد استحمل
واتمنظر
أبان أيوب وانا العاجز
ومايهمش
يادوبك دول سنين راحلة
واهي الرحلة خلاص هانت
جاوبني صاحب الرؤية:
أنا مااقدرش اجيب ضحكة
أخدها الموت
عرفت ساعتها ليه قلبي
ماهوش قادر علي الضحكة
عرفت ساعتها اسحمل
ولكن ضحكتي ماتت
بقالها زمان!!!

__________________

ياصحبة.........

لفين ياخطوتي رايحة
وسابحة ضد احلامي
وقدامي الطريق غايب
انا سايب أمل عايش
يجوز يمكن ف شرياني
أنا تاني رجعت حزين
فمين ياصحبتي يقدر
يلم الباقي من عمري
ولو حتي بواقي سنين
ياصحبة
يجوز لميت بواقي سراب!!!
يجوز بعت الدهب بتراب!!!
يجوز حلمي ماهوش قادر
مع الأسباب
يترجم بسمة جوايا
بقالها كتير
أمانة ياصحبتي هامشي
فكونوا تماللي ويايا
ياصحبة
*****
__________________

عيش وملح ......
*********
وتجري الحروف اللي عاندت لساني
بتسرق زمانك
وتسرق زماني
وتاخد ف سكة هروبها اللي باقي
برغم اشتياقي لقول القصيدة
بالاقي الحروف اللي كانت معايا
حزينة وعنيدة
أقول لك ياصوت انت فاكر مابينا
دي عشرة حروفنا بتصرخ وحيدة
اكيد اللي ماسك لجام الكلام
ملسوع ضهورنا
ورافض ظهورنا
وطالب تكون الحقيقة انهزام
فطبطب علي كتفي لما تلاقيني
وبص ف عنيا
هاتلقي الدموع اللي رافضة الحقيقة
بتسكن ف عيني
وتمسك ايديا
تعدي معايا المحن والصعايب
ولو كنت هايب
هاخلي اللي بيني وبينك يقولك
يصحصح ضميرك
ومايكونشي غيرك
مقاسم حياتنا
وواكل ف عيشنا
وراشش بملح المعزة بيوتنا
فحاسب عليا
وعدي معايا سنيني اللي جاية
***************

الليل...................

الليل مضي..................
لملم عبايته ف توب سواد
هل الميعاد
شاور بإيده لكل حي
أنا برضو جي
مهما تكون التجربة
النبض حي وألف حي
جايز هاقابل ف الطريق
حلم انسرق
أو توب ملايكة والبشر
فاردينه ضي
جايز هاقابل ناي حزين
أعزف عليه وتر السكات
اللحن يفلت م الثبات
يرفض يخوض التجربة
جايز يكون الليل مضي
لكنه جي
لو مرة تاه مني الطريق
أو صدري بالأحزان يضيق
لامرة هاشكي من بعاد
ولاهاشتكي ظلم الصديق
الليل مضي
ساحب معاه ضي القمر
ياهلتري هو سحب مني الحياة؟
ولاادا كان المفترض
لحظة سفر!!!!!!!!!!!!!!
*******************

طاقة الشهد ف كلام
قلبي ينام
علي فرشة اصحابه
مهما يدق الباب غريب
مايصيب بسهم الغدر نبض
أعلن حدود الرفض
وارضي بالسكات
بتعز علي عيني الرؤي
ولساني بيشله السؤال
أصل الكلام
أصل الحكايا...
ياقلبك البفتة افتكر
أنا كنت مين؟
عزت عليك التذكرة
ومسحت بأيديك الكتير
حتي السنين................
أيام ماهيش وحدك لها
من طعمها
من ذلها
من غدرها
من فرحها
دامت لمين؟
بتقولي ليه طبعك حزين؟
راح اقول وصدق ياصديق
جوايا شرياني يضيق
من دم كان لونه غميق
جابتله أسراره المحن
والوحدة في وسط الطريق
أصل الحكايا.....
من فرع شجرة لجدرها:
أنا مش هاكون من أصل ثابت
إلا ان يكون
الجدر في الأرض احتمال
مليون سؤال
دايرين علي نفس السؤال
ماتقولي ايه اصل الحكايا
لتسبني وحدي أموت غريق
لتسبني وحدي أموت غريق
************************

أمينة يادموع عيني.............

