ديوان/ الدكتورة الشيماء

اووووووه ..
ننه ياجرح ... وننه ياجرح
نام شويه ، واصحى الصبح
شمسه تجيبلك جرح جديد
تتونس وياه وتبوح

اوووووووه
ننه يا شوق وننه يا شوق
نام شوية ، وبكرة نفوق
يمكن تروي شوقنا فرحة
بلقاهم ونبطل نوح

اووووووووه
ننه ياغربة وننه يا لوم
بزيادة الوحدة وهموم
نامي شوية يمكن نحلم
باحضان اهالينا ونسوح

اوووووووه
ننه يا قهر وننه يا قهر
يا مورينا نجوم الضهر
نام شويه وبطل قهر
يمكن راح نصبح على ثورة
متفجرة هتداوي الروح
تمحي جراحنا
ونار اشواقنا
وغربتنا والقهرة تروح

اوووووووووه
ننه يا جرح ...
وننه يا رووووح

بقلم
الدكتورة الشيماء

الأولة غربتى
من يومى عاشقانى
دائى إنتى وإنتى الدوا
طب ليه معاندانى
ياغربتى
تربتى
قاسية كما الرحة
تطحن وانا قمحها
أيامى شريانى
.............

والتانية ليه نعشقك
وقلوبنا ليكى تميل
وانتى نهارك ضنا
وويلك نديم الليل
أصل انتى ستر وغطا
لو أرضى خانقانى
...............

والتالتة انتى الوطن
لو غربتى ف دارى
أما الحبيب يتفقد
والذل فيه سارى
والأخ ويا الولد
ولا حد بيك دارى
وطعنات ف ضهرك عدد
شعرك يا متدارى
وصوتك كمان يتخنق
وأحلامك بتتسرق
وكرامة ماتنصان
وتوقف محلك زمن
ولا تتحسب إنسان
أهرب أنا لغربتى
وتبقى لى دارى
وأعيد كتابة الزمن
أخلقها أزمانى
..............

والرابعة فى غربتى
صايمة مواويلى
ولا مية تروى العطش
غير ميتك نيلى
بس الصيام على العطش
أهون من الموت ذل
أحلم أنا بميته
ولا أشربه بويلى
قاسية انتى ياغربتى
وف صحبتك شىء مر
بس انتى ليه قدر
شر وما منه مفر
وانا وانتى عارفين بقى
حكم القدر ده عجيب
جرح الحبيب فى الوطن
قاسى ومابيطيب
وفيكى لو ننجرح
يبقى اسمه جرح غريب
يومين وراح يتنسى
ياصاحبه عنك حيرحل
يا إنت عنه تغيب
جرح الغريب يتبلع
جرح القريب صعبة
..............

خامسة وسادسة وعاشرة
والألف ياغربة
الغربة جوة الوطن
هى بقى الغربة
والغربة جوة الزمن
ألعن من الغربة

بقلم
الدكتورة الشيماء

صاحبي قاد ف مرة مظاهرة

وشعبه وراه

عمال يهتف بجموع هادره

يعلي نداه

ثورة ثورة حتى النصر

ثورته قامت

وهتف هو

ثورة ثورة حتى النصر

وشاف بحلمه نور الفجر

الايام دارت

شعبه اتسرسب

واحد منهم سرق الثورة

وواحد تاني باع النصر

والتالت قاعد ف الغربه

عمال يكرع كاس الصبر

مرة ف صحة جيل الثورة

ومرة ف صحة جيل القهر

ورابع باع ال بكرة وعتم

نور الفجر

وصاحبي ما داري

باللي جاري

ولسه بيهتف

ثورة ثورة حتى النصر

بقـــلم
الدكتورة الشيماء

الضحك ع الميت حرام

(ضحكة ف الاول )

ضحكتني ياطبيب
ياللي نويت تجرح
سهمك
رشق بك
نصيـــــــــــــــــب !
قالوا العدا : افرح
انا قلت لاء مش هيزيد
ما بجتته .... مطرح

واما الزمن يضحك

قال الزمن يالليبالمر تتعايق
ماصبرت الا على بعضه
ومش طايق
غالي , وعالي , وشموخ
ويمكن كمان فايق
صبري ياعالي المقام
دونه مقام الصبر
ضحكتني بالمرار
وانا اصلي اصل المر
وغلاوتي ؟ اسأل تلاقي
الغل يا غالي
وهبسم ف وش الالم
يمكن يقول : رايق

