ديوان الشاعر/ أسامة علي

بيظلموك
لو شبهوك يوم بالقمر
كلمات : أسامة علي

زَيّ الملاك
ولا غلطه فيك
مش م البشر
وبيظلموك لو شَبَّهُوك
يوم بالقمر
حِنِّيِتِكْ ، رِقِّة كلامك ، طَلِّتِكْ
وأَمَّا تِهِلِّلي بضحكتك
بتحركي حَتَّى الحجر
ومن الدلال
أنا قلبي مال
عاشق بيتمنى الوصال
والحب خدني ف سكتك
ضُمِّيِنِي لِيِكْ
ما بين إيديك
ضُمِّي قوي قلبي شاريك
والروح يا روحي
دايبه فيك
عطشان وعايز يرتوي
يللي بكلمه ، أو بهمسه
أو بنظرة من عنيك
لو جات في عيني بتسحري
د أنا بالساعات
بَسْتَنَّى مِنِّك
لو إشاره ، أو أَمَارَه
وف سمايا تنوري
شمسي أنا ، حبي أنا
إنتي المنى
عاشق وحَبِّكْ وأِتْسَحَرْ
إذا كان دا حلم
م َتْصَحِّنِيِشْ
وإذا كان دا علم
خَلِّيِنِي أعيش
وأحضن حقيقة حُبِّنَا
يحلالي وياكي السهر
وبيظلموك
لو شبهوك
يوم يا حبيبتي بالقمر

مين اللِّي غَيَّر دَقِّتَكْ
كلمات: أسامة علي

يا قلبي مالك قول في إيه ؟
دَقَّكْ غريب ، معرفشي ليه
مين اللِّي غَيَّر دَقِّتَكْ
بَلْقَاكْ ساعات وَخْدَاكْ حالات
تِسْهَرْ كتير ، تِسْرَحْ كتير
أحكيلي قول إيه قِصِّتَكْ ؟
إيه غَيَّرْك ، ومْحَيَّرَكْ
طول الليالي مْسَهَّرَكْ
راسم ملامح فرحتك
ياما قابلت قلوب كتير
بَسْ إِنْتِي غِيِر
مِنْ غير ميعاد كان الُّلقا
وجمعني بيك أجمل قدر
ولا كان في بالي أعشقك
شوفتك أنا زَيّ القمر
وف رقتك ، حنيتك
أَرَقْ من ورق الشجر
ولقيتني عاشق خطوتك
جُوَّاكْ صفا
بِيّصَفِّي كوني ودنيتي
جُوَّاكْ دَفَا
دَفَّا برودة وحدتي
جُوَّاكْ حَنَانْ
حُضْنِكْ أمان
زَرَعْ في قلبي مَحَبِّتِكْ
نظرة عنيك ، بتاخدني ليك
دَوَّامَه فيك بِتْشِدِّنِي
وأحلم معاك
وأسكن هواك
ما بين إيديك بيضمني
وادوب أدوب من ضَمِّتِكْ
معذور يا قلبي ف دَقِتَكْ
معذور وحُبَّكْ دنيتك
معذور تِسَلِّمْ لِلْهَوَا
لو جات رياحو ف سكتك
وإنته الهوا ، ليك الدوا
هُوَّه المداوي لعِلِّتَكْ
ويدق نبض الحب فيك
لما تجيلك قسمتك
ويا قلبي مالك قول في إيه ؟
مين اللِّي غَيَّرْ دَقِّتَكْ ؟

عضو عدد الرسائل : 34 تاريخ التسجيل : 17/07/2008

بحب أوجهلك الشكر يا طب على هذا المجهود الرائع في تجميع
أعمال الشعراء وأنا منهم وفعلا أنا كنت عايز أجمع اعمالي فلقيتهم
جاهزين هنا قدامي حمدت الله على ذلك وباقي أن نشكرك
فكل الشكر والتقدير على هذا المجهود الكبير
ولعلمك أنا نسخته عندي هو فيه ملكية فكريه هنا ولا إيه ؟؟؟

اقتباس :: بحب أوجهلك الشكر يا طب على هذا المجهود الرائع في تجميع
أعمال الشعراء وأنا منهم وفعلا أنا كنت عايز أجمع اعمالي فلقيتهم
جاهزين هنا قدامي حمدت الله على ذلك وباقي أن نشكرك
فكل الشكر والتقدير على هذا المجهود الكبير
ولعلمك أنا نسخته عندي هو فيه ملكية فكريه هنا ولا إيه ؟؟؟

انا اللي المفروض أشكرك يا أس أس على انك سمحتلي أنشر اعمالك هنا

وسعيدة انك نسختها واحتفظت بيها وان شاء الله تطبعها قريب في ديوان

علشان مافيش حقوق فكرية على النت ولازم تثبت توثق اعمالك في ديوان

وعلى أي حال انا شاهدة انها اعمالك ومافيش حد يقدر ينازعك عليها

وياريت تضيف بنفسك قصايدك الجديدة هنا حتى يسهل الرجوع اليها

وكمان مرة بشكرك جزيل الشكر على تشريف المنتدى بأعمالك

مع خالص التحية والتقدير

شكرا لك