***********

وحتي لما خنتيني
أمينة حتي ف سكاتك
ف آناتك
ف لحظة جرح متآلم
أمينة وقلبي ماتكلم
أمينة يادموع عيني
هاقول لك قولي سامحيني
وطاوعيني ف وقت فراق
انا سبت الحياة تهرب
فخليكي هنا جمبي
يجوز الذنب مش ذنبي
وسبت عزيز علي عيني
فسامحيني
يعز عليا قولة آااااااااه
وانا اللي الصمت داواني
وخلاني ابيع الرحلة برخيصها
عشان الغالي كان جاني
عشان الغالي كان جاني
أمينة يادموع عيني

***

يفضل سؤال

*********
رغم المسائل والتفاريح
أنا قلبي جريح
ماعرفش أكون غير ماتمنيت
واكره قوي بعدين وياريت
بارسم حروفي بدمعاية
خليك معايا بنور قلبك
برهنلي علي نغمة حبك
وازعل قوي لوقمت . مشيت
أيه اللي فاضل ف الأعمار؟
كام ضي نهار
ملكنا م الأشعار ياما
رسمت حروفنا بدوامة
رسمت لنا سكة وطاقة
والف سلامة
مليون سلام لجناب الشعر
لو حد جه يسألني سؤال:
لوكنت قادر ع الموال
داماكنش الحال
ضفر كلامك بسلامك
ماهو هو دا يصبح مالك
بعد الأميال.........
قابلت ياما كتير شعرا
وافضل اقرا
لحد عيني ماجت في سؤال
لومت مين هايكون بعدي
ويصون عهدي
يفضل يسبل في عيوني
ياكلمتي وفين ماتكوني
دايما ف سؤال
أأقول لكم قولي وهامشي
تعبت جدا م الأشعار
ماطلعلي نهار
حتي السؤال أنا ماعرفهوش
مليان برتوش
سلام بقي وبعدين هانشوف
ان كنا قادرين ع الكلمة
ولا يادوب هانموت م الخوف!!!!!
***********

( بغداد_ 2)
________

ياتوب مزخرف بالوجع
يامادنة مالقتشي الأدان
أنا مش جبان!!!
علشان أسيبك للزمن
علشان أسيبك للخيانة
والمهانة
والهوان
أنا صوت حزين
جايز ف لحظة يسمعك ويسمعك
صوت اللي زيي مايقدروش
غير ع البكا . غير ع السكات
بغداد وانا
مليان آنا
مشحون بصورة صرختك لحظة عنا
مشحون بصوت طفل إنقتل
جايز أنا..................
بغداد
أصعب من الموت الخيانة
واصعب من الذل انكسارنا
احنا اللي فرطنا ف نهارنا
فرطنا في حق الأمانة
بغداد............
النيل هناك جمب الفرات
ضفة بتصرخ م الألم
بيرد صرختها السكات
يرسم بتوب لون السواد
يرسم حداد
يصرخ بصرخة م الوجع
( الله واكبر ياأدان
كتفا سلاح
الصلاة زي الكفاح
الله وأكبر ياأدان
الصلاة زيي الكفاح
الصلاة زيي الكفاح)
____________________

قبل الرحيل
___________________

(ليه تهجروني وانا راحل وفايتكم) ..........بيرم التونسي
_____________________________________________