مين يضحك ف الآخـر ؟

مابقاش مابيننا كلام
بيعه وهات بسمة
على اللي باعوا الكلام
وانا اشتريت ...غالي
سيب الملام والخصام
وهادي الزمن رسمة
صور عيون ادعت
اني انا النني
تاري القلوب انطوت
ع السخرية مني
علشان معاهم وفيت
وحلو الكلام اشتريت
وكسبت انا اليغمة
وصنت انا الحرمة
وقالوا زمان ف المتل
كل اللي باع خسران
حرمة وفا ... ف يوم .. هان
كسبتها يا زمان
ياسعدي يا فرحتي
وبالتلت .... انا بسمتي
احسب كده بذمتك
مين يا ترى ف حسبتك
ف الآخر الكسبان ؟؟؟
بقلم
الدكتورة الشيماء

واما انت عن عيني اختفيت
والكون ضباب
دقيت قلوب كل الصحاب
باب بعد باب
واغرب ماكان اني لاقيت
مطرح لاسمك
ياصديقي ف كل قلب
هنا شفتك اخ وللصغير كنت اب
انا رحت اطبطب ع القلوب
ساعة الغياب
لاقيت قلوبهم ... مطرحك
شايل همومي
وف غيابك ف المحك
ياللي جمعت الفرح فينا
ف يوم ضباب
حاسب على قلبك اوي
وانسى العتاب
وافضل لنا دايما شباب
يارب تسمع دعوتي
ف جوف الظلام
ترجع لنا الغالي قوام
ومن عمري تاخد مابقي
وتزيده فوق عمره ..
كده ... من غير شقا
ويقرب اوانك يالقا
ويبقاله ف محبة سلام
وتشيل متاعب جسمه
ومن قلبه العذاب
يا ربنا رب الانام
اخويه ده الغالي
على كل الصحاب
وتجعل دعانا مستجاب

بقلم
الدكتورة الشيماء

شوفت سعادته يقزقز لب
قلت وماله ، ياهنياله
تحت القبة اتقهر الصعب
الدستور واتصلح حاله
والاسياد طبلة ومزمار
زار عاملاله
وشيوخ بتسبح بجماله
ايه يعني اما يقزقز لب ؟

طلعنا ندب ... نزلنا ندب
شوفنا سعادته يقزقز لب
قلنا سعادته واخد راحته
ماتحت القبة انتعش الطب
بؤر وبا ، اخر شقاوة ...
ودمرناها
واكياس لدم اخر عفونة ...
اخر نقاوة وعقمناها
وخطط محالة ... رايقة وطايله
وبالهداوة
مادماغنا عاليه نفذناها
بقى من حقه ... ياخد راحته
ويقزقز لب
طلعنا ندب نزلنا ندب
لاقينا سعادته ....
يقزقز لب

طلع يدب .... نزل يدب
صادف سعادته ... يقزقز لب
قلي وماله ولا على باله
اما انتي .. يا أختي
حقه مدب
عوض ضحايا العبارة
ومن قاتلهم خد الامارة
وجاب الحقوق المسلوبة
وعمّر زوايا المخروبة
ورجع اثارنا المنهوبة
يبقى ده حقه ومستحقه
اخر المتمة يقزقز لب
واكتم ياطالع .... واكتم يانازل
سعادته ... مناضل
وبين الافاضل
قاعد ياعيني ... يقزقز لب

الدكتورة الشيماء

تقل المرتب في جيوبنا اول
كل شهر
بيديها احساس بالدفا

والبت اما تقيس
لاول مرة ف عمرها
طرحة بيضه تلفها
تديها احساس بالدفا

والواد باول ولعة
من اول سيجار
ساعة طلوعه
دراكسيون اول خنفسة
يبقى حاسس بالدفا

واما تبقى الخنفسة
درعهم قصاد ظلام الليل
ومطرة معطرة
ويبقى صوت الست ..
عطر بيهفهف يدوبهم سوا
ساعته وبتاريخه طبعا
يبقوا حاسين بالدفا

واما يبقى شهرها الخامس
في اول حملها
تبقى رفسات الجنين
في رحمها
اجملها احساس بالدفا

كل دول احساس مؤقت
بالدفـــا
بس اما بتبقى
منفي برة القاهرة
ويبقى شلال الحنين
فيضان دموع
يخلي عينك ساهرة
يبقى تعريف الدفا
انك تكون
في ساعتها ف حضنها
والبرد بره
والسما بترعد وتبرق
وانت قاعد
على طبلية الحاجة
بتشرب شاي بنعنع
من ايدها...
لاااا...من قلبها

