ديوان/ الدكتورة الشيماء

(29)

الحب لما يموت القلب ماهوش حـــــــي
ينسى اللي عنده العقل نواره فيه الضي
اما اللي ميت ده ملناش عليه عتاب
يبقى ادالك عمره وربك ده هو الحي

(30)

والله خيارك صعب ياعم ياشـــــــــاعر
عاقل زمانك جن ولاعادش بيك شاعر
ولا جنان الشعور في اوان جنان ف جنان
عاوز نصيحة حر ؟ خليك كده وشاعر

(31)

بصيت انا للقمر فكرني بالماضـــــي
لاقيت عليه مكتوب بقسمتي راضي
ماعرفت يوم انسى اللي ماعمره يعود
ما حلاه الالم والهم لما افتكر راضي

(32)

ياسعده من عاشه ف العمر لو مرة
يفضل على ذكراه بالحلوة والمرة
يشرب ويسقي يعود يشرب يعود تاني
والوصل يامحلاه ف حج او عمرة

(33)

اما انا نفسي يبقــــــــى كده حسابـــــي
ف ال قال عليه النبي ياصحب احبابي
واما قالوله الصحب ما احنا ال معاك قاعدين
قال لاءه ف اخر الزمن حبوني من غير شوف
وامنوا برسالتي شالوها رغم الخوف
والدين بقى عندهم جمر وعليه قابضين
متغربين ف الزمن والغربة دي كتابي

(34)

ياما نفسي ابقى كده زي الطيور بجناح
واسبح انا ف ملكوت يبقى وسع وبراح
اكفي بخير خيري شر اللي سكنوا الارض
ما ليه غير يومي مش ف اللي جاي وراح

(35)

كان نفسي تبقى الهموم بتتقلع جلباب
والظلم يبقى توب ما اعرف لفتحه باب
والفرح ويه العدل جلدي اللي همشي بيه
ما ييجي يوم اقلعه ولا يبقى زي تياب

(36)

نورنا الليلة دي زاد وبان كده رايق
بطلة الاعياد والفرح فيه لايــــــــــــق
ساعة ماشرفنا سي احمد ابراهيم
شاعر ده قيمة واصل ومتلقب (الرايق)

(37)

كان نفسي يبقى الفرح ومعاه الهنا يتباع
وتروح كده للسوق وتشتريه كمتــــاع
وتوزن براحتك كده كيلو هنا وافراح
وتفرقه ع الناس ويبقى ياحلو مشـــــاع

(38)

وكان نفسي ساعة الحزن يبقى معايه مقص
واقطع مكان الحزن من الحزين واقتــــــص
والزقله حتة سعد متجمله بفرحة
ويبقالي كام مفتاح واخزن فرح وارص

(39)

كان نفسي ابقى البطل حتى ف عين بنتي
وافتح قلاع وثغور حواديتها من ستـــــــــي
وادحر كده الاشرار ولا عنتر ف يومه
رضيت ف اخرتها بكلمة عنيكي انتـــــــي

(40)

كان نفسي ابقى جدع واكسب ولو ف الحلم
مايجيش كابوس واتخرع يحرق عليه الفلم
لاضوغلي دايما ينط على حلمي يبقى كابوس
فوضت امري فيه للحي عنده العلــــــــــــم

(41)

كان نفسي ابني الحلم طوبة على طوبه
ولا تيجيش منهم واحدة ف معطوبة
ويتهد بنياني _واجي ابني من تاني
ما الاقيش عمود بنيان يسندلي مخروبة

(42)

ياما نفسي يبقى القول ده حضن ويضمك
ويحسسك ياقمر بشعوري ده نحوك
بس ان عجز قولي انه يوصل ليكي
خودي مني ايقونه عن حبي تشرحلك

(43)

الحب ف الرويات ولد وبنوتــــــــــــــــة
وقلبين وسهم يفوت _وطير على التوتة
ع النوع ده متدورش ع الارض منه مفيش
دورت انا قبلك _ مالاقيتش فتفوتـــــــة

(44)

كان نفسي يبقى الفرح متعبي ف قزازة
زي العطور بنرش__ لو كنا في عازة
ونشيله ونحوش لايامنا ف الزنقة
لكنه شح ياناس _ عجوز بعكازه

(45)

عايشين واهي عيشة وقلوبنا اهي بتنبض
مقسوم رضينا بيه _وساعات كمان نرفض
ضيعنا ياما حاجات ولسه بنضيع
حمى رغيف العيش حتى العيال تركض

