آه يانى من جيرانى
* * *
صلى الله عليك
يامن وصتنى على جيرانى
وصية لسابع بيت
وصيتها لمراتى وعيالى
يعاملوهم بالادب والحسنى
ولكن من جيرانى مالقيت
الا الجحود والتعالى
خلونى قلت ياريت
ماسكنت فى الجهة آدى
ولا حد منهم عاديت
و بالحب انا ناديت
وتمنيت لهم اطيب الأمانى
فى اول شقة المعلم أمين
ضلالى ومش أمين
بيضرب حقن ويتاجر فى الكوكايين
وشباب وبنات ضايعين
من بوابة العمارة داخلين خارجين
وقال ايه بيصرفوا منه التموين
وفوق منه بلوة مسيحة تانية
عريس الهنا حمادة ابو طالب
يوصل مراته شغلها
ويرجع معاه حرمة تانية
وعل الحال ده مواظب
عريس جديد لكن
الهوى عليه غالب
وديل الكلب لم ينعدل
ولو علقوا فيه قالب
والست ام عطية
آه كله الا ديه
شديدة وعفية ومستقوية
وسايقة الهبل على العبط
ومدعية انها مخاوية
تسب وتلعن جاراتها
وللكاست والتلفزيون معلية
سالنا عن المرحوم جوزها
قالوا ماحدش جاب اجله الا هى
والفلحوسة المنحوسة راحت اتجوزت
واد صغير ونازلة فيه ملاغية
الواد طلع فتوة
وعاوز ياخد شقتها بالقوة
كل يوم ضرب وصويت وخناق
واحنا لاحول لنا ولا قوة
لامريض يعرف ينام ولا طالب يذاكر
من طلبة المدارس والكلية
اما السنيورة الامورة الست قدرية
لاتقولى فسدق ولابندق ولا طبق مهلبية
المحروس جوزها مدهول نفسه علشانها
ليل ونهار شغل فى الكوبانية
وهى تخرج تتغندر
وكلاب السكك مستنية
انا ايه بس عليهم رمانى
آه يانى من جيرانى
الجمعة أغسطس 08, 2008 5:41 am