مش عارفه يمكن
اخر احساس بالدفا
يبقى بطن القاهرة
اما يأذن ربنا
ان ترابها
يلم اللي باقي مننا
ف الغربة يعصرنا الحنين
وياااما نحلم
بآخر احساس بالدفا

بقلم
الدكتورة الشيماء

(1)
ابيض واسود

الزمان
من لونين كان ف عنينا
ابيـــــــــــض اســــــــــود
وانا فرحانة ببياضي
وف مظاهرة رفض
ف الزحمة التقينـــا
كنت بهتف
يحيى ايماني اعتقادي
من على الناصية .. تبسم
ضحكته
حسيتها مش لينا ...علينا
قلت مالك ؟
قالي ..... عادي !
دمي يغلي ... يفور عنادي
يحيى نبض الثورة فينا
يسقطوا كل الاعادي
ليه بتسخر يا اخينا ؟
قالي .... عادي
قلت ... ماشي ...
ماعليــــــــــــنا

(2)
رمــــــــــادي

وانطوى هتافي وصورتي
ف الاراضـــــــــــي...
والاعــــادي....
والقواضـــــــــــي....
والصويت , مليان وفاضي
والوجــــــــــود
كون افتراضي !
واحنا ف الحتة الرمادي
وف مظاهرة رفض
في الزحمة التقيتهم
يهتفوا
يحيى ايماني اعتقادي
بسمتي كانت تدادي
...او تراضي
شفتها بتقولي مالك ؟
قلت ...عــــــــــــادي !
وكملت هيه المسيرة
وكان هتافها ...
يرفض اللي بيقول عليهم
انهم ف الرفض ...عادي
واللي يبقى صامتا
ف السلب ... راضي
يكون معادي ...
وماعلينا !!!!

(3)
الوان من غير لون

خدت انا الناصية الشمال
وهو ع الناصية اليمين
وهيه ف الناصيه اللي ف النص
وعنيها ميت سؤال
كان ينادي ؟!؟!
والمظاهرة زحف شامل
ع البينين
هوجة تهتف يا بلادي
وهوجة ترقص للاعادي
وهوجة جوه الهوجة
وبالالوان بتهتف
كلـــــــــــه عادي !!!!
اما انا.... وهو.... وهيه
كانت البسمة اتفاقنا
وصوت عنينا ...
كنا زي ال عارف انه
كله عادي
او كما ال مش عارف ...
جرى ف الدنيا ايه ؟
كنا وياهم بنصرخ
ماعلينا
ماعلينا
ماعلينا
ماعليــــــــــــــــــــــــنا

كل التحايا للملهمة

بقلم
الدكتورة الشيماء

ضاقت علينا الامكنة
وطالت علينا الازمنة
ولسانه نترجى الزمان
يضحكلنا
ضاقت علينا الامكنة
واحنا قلة ف
كــــــــــــون بـــــــــــــراح
طبقت على الروح الحيطان
اتسخط فينا الفرح
اتحولت
ضحكات مساجين .. لنباح
ياهلترى
ضاق المكان ولا القلوب ؟؟؟
طالت علينا الازمنة
بالحزن تتحول الساعة ..
ل سنة
والحكاوي ..
مستحيلة وممكنة
تصبح ... نعاوي معددة
ف سنين هـــــــــــــوان
كل السكك ... ساد
وهرب من حواريها الامان
ياهلترى طال الزمان ؟
ولا اتفقد
احساس قلوبنا بالزمان ؟

ولسانه نترجى الزمان
يضحكلنا
يضحك علينا.... مننا !
جايــــــــــــــز
انما يضحكلنا ؟
ادي اللي ناقص يازمان
!!!!
ياهلترى
نعرف نوسع ف القلوب
مطرح محبة
لعيش حنان ؟
علشان نغمس بالاماني الممكنة ؟
لاحتمالات فجر جاي
بنـــــــــــــور امان
؟؟؟؟؟؟؟؟؟؟؟؟

بقلم
الدكتورة الشيماء

آآآه ياعنيكي
حاسب راح يبرد فنجانك
انتي القهوة
مالها عينيه؟؟
شقية وحلوة
زي سنيني ملوها حزن
ملوها قسوة
طيب يعني عايز ايه؟
عايز قهو ة...
عايز اهوى
وانتي القهوة
حلوة القهوة؟؟؟
طعمها بيلون ايامي
قبلِك كانت ابيض واسود
واما انا جيت؟؟؟؟
لونتي الدنيا واحلامي
ليه مجيتيش
من بدري ياغنوة؟
انت اللي اتأخرت عليه
ليه من بدري مكنتش ليه؟؟
كنت بدور عن انسانة
تبقى بطعم وش القهوة
اه ياعنيك
مالها عنية؟؟
غامضة ومجنونة وعسلية
زي القهوة
تدي تملي احساس بالتوهة
زي اللي راح يخطف فرحة
يسرق فرحة
من ايام بتغم النفس
ايام جافة
ايام جارحة
يسكت!!!!!!!!!!!
يشرب فنجان قهوة
ويقلب صفحة......