(46)

ماهو احنا من حظنا الفرحه مش لينا
تزور ناس كتيره ونشوفها بعنبنا
بس تيجي عندنا تقول مليش مطرح
هابعتلكوا الاحزان قال ايه تسلينا

(47)

كان نفسي يبقى الفرح حقن ويبقى لبوس
وانا اكتبه للناس روشته تشفي نفـــــــوس
وافتح كده عيادة واديرها بالمجان
يدخلها كل حزين _للفرح تبقى فانوس

(48)

يابخت من كان كده الحزن تسلايته
والفرح عنه بعيد _ والحظ كان فايته
كان نفسي انا ابشره بفرحة الآخرة
لكني مش ضامناه _ في قسمته وغايته

(49)

كان نفسي ياسندباد تحيينا بمشاركـــة
وشمعك هنا ينقاد من دمعة او ضحكة
لكننا مسامحين _ مادمت راح ترجع
ولا انت مش ناوي يبقى الرقي شركة ؟

(50)

كان نفسي يبقى الفقر انسان وعنده دم
وف قلبه رحمة وامل وبيفرمه م الهم
انا خفت من ده الامل اما افتكرت الناس
ياما فيها قسوة قلوب حتى الجماد ارحم

(51)

ياما نفسي يبقى الكلام لمبة وبتنــــــــــــور
تهدي اللي عيشته ضلام لدروبه وتصبّر
بس ان بقى ده الحال _مع مين هيبقى الزر؟؟
ومين يقطع الكهربا؟ _امرك يا صاحب الامر

(52)

كان نفسي يبقى الشوق ع القد بعد فراق
ينشف كمية بير ساعة الوجع ينطــــــــاق
لكن يروح الحب واللوعة ليه تفضل؟
مادامه راح الوصل _مش تخلص الاشواق ؟!

(53)

ياما نفسي ف المصباح وطاقية الاخفا
واخفي الالم عنك ما تشوف ولا نتفة
وف طول ما نا جنبك تلمح جناين فرح
يمكن تنول السعد وودنا يصفــــــــــى

(54)

كان نفسي خط السير ف رحيلنا ده بدايره
وتقرب المسافات والمركبة السايــــــــــرة
وساعة ما يبقى وداع يبقى لقا تاني
ونفضل نلف ,,, ندور لساعة الآخـــرة

(55)

نفسك ونفسي ونفسنا والحلم تسلايــــــه
بنداوي بيها المنا ولروحنا دي مرايـــــــه
نكتبها دمع وفرح _ قول طبطبة ع الجرح
ومابقاش لوحدي ف حلم _ اللمة دي معايه

(56)

زمن الحبايب جبر وحساب بقى وهندسة
وموسم يحل عليك احمر غنا ومقلســــــة
ودباديبه ف محلات ورد وكلام صالونات
كله يقول ع الحب , ولا حد قال ميت مسا

(57)

كان نفسي اقولك غلط وكلام ده نفسك فيه
والقرش ايه هيهم والاصل دور عليــــــــه
وشعار عن الاخلاق وشعار عن المبدأ
بس ان فطرت شعار غداك هيبقى ايــــه ؟

(58)

وكان نفسي بدعوة تكون لرب العرش موصوله
اقوله فيها يارحمــــــــــــــن تداوي نفس معلوله
بحبك والهوى ايمان _ ووصل المصطفى الهادي
تلبي للولد امانيه وتديله ولا يلاقي
في وشه سكة مقفوله

(59)

كان نفسي اعيش ف البحر ان شالله حوريه
ولا على الشطين ان شا الله شمسيــــــــــــة
ولا ف جوف الجــــوف جزيـرة مرجـــــاني
وابعـــــد يا ناس البر عن ما جرى ليــــــه

(60)

طفت الكــــون ، وبدرت حـــــروف
وردي وبمبي ، وملــو الشــــــوف
ورجعـــــت اجني _ما لقيت جني
يا اتسرقوا ، يا الارض عزوف !