أنا جيت معاكم هنا لجلن دموعي تروح
بصيت لقيت المدي بيشد مني الروح
أصبر علي دمعتي..............
ولاكفاية جروح!
هارحل بعيد عنكم سايب لكم عمري
فبلاش ياصوت الرحيل
أرحل وانا مدبوح!!!!!!!!!!!
__________________
أوقات تكون ضحكتي
ملو الفضا والكون
وساعات تكون دمعتي
بتبين المكنون
أصرخ أقول يابشر
هوا انتو ويايا
القي الإجابة هدر
أرحل لفين ماتروح!!!!!!!!
_______________
عشمي يايوم تبتدي
وكأني لسة وليد
باحبي ودي خطوتي
ويا السنين بتزيد
طب ليه بعمر السنين
خارج من المواليد!!!!!!!!!
_______________
ياشعر وانت البطل
وانت اللي قولك حق
شجعني إني أقوم
اصرخ بكلمة لأ
احضن حروف كلمتك
لو مت أبقي شهيد!!!!!!!!!
__________________
ياصحبة واتذكروا
إني يادوب راحل
سايب لكم ضحكتي
وفايتكو بمراحل
دانا جيت معاكم هنا
لجلن دموعي تروح
لجلن دموعي تروح
_______________________________________

ولا تقدري
******
فكرك كلامك هزني
أو يوم غرورك هدني
لو كنتي قادرة تفكري
لو حتي صوتك ف المدي
قرب وعشمه يشدني
ولا تقدري
مغرورة جايز بالكلام
لكن غرورك دمرك
خلاكي عاجزة تقرري
ولا تقدري
الحق ليه صوت اليقين
لكن انتي مين؟
لجلن تحاولي تفسري
بعض الحروف من دفتري
جايز كلامي يوجعك
انا جيت وهدفي اسمعك
مش أسمعك..
أصل اللي زيك بالغرور
مالهمش صوت
عشش علي عقولهم سكوت
وخبوط تقول هي الدموع!
لكنها فعل الغرور
لما يفكر يبقي شيء
حاولي لكلامي تفسري
ولا تقدري
انتي يادوبك تعرفي
اسمك ويمكن تغلطي
هاتزعقي وتلخبطي
أصل الحقيقة لو تكون
يقبلها صدر يكون حنون
ايوا أرفضيها وقرري
مش قلت : ولا تقدري!!!!!!!!

أحمد ابراهيم

أنا مش هاتكلم! إلي صديق

___________________

راح اخبي دموعي وعمري وجوعي
وارسملك ضحكة تكون بهتانة
لو تسأل : ليه الرحلة اتقسمت؟؟
والاقيك تتمني أو تستني
لحظة موتي ولا رجوعي
راح اسيبلك كل العمر الباقي
راح اسيبلك كل الهمر بأيدك
يمكن بالصمت الحزن يزيد
أو إني بصمتي يجوز هاتألم
لكني أكيد مش راح اتكلم!!!!
**********
أنا طالب منك إنك تنسي حروف عشناها
أو لحظة صدق مابينا اتوجدت
سيبناها اتقتلت.....
ومشينا ف لحظة نشوة عجيبة
قدامها يجوز
أو حتي وراها
أنا مش هاتكلم!!!!
***********
أنا رافض صمتي وموتي
وذل سكوتي
وانا رافض انك تبقي الخنجر
مستني ف لحظة عتمة
( ماتفض العمر الباقي ف عمري)
وتسيبني يجوز أقدر أتألم
لكني أكيد
مش راح اتكلم
مش راح اتكلم
مش راح اتكلم!!!!!!!!!!
****************************
أحمد ابراهيم

ولوانك عارف..

محتاج ارسملك سكة بحر..

وسكة نجم يكون عنوانك

محتاج أشجانك..

بمكن الاقي الباقي في عمري

واشيله عشانك..

بترجرج فيا الدمعة سكوتك موتك

انا هادخل بيك الدنيا الواسعة

وهاقولك غطي دموعي وحزني

لكن ف اللحظة الفاصلة

ألاقيك بتسيبني

ولوانك عارف قيمة نفسك عندي

بتصر صحيح علي عندي

وتصر بإنك تبعد تبعد تبعد

وكأنك عارف إن البعد بيجرح

ويوسع بينا الكون والمطرح

محتاج لوجودك جمبي صديق

اشعر بالضيق ألقاك

أفرح بالكون وياك

راح اعدي الغربة واجيلك جري

أخدك بالحضن

أبعد بالحزن

فمادمت معايا فأكيد الرحلة براح!!!