بقلم
الدكتورة الشيماء

لســه زغنن
بشعور نونو
وبكره لون الخوف ف عيونه
ما تكلمش سياسة ف يومه
والنووي مش ضمن علومه
ولا هو حزبي ولا دستوري
بس اتولد بعيب مش صوري
عنده كرامة
يحفظ عرضه وحقه يصونه
اصله صعيدي
راضع من صدري ووريدي
ع الاخبار قاعد يتفرج
وعيني عليه
دور وشه ناحية قلبي
وقالي يا أمي
ليه ربي معملنيش كوري؟؟
طاب اقوله ايه؟؟؟؟؟؟

بقلم
الدكتورة الشيماء

ياشعر مين خلاك تشهد كده بالـــــــــــــزور
وانت اللي دايما تقف بالحق شوكة ف زور
مداح لحاكم جار .. وبتحرف التاريخ
القافيه لو تحكم يبقى الحكم معــــــــــــزور

يا شعر مين يكتبك الا حكيم تعبـان
ملا بدمـوعه القلم والحبر منه هان
اما ضفاف النيل للمية عطشـــانة
الشعر يبقى ترف ياسيِّدي الانسان

ياشعر مين يشتريك ، لو صاحبك بايع
ومين يسمسر عليك والمعنى فيك ضايع
نظموك ف فاكهة وخضار والسامعين اقفاص
يوم ما الكرامة انتهت ف شعورهم المايع

تفرح ايدينا شعر...وطاقة لنور الفجــر
يوم نكتبك بالحق ونصرخ به زي الندر
ندرن عليه انـــا والــــــــــــــحر بيوفي
مش راح اخون كلمتي لحـــد باب القبر

افرح بقى ياشعر

بقلم
الدكتورة الشيماء

ســــــــــوووو ياسووو حبيبي حبســــــوه
ســــــــــوووو ياسووو حبيبي حبســــــوه

حبيبي عاوزله ميـــــــــة
ومنين اجيبله ميـــــــــــة
رحت النيل العصرية
عطشوني وعطشـــــوه
سووووو ياسوووو حبيبي عطشــــوه

حبيبي عاوزله نسمة
ومنين اجيبله نسمة
رحت لعند الكهارب
ف الحر لاقيته ضارب
وف خنقة المغارب قطعوها وقطعووه
سوووو ياسوووو حبيبي قطعوه

حبيبي عاوزله كلمة
ومنين اجيبله كلمة
رحت لسوق الكلام لاقيتهم منعوووه
سووووو ياسووو حبيبي منعوه

حبيبي عاوزله فكرة
ومنين اجيبله فكرة
رحت لعم الفوكييير لاقيتهم حجموووه
سووو ياسووو حبيبي حجمووه

حبيبي عاوزله فرخة
ومنين اجيبله فرخة
رحت لبياع الفول
ما ارضيش واعلنها صرخة
جوم بياعين الفول حبسوني وحبسوه
ســــــــــوووو ياسووو حبيبي حبســــــوه
ســــــــــوووو ياسووو حبيبي حبســــــوه