(61)

نورتنا ، اهلا سلاميـــــــــــــن
نفسي الارض على الجنبيـــن
تطرح اهــــلا قــد الفرحـــــــة
بقدومـــك يــا عــم الزيـــــــن

(62)

هزرع تاني وعاشر حتى لو زرعي كان رزق الــــدود
وايه يعني ؟ وراح املا الدنيا ضحك وجد وخير بيجود
ولو واحد راح يكسب بسمة من كلماتي يبقى يابختي
هكسب اجر سعد المؤمن ومحبة ماليها حـــــــــــدود

(63)

الحب لو عشنــــــــــــاه عشقا ما حده الحد
راح يبقى يومه عمر ، ماعاشه قبلك حــــد
وتعيش على ذكراه ، هجره وصاله جفــــاه
وغربتك وياه ،،، متعة وماليها حــــــــــــد

(64)

الحل عندي انا ف الحب لوعاوز والحل لل يفهم
تدي الحبيب على طول من غير حساب ولاذم
ما تقولش خدت انا ايه منك يا روح الـروح ؟
تسقيه وتشرب وتسقي __ لو حتى طفح الدم

(65)

وردك طرح يافل وجناينه واصلاني
زرعك ف حلم الكل ما تقولي اه ياني
حوشي صويتك بقى _بزيادة ياصفصف
خلي المراكب تسير بالحلم واعداني

(66)

كان نفسي اعرف انا امتى لرجوعي معاد
والوصل ده ان كان حلم ,مش علم ليه وينعاد
وارجع واخاف ياما عليه من وصلك
والاقيكي اجمل كتير ياحلوة واحنا بعـــــــــاد

(67)

احلى معاني ف القصص تبقى بلا معنى
واجمل معاني الحب نلاقيها ف فراقنا
ولما ندور على الفهامة ياعم ولا حد يلقاها
واخر المطاف نفسي اما تلاقيها تبقى كده معنا

(68)

الكره ماله وجود الا ف قلب الصـــــد
والحب بيك موعود لاكن ماتاخده جد
اما السعادة بقى كان نفسي اقول عنها
لكني ما اتعودت _اقول وما اعرف حد

(69)

الحب ده ع الارض من قبلنا فيــــــــــها
احنا اللي جبناه الارض وعاليها سفليها
سرقنا طعمه ولون ومن قبلهم ريحته
بقالنا بس الاسم وحكاوي نحكيهــــــــا

(70)

قلبت ف الاسباب يميني وشمالـــــــــــــــــي
وحودت ف الميادين وسقت طوالــــــــــــــي
بحثا عن الافراح ، لاقيتها ليه شحت ؟
كان نفسي اقول انا رد -خرست -طب مالي؟

(71)

كان نفسي القى لغة يفهمها كل النــــاس
تلغي الظنون السود وتحارب الوسواس
ما تخلي حد ف يوم يفهم صحابه بعوج
لكن اللغات عجزت ، تلم ضعف الراس

(72)

كان نفسي ف غيابي تحفظ يازين وعدي
وارجع الاقي الود كما نفسي ونعـــــــــدي
لكني ليه بلاقيك دايما حبيب ف الوش
وف الفراق ياحبيب ياخايبة ما تعدي!!!

(73)

كان نفسي ياصاحبي ارجع _تعود تاني
ونوصل مابينا اتقطع ولا انت تنساني
بس لاقيتني ف تيه ماعرفت انا اوصلك
اتاريني ياصاحبي ضيعت عنوانـــــــــــي

(74)

ومين فينا قدر يفضل وبعد البعدعلى لونه
يلاقي صورته ف مرايته وضيا عيونه
زمان اعوج يشوهنا ويسرقنا من عنينه
لاعدنا لاقينا فيه ذاتنا ولا حلمنا نكونه

(75)

شريطه ف ضفيرتك كان نفسي انا ابقى
واشبط ف ديل العمر ماتكبر النبقـــــــــــة
ولا تسيبيش حضني ياغالية بضفيرتك
واسرح المضفور واحل ما تبقـــــــــــى

(76)

وياما قلت يابابا امتى انا اكبر
واطول حد القمر بايدي
ضحكلي وخدني في حضنه
وقال نفسي
ف يوم ما تقولي مش عاوزة
كمان اكبر
اكون جنبك
يانسمة وعطر تنهيدي
وملحقشي
ولا لحقته
وكبرت وضاع قمر عيدي

(77)

طب والله افتكرناكي وعنك ياما دورنا
وصبحنا
على عنيكي وف غيابك وحشتينا
كتير خالص
وحلمنا ياما برجوعك
وحوشنا كمان احلام
شوية ليكي ف الموضوع
تسويهم على ذوقك