***********************

أحمد ابراهيم

رسالة إلي الأسفلت
__

ف شكل انحدار الطرق والشوارع
ف شكل اللي شاري
وشكل اللي بايع
ف شكل الرصيف اللي خبا متاعبه
وشكل اللي تاعبه
رسالتي اليك النهارده استغاثة
ياريتها هاتوصل لإيدك لوحدك
ومايكونشي لازم كتاب الوراثة

عزيزي المسفلت
صباح المتاعب
صباح اللي ماشي علي صف واحد
يادوبك معدي لجسر المصايب
مدينتك زحام
بتسرق مابينا وشوش الكلام
وتسرق مابينا جميل المشاعر
ولو كنت شاعر بتعرف تصور
ماكنتش رسمتك بإنك مسفلت!!
عزيزي المسفلت
مساء الحزانا
مساء اللي جولنا
وفي جوة منهم سلامهم أمانة
بطيبة كفورهم
وحنيت ضهورهم
كفورهم .. قصورهم
مساء الغلابة
عارفهم
شايفهم
سايبهم لعيشهم
وأخر نهارهم بتطرد صغارهم
بيوتك بيوتهم
علي رأي واحد خواجة اما شافهم
بيتفوول .. بيتفوول
ياليل المسفلت
علي كام رصيف بينامولك غلابة
علي كام رصيف سهرانين الديابة
وحابل ونابل
وانت المسفلت
لا شيلت اللي نايم
ولا مرة حتي تشد العزايم
لوحدك مسفلت
___________
( يوصل مع مخصوص
علي أي رصيف مرصوص
لا ف شبرا
لا المرج
وان شالله يكون ساكن ف خصوص)
بياع علي باب الله

أحمد ابراهيم

رسالة إلي الأسفلت_2

تعبان
بتشق غبار الشارع شق
وتسد الشق
لكن بالحق
ربيت حواليك رصفان عالين
تفصل من بين
ماشيين/ راكبين
الكل يجوز م البني أدميين
لكن رصفان الشارع دول
مالهمشي شعور
لو نام جمبيهم طفل يتيم
أو أب حزين هربان م النور
أو دمعة عين واحد مسكين
بتكون حوالين رقبتهم طوق
ماسك سكين
وانت الأسفلت
جواك حكايات
وياريتك قلت
ماهو أصعب شيء جواك الموت/ الصمت
وانت مابتموتشي
ياما فوقك داس
عجلات أوناس
احمال واكياس
لكن ولامرة ف يوم وطيت
ولاحتي ف لحظة ذل بكيت
أجمد م الصمت
لابتعرف امتي ميعاد النوم
ولاحتي فمرة قدرت تقوم
دايما رقدان
تعبان
ت عبان
بتشق غبار الشارع شق
لاف مرة قدرت تقول اللأ
ولاحتي تفرق بين
صوت الباطل
أو صوت الحق
____________________

قلبي......مدن

ماعرفشي ليه
ضحكة عيون الشمس لما روحت؟
ورمت مداها للمدي المهزوم
رسمت ضياها ع السكك
وسابتلي قلبي ينجرح بهموم

ماعرفشي ليه
كلمة وطن غابت
سابت مداها للبراح يرمح
ياهلتري القلب يقدر ينطقك
ويفسرك
ولادي كلمة تتنطق بجروح

ماعرفشي ليه
قلبي صبح تايه؟
جواه حصار الدمع والغربة
جواه مدن بتنادي للمساكين
قلبي حزين
لكنه فرع خضار
قلبي نهار مستني ليه ليله؟
خايف يعدي الليل علي سهوة
فيتوه مابين
الدمع والغربة!!!!!!!!!!
________________________

ياطير..