(1)
كان نفسي ابقى ف يوم حرة كما اليمامات
ويبقى اسمي علم ، ولا تســـبقه اضــافات
وارحل مطارح انا ، وزوادتي فـــوق كتفي
ولا ليه باللي جاي ، ولا باللي عدى وفات
(2)
كان نفسي يبقالي ، اربــع ايدين واكتر
اتنين عشان الشـــغل ، حـاضر ومتأخر
ما العنكبــوت عـــادي يملك ايدين يامـا
والباقي قد الشوق اما احضنك يا اسـمر
(3)
كان نفسي ارسم انا ، بلدي وبالالوان
لون الفرح قبلي ..وبحريها لون امان
مالاقيتش قــدامي الا خطــــوط اليأس
متشخبطة ع البلد ، ومكتفة الانســان
(4)
كان نفسي اكونلك طير في سماكي حر يدور
افرد انا جناحي
واغني صباحي وبعشي انا مسرور
لكنمــا بلادي ، خنقتني ع الهـــادي
وحاولت انا وحاولت لقيت الجناح مكســور
(5)
حـــرفك شـــــبيه النســيم
ونــداه ف بعضه و نبضه
ف عنيك سؤال واعتراض
والصـــمت هاجر لارضـه
(6)
كان نفسي يبقى الكلام
رغيف يشــبع غلابـــة
يمكن ســاعتها السلام
يسكن حروف الكتابــة
(7)
كان نفسي يبقالي صحــبه
على الزمان مـوش عليـــه
ضهر وسندني ف غربـــة
وعيــــون لبعـــدي نديـــة
(8)
كان نفسي البس خيش ، ويبقى الدماغ خـالي
وانسـى اللي كــاني ومان ، وعمي او خـــالي
لاكين الفـكر الوان ايشي كربه وايشي همـــوم
وايشي هجر من الاصحاب وخيانة م الخل لي
(9)
كان نفسي يبقى الخوف حجر كما خوفو
اهدمه بمعـــولي ، وانسف انا حروفـــه
واحرر الغلبـــــــــان ، من هم مـــا يتلم
يقوم كـــده يصحى وينسى الام خــــوفه
(10)
كــان نفسـي تبقى الرمش وابقى انــا النني
مهمن بعــدت بعيـــد ،،، تبقى قـــريب مني
لو يوم طرفني عزول ولا انجرحت بجــرح
ترمش كده على طول .. تحميني وتصوني
(11)
كان نفسي تبقى النفس غجرية ماليها
ف الدنيا دي من قيد ولامنها وعليهــا
لا تخاف على بكــــرة ولا من امبــارح
مطرح ماترمي الودع تجري خطاويها
(12)
ياما نفسي ياطيوب على طول تقوليهـا
ولا كل من قالهـــا ،،، دايمـــا بيعنيهـا
طيبتك يا طيـــوبة ،،، بحســها دايمـــا
تنطق بقـــول ( الله ) وحضور معانيها
(13)
كان نفسي يبقى الكلام لاحساسيس بيطاوع
اشكله كالرخـــام ... صلصال كده مطـــاوع
وتبقى ف القواميس صفحة عن الاحاسيس
وعذري ان في قلبي ،،، شعور مايتطـــاوع
(14)
كان نفسي فوق ارضها اصرخ واقول نفسي
ف النسمة من غير دخان تكـــتم على نفسي
وف نيلهـــا مايلوثـــوه بنفايـات ومايبـــالوا
وف حكـم مايحركه ، يومًــا مـــريض نفسي
(15)
كان نفسي ياكلمتي تبقي مقص جراح
يقطع الللي اتعفن ويرقعه ما اتجــراح
لكنما الكلمـة اتســـرقت ف ليل عتمــة
وسبتيني ياكلمتي اخرس ملان بجراح
(16)
كان نفسي قد القـــول تبـقى غناوينــــا
زرعة ماليها دبول قمــــرة ف ليالينـــا
لاكين الفــرح مفقود والحزن فوق الحد
طرح الكلام مغموس بدمعـــة اســامينا
(17)
وكان نفسي احـــوش م السنين افــــراح
واعيش الحزن كله ف يوم ف حتة براح
واطلـــع من رصيــــد الفرح ف البــــاقي
واوزع كل يــــوم حتة ، واعيش مرتاح
(18)
كان نفسي يمه اعود ف الحضن انا عيل
اغلط تســـامحي اوام وتقــــولي بيعـــيل
عندك الاقي جواب لكـل اســئلتي
وتصبريني بقول لا تسبق الايام
يابني انت ليــــه عــيل ؟
(19)
كان نفسي يافوفـــا يبقى الحنـين وردة
اهاديهـــا للاحبـاب الشـــاردة والـوارده
والود بيننا يدوم بلا حزن طـول اليــوم
ويبقى الوصال موصول سؤالنا او رده
(20)
وكان نفسي قد الشوق تتقصر المسـافات
وجناح يعلي لفوق ف الجــاي او ما فـات
يا هل ترى يا شـــوق يا غيمة الترحـــال
ممكن رعــودي تزخ مطـرات كده الوفات