(78)

كان نفسي يامنيتي يكدبني فيك ظني
واطلع انا الغلطان مهما الغلط يضني
وتوصلني بعد غياب وف غيبتي بتصوني
لكنه طبعن فيك , تغدر , وبتغيضني

(79)

كان نفسي تبقـــــالي
يا اغلى من الغــــالي
وتبــقى نغمــــة ناي
ســــلطن في مــوالي

(80)

كان نفسي تسكني وتبقى ف عروقي الدم
وابقى انا فيك النبض ف العلم او ف الحلم
اتنفسك ف الجو ، تشربني في المية
وان دقت يومي غيري يامنيتي تعـــــــــدم

(81)

وكان نفسي نهار مارجعت تكون صافي
وتكون مشتاق تعيد الوصل ماتجافـــــي
لاقيتك العودة بالنيه على الهجران
وخوفي من وعودك ليه لاتخافــــــــــي

(82)

وكان نفسي بدمع الفرح حروفي اغمس
يشوفها حبيبي يدعيلي ويفرحلي ويخمس
ويرقيني لا يوم احزاني تغويني
ويبعتلي مراسيله رسل افراح بها يهمس

(83)

وكان نفسي على الحرمان اعيش صـــــــابر
وعلى شوقي لنغم فرحــــان اكون قــــــــادر
لا يربطني حنين ليهم ، ولا دمعي يناجيــــهم
واعيش ناسي ومتناسي اهات اول وانين آخر

(84)

وكان نفسي اعيش فيكي واعيش ليكي
واعيش معزوز مكاني النني ف عنيكي
واشيل عنك جبال الهم فـــــوق كتفك
خنقتيني بنهاراتك طعنتيني بلياليكي

(85)

وكان نفسي احس الكلمة من غير قول
يبوح بيها برعشة ايده بتسلم وبالمعقول
ويسكت _عينه تنطقها وبتهجى انا حرفه
ويكتبهالي وحروفها تنور ليلي لما يطول

(86)

مكتوب على جبيني ولا منه يوم بهرب
السن ده بيضحك لقلبي الدموع تهرب
يا مقسم الدمعات ، ومقسم الضحكة
رضينا بالقسمة ، افتحها بس يارب

(87)

كان نفسي يبقى معايه لسؤالك جــــواب
يحسمها معضلة الوجود من غير ضباب
يعني اني اعرف ف الخلايق
اللي حي من اللي مات
لكني رهن المستحيل لاني ذاتي من سراب

(88)

كان نفسي تبكي العين بدل الدموع دي دم
لما فارقتوني ولما عصــــــــــــــرني الهم
ياصحبتي وغنوا كلن على ليلاه
الا انا وحدي ليلاليــــه دي انتــــــــــــــــم

(89)

وكان نفسي تكوني لي كما كونـــــي
بصدق القول وصدق الفعل تكويني
واعيش جوه الامل واصحى على عنيكي
لانار الفرقه تحرقني وتكوينـــــــــــــي

(90)

وكان نفسي اعيش ف القلب والنني
مطارح فيكي ف عنيكي تساكنـــــــي
منيش عابر سبيل بيكي اوانه يروح
ولا مسافر ، يعدي رحيل وياخــدني

(91)

وكان نفسي اكون فجرك وبعد الليل
واصبح بيكي ع الدنيا وع المواويل
ونغمة ناي اغنيكي وتغنينـــــــــــــي
عمود يسند قوام ضهرك اوان الميل

(92)

كان نفسي ياكلمتي تهدي الجريح بلسم
وتداوي ف الهموم تريـاق ولو بالســــم
لاكن الكلام يا دوب مفعوله ده طبطبة
نفسي يكون شافي ويبقى علاج بالاسم

(93)

كان نفسي يبقى هواك سهم ورشق _ويصيب
ويكون منايه مناك والمستحيل ترغيــــــــــــب
تخطفني او اخطفك من زحمة التانييـــــــــــــن
لاكنهم قالـوا _ان اللقــــــــــــا ده نصيـــــــــب

(94)

كان نفسي عنـــواني ف عنيها والنني
ورمشـــها يفتح عليـــــــــه_ يحضنني
وابقى بداية الشوف واخره يوم ماتنام
والكحل يوم مايقول -ياخلق شايفيني ؟

(95)