ياطير البراري

تعبت الوقوف

علي باب صحابي تعبني السؤال

طلبتك تسافر

ياعايش تعافر

رفضت الإجابة ودقت المحال

مابين إبتسامة

وبين دمعة نازلة بتترك علامة

فلاالأرض ممكن تكون بنت يومك

ولاالشمس تقدر تزيح من همومك

ولاانت هاتقدر تشيل الحواجز

تشيل اللي حاجز

مابين رغبة قايمة عشان اللي باقي

ولاانت هاتطفي لهيب اشتياقي

مابين انتصارك

وبين الضلام اللي عشش وزارك

علي مين تنادي ياطير البراري؟

تلقط حبوبك

مابين طعم علقم وبين انهزامك

فلا الصوت بيقدر يعيد اللي فاتك

ولاحتي يقدر يترجم كلامك

بتعلا وتعلا

تشرق تغرب

وتبعد تقرب

مناجل هاتقطع حبال اللي واصل

ولاكانشي حاصل

مابين الضيا والشعاع المسافر

بتشعر بنارك

بذل انتظارك

علي ضفتين من ثواني ودقايق

علي ضفتين من تشرد وحيرة

بتستني يمكن يهل الميعاد

ولاكانشي قصدك ف يوم البعاد

بتعلا وتعلا

وترسم دواير

وتستني يمكن تهل البشاير

ولكن ياطيري

تعبني الوقوف

تعبني السؤال

تعبت التمني وكتر التجني

وضيعت عمري ف رسم الأمال

أمانة ياطيري

إذا ماانتهينا

وقبطان سفينة ينادي علينا

تعاود ونادي

عليا السنادي

ياطير البراري

ياطير البراري

************

المدن

لصاحبي اللي سافر

لما تعدي المدن فوتني وحيد جمبك

الذنب مش ذنبك

لكنه مش ذنبي

أوقات كتير بالقاك بعيد عني

جواك بتصرخ

وانت بتخبي

فارد شراع المركبة وراحل

سايب لمين الضحك والاناشيد

أنا صوت خلاص انتهي

وماعادشي فيه مواعيد

فيإما تركب معايا ونبدأ الرحلة

ويإما ابعد بعيييييييييييد

وارمي السلام بالإيد

تشاورلي بالمنديل

تنزل دموع عيني

وتاخدني كل المدن

رحلة ورا رحلة

رحلة ورا رحلة

همهمات

أنا العطشان لنور الضي
وانا العطشان لبكرة الجي
ماتسألنيش أكون ازاي أمل طالع
وانا جوة الأمل مش حي!!!!!!

عرفت ازاي أكون صاحب
وبتصاحب علي همي
يادوب الحرف يتصاحب
يدوب يمكن عشان دمي!!!!

لفين ياخطوتي رايحة
ومش سامحة أكون بيكي
أنادي عليكي ألاقيكي
بعكس الرؤية ماتسامح
مسامح يامني عيني
فسامحيني!!!!!

ساعات بالتقي نفسي
كتير باظلمها ويايا
حكايا لسة غنوايتي
فمين ينشدها ويايا؟؟؟؟؟!!!!!!!
***************

ضنا............

ياشعر ماتقولشي الكلام
لو كان كلام
خليه سلام
بيمد ايده لخد حد
يمسحله دمعة بتبني سد
عارف مداه بيروح لفين
لكنه شد
ياشعر طبطب بالكلام
علي كتف أم
ضم الكلام خليه يضم
قدم لها حبة حنين
حبة حنان
ماهو هو دا يبقي الأهم
ياشعر حود ع البيوت
هد السكوت
واكتب لهم موال قديم
مليان ياليل
ولافيهشي موت
ياشعر خليك الضنا
لو يومنا زاد فيه الضني
اسند عليك
وامسك ايديك
وساعتها يمكن
تبقي انا
*********************

(باحبها وهي مالكة الأرض شرق وغرب
وباحبها وهي مرمية جريحة حرب
باحبها بعنف وبرقة وعلي استحياء
واكرها والعن أبوها بعشق زي الداء
واسيبها واطفش في درب
وتبقي هي ف درب
وتلتفت تلتقيني جنبها في الكرب
والنبض ينفض عروقي
بألف نغمة وضرب)
علي إسم مصر/صلاح جاهين