وبسأل نفسي ، واتسائل
وابات مقتول وابات قاتل
يضيع خـيط الكلام منهــا
تقوم تسكت ، ولا تردش
تطنشني ... ولا تجــامل
ويخنق حزني
جـــوه عـروقي قســوتها
تداري جروحي قشـرتهـا
يفيض دمع السكات مني
طوفــــان ساخر
ومـوج ضحكات
ولا اعرف امتى اخرتها !
اقوم اضحك
على الدنيـا وسخافتها
منيش آمنـة دنـاوتهــا
اكيد خايفـة
يجوز رغم المشيب طايشة
لاكين عايشة
منيش مهزومة يا صاحبي
مادام بضحك
على الدنيـــا ودناوتهـــا
مادام رغم الالم سانداه
انا طولي باذن الله
همووووت واقفــة

بقلم
الدكتورة الشيماء

من قبل ما اتروض
واتمسح بالارض
اقسم باني لسه انا فاكرة
قبل الزمان ما يعض
انا كنت يوم حرة
فارداها طولها بعرض
اي والله حرة , ومجبولة ع الفطرة
ع الشط برمح
واصهل كما المهرة ...
وبشق موج البحر حورية
تنطق بحرية
وف ايها موضوع
ولا تعرف الممنوع
وعلى شط بحر الحياه
ترمح بايقاعها الخصوصي ... قلوع
وتطرطش المية
وعلى طرطشتها تضبط المطرة
ايقاع هطولها
وتترقص القمرة
ساعة ادانها ... وتبقى فجرية
بنغمة صوفيه
برفض امتثالها للجام والنبض
والفطرة محمية
تلغي السؤالات في الزمن
ولا تشـربوش كوب اللبن

امتى بقى او فين؟
او حتى ليه او مين ؟
جه لخبط الايقاع
ولجم صهيل الرفض ف المهرة ؟
قطعا منيش فاكرة
فجأة التقيتها ف وسط طبلة وزار
مخنوق سكاتها والانين ملتاع
مسطولة بتطوح على الهادي
بخضوع ف قولها
دستوركو ... يا اسيادي
بجوفها بسرٍ
او علن
وتنام بلا رفض الخضوع
المستكين , الممتهن
ودايما على الجنب اليمين
غاسلة القدم
شاربة اللبن

يامهرة شاردة بغير لجام حرة
ازاي صهيلك ضاع ؟
ومين لخبط الايقاع
رديت وقلت
اشهد بقى يا كون
من يوم ما دقوا عند الودان الهون
اسمع كلام امك وابوك ...
ما تهون !!!
واسمع كلام الحاكم المأفون
وابنه وابن ابنه البعيد
لو حتى كان مجنون
وامشي لو اجتزت الطريق ع الخط
احرص على التخطيط
وادارى ويه الحيط
ربي العيال .... وبطل التنطيط
مالك ببنك القاهرة يتباع ؟!
ولا الهرم لو ضاع
او حتى نيلك ان عطش ...
او جاع ...
مش انت واكل ومضبط الايقاع ؟
خليك مطاوع نبضها ...
دقتها ايد الهون
واسمع كلام امك وابوك ...
والحاكم المأفون
ولازمن تصدق خطبة الجمعة
وراديو وفضائية ابو لمعة
زاكا المقاوم للزمن
وقبل السبات ما يبات
دوزنها اورادك
وابقى تحرى رقادك ع اليمن
وغسل القدم
واشرب يا متروض لبــــــــن

بقلم
الدكتورة الشيماء

آميـــــــــــــن آميــــــــــــن
يارب بارك
واكفينا ربي شر المعارك
واجمعنا بكره في ظل عرشك
بدعوة غريب لغريب يشـارك
يارب واحفظ ، راءاتنا دوله
هيبة وكفاءة وكمان رجولة
شربيني احمد ده كبير عيلتنا
وابن ابراهيم ، وفاه دليله
اما ابن لادن برنس يحيى
شريك مخالف جميل وحيله
ومدحت زيدانا يدي التمــام
وقت المعــارك الى الامام
اما ايهابنا توفيقـــه زايـد
لبلانكي صاحب وعليه يزايد
وسندبادنا ، ف كل مطرح
زي الخميله للعطر تطرح
ونانو ياهاني زين الشباب
للكومبيوتر ، والشعر باب
ولا عمري انسى
صـاحبي اللـــدود
حمودة غايب ، حاضر ودود
وللي غابوا الفين تحية
ابو حمزة غالي دايما عليه
وجابرده مصري وابن مصري
ان شال العمامة هتعرفوه
حجاج زمانه وعصره واوانه
وف المحبة ما فيه اخـوه
واشرف يا فايز ماليه وجود
قال ايه ياسيدي وعده موعود
وكتير حبايب راءات ونون
اقرب لقلبي من مــال بنون
يارب بارك ف منتدانا
وديمها نعمة فرحة لقانا