لفيت بلاد الله وحلمي على ضهــــــــري
وشوشت ياما الودع صبحا وفي الضهر
كان نفسي في غربتي انسى انا احلامي
لاقيتها سابقاني لكل البـلاد بــــــــــــدري

(96)

لفيت بلاد الله ..وشوفت اللي مايتشـــــــــاف
التور فيها بيتحلب وديوك تبيـــــض الاااااف
وتعابين لها جناحـات وطايره ف الســماوات
لاكني عمري ماشوفت ، العادلي والأنصـاف

(97)
وكان نفسي اشوف مشتري يرضى يبايعني
بنبيع ضمير موجوع بالحق_ قال يعنـــــــي
يمكن ساعتها حنام ، واتهنى بالاحــــــــــلام
ولا حد راح يشتري .. ماهو اصله واجعني
(98)
كان نفسي ع الاحزان اعملها ثورة واثور
وامحيها م التاريخ وابقى الفرح منتـــــــور
للقاصي والداني وابقى انا التريــــــــــــاق
ويتقال عليه الدوا ... ومابقاش انا دكتور
(99)
ونفسي انا ف دمعة من خشية الرحمن
وتبقى كده ف خشوع وف قمة التكلان
اشفي بها روحـــي ، وضلمة جروحي
تمسح خطايا الامس وتعوض الحرمان
(100)
ونفسي ساعة الموت ما يبقى موت عادي
شهيده لاسم الله وجهـــــــــــــــادي زوادي
وبالحق انا وللحق لو جيه اوان المـــوت
ما عرفت فن الحياه_ وموتي اهو ينـادي

(101)

وكان نفسي يوم ما اتهزم احفظ انا المعنى
وحدي انا المهزوم ، ولاحد كان معنــــــــى
ويوم كنت انا الكسبان ، الكـل نافسنــــــــي
النصر ليه ميت اب ، ويتم الخسار ما عنى
(102)
وكان نفسي الاقي حبي ف السكــــــــــة
وانا في رحلتي ماشي وفيه ماسكـــــــــة
اتاري الحب متخبي عن الراحلين
واتاريني وبعد العمر ده كله حبيب سكة
(103)
كان نفسي ي ازمالك تبقى كده نادي
وتنافس الاهلي بجد وتنــــــــــــادي
لكن ياعيني بقيت ، لارحت حتى وجيت
غلبان ياروح نينتك وتلعب على الهادي
(104)
كان نفسي في بكره تعيش كده سالك
وتفضل مع القمة يانادي وتمالــــــــــك
ولا ييجي بكرة تروح على التانيــــه
ونقول عليك ماكنش يومك يا زمالك

(105)
شايفاك ملان بالامل ، بس الامل ده طرح
تزرع ف ارضن بور عمره ماكان يطرح
كان نفسي انا اشجعك لاكن منيش شايفه
خرمانه دي حسبتك ، اجمع بقى واطرح
(106)
اضحك على الدنيا وما تشتكيش همك
واحدف طيور الحزن لو عششت يمك
وازرع امال وحب - بالمالح وتطــرح
نفسي ولا يهمني وانت ولا يهمــــــك
(107)
يبقى لقانا نصيب وزيه كده فراقنا
قطر ومحطه وسفر لقانا ووداعنا
نفسي ونفسك يدوم دفا اللقا بيننا
لكنه حكم القدر جمع وفرقنـــــــــا

(108)
يا فرحة مشغوله بترتر هنــــــــــــا وورود
بكره اللي فات يرجع ومن غاب الينا يعود
ويبقى النكد منكور ولا دمعة ف عنينـــــــا
كان نفسي انا بفرحه وضمة حنين موعود

(109)
ان كان بكا ودموع اهي عيشه وتعدي
ولا هرج وشموع تمد الخطــا تمــــدي
يابخته من فاتها ، مظلوم ومش ظالم
نفسي مدامعك دي تبقى على خـــــدي

(110)
كان نفسي القى لون مخصوص كده لحرفي
يبوح بحب الناس وللجــــــــراح يشفــــــــي
ويمسح دموع العين ... على خدود حلوين
وينور الضلمة ... وف البرد بيدفــــــــــــي

(111)
كان نفسي تبقى هنا .. واقولك اتفضل
فتة بخل وتوم .. واللحمــة تتفصــــــل
وطاجن من البامية ... والرز متفلفــل
وتحبس بقهوة وشاي وتشكر وتتفضل