الدكتورة الشيماء

صابرين تنادي ياصابر..
فاضت بالوعات الدار
غطت قاذورات المجرى
اتون النار
كيف ستطعم ياصابر
عيال الدار؟
فتبسم صابر في صبرٍ
وتعمم بالعوسج دهرا
ثم بأكليل الغار
وعام بذياك الفيض
عكس التيار
ودندن قطعا بتفاؤل
ياحلاوة الدنيا ياحلاوة
ياحلاولو ياااحلااااوة

صابرين تناجي سي الصابر
ياصابر
هيا ننجب للاوطان
عشر بنات او صبيان
نسل الفقراءاخا فقرٍ
وقود شوارعنا ورهان
للسادة من كل الالوان
والشارع محرقة كبرى
يتضارب دوما بضراوة
فلننجب للسادة وشارعهم
بعض الولدان
يتقاتلوا بامر السادة
ويقطعوا بعض
ياحلاوة
ياحلاوة الدنيا ياحلاوة
ياحلاولو يااااحلااااوة.

فعيال السادة ياصابر
في منأى عن حمى العصر
سادات الاحزاب ياصابر
لا تشكوا القهر
الكل يتاجر بدرع الفقر
وقوت التاجر شعارات
تحتاج لبنات تهتف ضد الفقر
ضد القهر....ضد العصر
وشباب افقر لتمزق عنهن الستر
من اين ياصابر للسادة بصور حمر؟
لو لم ننزفها دما الشجعان
للاوطان
ياحلااااوة
ياحلاوة الدنيا ياحلاوة
ياحلاولو ياحلاااااوة

أُفحم صابر
صابرين اجادت حل اللغز
اولاد السادة ليسوا وقود الاستفتاء
ان كانوا موالاةٍ او عكس
اولاد السادة سادة
فهنيئا لعيال القادة
وعيالنا حصرا يستفتوا
فهمُ الشعب
ولهم الضرب
الرافض منهم من يُضرب
غير الرافض سيكون الضارب والمضرب
صابرين اجدتي حل اللغز
لغز فياجرا لكل فقير يستفتي
كي ينجب الف صبي الف فتاة
يستفتوا في الاستفتاء
يااااحلاوة
ياحلاوة الدنيا ياحلااااوة
ياحلاولو ياااحلاااااوة.

يونيو 2005

(1)

كان نفسي ابقى ف يوم حرة كما اليمامات
ويبقى اسمي علم ولا تسبقه اضافات
وارحل مطارح انا وزوادتي فوق كتفي
ولا ليه باللي جاي ولا اللي عدى وفات

(2)

كان نفسي يبقالي اربع ايدين واكتر
اتنين عشان الشغل حاضر ومتأخر
ما العنكبوت عادي يملك ايدين ياما
والباقي قد الشوق اما احضنك يا اسمر

(3)

كان نفسي ارسم انا بلدي وبالالوان
لون الفرح قبلي ..وبحريها لون امان
مالاقيتش قدامي الا خطوط اليأس
متشخبطة ع البلد ومكتفة الانسان

(4)

كان نفسي اكونلك طير في سماكي حر يدور
افرد انا جناحي واغني صباحي وبعشي انا مسرور
لكنما بلادي خنقتني ع الهادي
وحاولت انا وحاولت ....لقيت الجناح مكسور

(5)

حرفك شبيه النسيم
ونداه ف بعضه و نبضه
ف عنيك سؤال واعتراض
والصمت هاجر لارضه

(6)

كان نفسي يبقى الكلام
رغيف يشبع غلابة
يمكن ساعتها السلام
يسكن حروف الكتابة

(7)

كان نفسي يبقالي صحبه
على الزمن مش عليه
ضهر وسندني ف غربة
وعيون لبعدي ندية

(8)

كان نفسي البس خيش ويبقى الدماغ خالي
وانسى اللي كاني ومان وعمي او خالي
لاكين الفكر الوان ايشي كربه وايشي هموم
وايشي هجر من الاصحاب وخيانة م الخل لي

(9)

كان نفسي يبقى الخوف حجر كما خوفو
اهدمه بمعولي وانسف انا حروفه
واحرر الغلبان من هم مايتلم
يقوم كده يصحى وينسى الام خوفه

(10)