(112)
وكان نفسي ياعشاق اسم النبي وهداه
العشق يبقى بعمل مش بالقواله القــاه
رفع الاذى م السكك والبسمة في وشك
موش خلقة عابسة وضر لكل عباد الله

(113)
يبقى الفطار عندنا ف موضوع صباح الخير
والغدوة كلمة ف بيت مع طيبة ام الخيـــــــر
والقهوة عندي انا تبقى في كان نفسي
وتنام خفيف احســــــــن ولا تتحوج للغيـــر

(114)
الفين سلامة عليك يا حلو م الحـــيرة
ومن تقيل الاحمــــال وتبطل السيـــرة
ولا يتعبك ده اليـــوم الا ابتســــاماتك
تصحالها ولا تنام يا اغلى شـحرورة

(115)
كان نفسي مرة تزور ، واطبخلك عنيه
روزن وفتة ايه لحمـــــــــــة وطعميـــه
بس انت خطي الحدود واعبر كده وجرب
كبشين ظراف ع الغدا والعشوة تقليــه

(116)
كان نفسي يبقى الحب زي الهوا ف الجو
يوصل لكل الناس والعيشة به تحلـــــــــــو
ولا يبقى زي العيش مفقود من الاسواق
طابوره للي معاه والمش معاه ف الهـــو

(117)
صافيه القلوب رايقة وحبل الوداد موصول
وكل الغمم تنزاح وليلنا ومهما يطـــــــــــول
الفجر راح يرجع وشمس النهار تطلع
من نفسي او نفسك بكرة جراحنا تــــــزول

(118)
كان نفسي يوم ما اسأل القى الجواب عندك
مش دايره جوه فراغ وراكب الطناش عندك
يابايع الغالي .. برخيص ولا تبالـــــــــــــــي
لازمن اشوف فيك يوم ، عني وعنــــك دك

(119)
كان نفسي قد القــول ، ونبقى رجاله
واقفين كده وقفة ، ونجســد الحالـــه
مش كل شين كان وفوتنا لزمنا زمان
ونشبط ف قول العــم او قولة الخالة

(120)
وكان نفسي يزور طيفك ولو ف منام
اعاتبه او يعاتبني ينور ليلنا بالاحـلام
لكنت اوفي لعنيكي اوام ندري
بأنك لو سكنتي الحلم هيبقى مقــــــام

(121)

وكان نفسي اكون نفسي ولا بالــــــي
بزيدٍ لو ضرب عمرو وانا مالــــــــي ؟
اكبر م الهموم راسي ولا اهلي ولا ناسي
ولا اشغل روحي لا بعمي ولا بخالي

(122)

وكان نفسي اكون شحرور واعلي لفوق
واسكن في براح حلمي وعمري ما افوق
وانا اصحى وابات كده بجناحـــــــــــــات
وريشه تبقى من مورجان وريشه ياقوت

(123)

وكان نفسي تهاديني يادنيا ف ده الزمان صاحب
ويبقالي غطاية وستر وف الازمات ويتصاحب
يصون غيبتي لو اني غبت يراعينــــــــــــــي
وانا اصونه واكون له دراع ونتصاحـــــــــــب

(124)

مركب ورق ف الحلم مشيتها ف الساقيه
عدت بحار الصعب وظروفها كات قاسية
ولما وصلت هناك كان نفسها ترسي
الدنيا ليه مطرت وغرقت ومش ناسيه

(125)

كان نفسي متر ف متر ونعيش انا وانتي
يصبح علينا الصبح براها ما نخطــــــــي
الدنيا فيها وسع لو القلوب وسعت
والقلب لما يضيق وسع الحياه يخطـــــي

(126)

ياما نفسي بجناحات واطير انا ليكي
وازور انا عشك واطــول اراضيكي
وان مرة زعلانة ودمعك على خدك
امسح انا دمعك ، واجي اراضيكي

(127)

وكان نفسي يبقى العقل ميزاننا قبل القلب
يحكم علينا نطيع مش كره والا حـــــــب
نوزن مشاعرنا ونصون دوافعنــــــــــــــا
لا نجور على اغراب ، ولا قريب يكسب

(128)

كان نفسي خيرك يا مصر يبقى لأصحابك
ياللي انتي ستر وغطا ولا تقفليش بابــــك
جوم حولوكي لقرع ولبره بتمـــــــــــــدي
وتدي الغريب بالكوم .. وقطاره لاحبابك