كان نفسي تبقى الرمش وابقى انا النني
مهمن بعدت بعيد تبقى قريب مني
لو يوم طرفني عزول ولا انجرحت بجرح
ترمش كده على طول ..تحميني وتصوني

(11)

كان نفسي تبقى النفس غجرية ماليها
ف الدنيا دي من قيد ولامنها وعليها
لاتخاف على بكرة ولا من امبارح
مطرح ماترمي الودع تجري خطاويها

(12)

ياما نفسي ياطيوب على طول تقوليها
ولاكل من قالها دايما بيعنيها
طيبتك ياطيوبة بحسها دايما
تنطق بقول الله وحضور معانيها

(13)

كان نفسي يبقى الكلام لاحساسيس بيطاوع
اشكله كالرخام ...صلصال كده مطاوع
وتبقى ف القواميس صفحة عن الاحاسيس
وعذري ان في قلبي شعور مايتطاوع

(14)

كان نفسي فوق ارضها اصرخ واقول نفسي
ف النسمة من غير دخان تكتم على نفسي
وف نيلها مايلوثوه بنفايات ومايبالوا
وف حكم مايحركه يوما مريض نفسي

(15)

كان نفسي ياكلمتي تبقي مقص جراح
يقطع الللي اتعفن ويرقعه ما اتجراح
لكنما الكلمة اتسرقت ف ليل عتمة
وسبتيني ياكلمتي اخرس ملان بجراح

(16)

كان نفسي قد القول تبقى غناوينا
زرعة ماليها دبول قمرة ف ليالينا
لاكين الفرح مفقود والحزن فوق الحد
طرح الكلام مغموس بدمعة اسامينا

(17)

وكان نفسي احوش م السنين افراح
واعيش الحزن كله ف يوم ف حتة براح
واطلع من رصيد الفرح ف الباقي
واوزع كل يوم حتة , واعيش مرتاح

(18)

كان نفسي يمه اعود ف الحضن انا عيل
اغلط تسامحي اوام وتقولي بيعيل
عندك الاقي جواب لكل اسئلتي
وتصبريني بقول لاتسبق الايام
يابني انت ليه عيل ؟

(19)

كان نفسي يافوفا يبقى الحنين وردة
اهاديها للاحباب الشاردة والوارده
والود بيننا يدوم بلا حزن طول اليوم
ويبقى الوصال موصول سؤالنا او رده

(20)

كان نفسي قد الشوق تتقصر المسافات
وجناح يعلي لفوق ف الجاي او مافات
ياهلترى ياشوق ياغيمة الترحال
ممكن رعودي تزخ مطرات كده الوفات

(21)

كان نفسي يبقى الحب ف يوم ايدين تبني
وترفع عمار القلب ويبقى البراح مبني
ويخضر الصحرا ويعمر المهدود
لكننا بنحب حب العجوز يابنــــــــــــي

(22)

عشان كده الخواجات
كسروا العنين والجوف
الحب من غير ايدين
عاجز ويدي الخوف

(23)

بشر ياموجي بخير خلي الولاد تحلم
ربك علي قدير يقدر وغيره لــــــــــم
وياما نار بتصبح رمـــــــــــــاد
وياما فراق واتلــــــــــــــــــــــــــــــــم

(24)

ونهار على نهارك بكره لايطلع نهار
بيشقشق العتمة ولازمن ياسور تنهار
والضلمة لو شدت والازمة لو جدت
يبقى فرجها قريب والوعد من جبار

(25)

وعلى استحياء
حقوقنا ونحلم نطولها على استحياء
وطاقة نور ف زنزانة وحلم بقاء
على استحياء
مجرد اننا يمكن نكون بكره
كما احنا ومش اسوء
بقى طموحنا وعلى استحياء

(26)

الفرحة دي شكلها بيقولوا قال بمــــــبي
وبيقولوا قال ايه كمان القلب فيه يحبي
وقال ايه يقولوا ان فرحت راح تهرب الاحزان
لكني من قرنين ولا شفت يوم فرحان
كان نفسي لو شفتها اوصف ولا اخبي

(27)

وجنب منها ف الطل فيه علب الصفيح
سكنوها ناس سقطوا من القيد الصريح
سرطان بينهش فقرهم ف نن العيون اللي اتعمت
يابكره لو ما فتحوا ف االحول يطيح

(28)

الحب زرعة ف القلوب وما اتروت
دبلها شوقها للوصال وموت ورت
زي الخضار الحب ياصاحبي يضيع
ويحل شوك الكره بالصفرة ويبت